‏ Luke 20

Dinyange di Sesu

1Wisi wumoosi, Sesu alonzenge batu gu ndagu Nzambi mu dyambu di musamu wumunyi. Bivunde bi bavegitsi ba malagu ne batenditsi ba migage ne bivunde bi basifu batsombugu. 2Batombe Sesu re: «Yambile yetu, yigonevage mambu mane nde mu dinyange de nyi, nyi wuvege yu dinyange dyene?» 3Ayagule yawu re: «Ne me gandi makedume yenu nzidu. Yambilanu me: 4wusindige Sa mu wubatise nde nyi? Nde Nzambi vore nde batu?» 5Batasenge yawu ne yawu re: «Ga diyambile re: “Nde Nzambi”, agutsukige yetu re: “Mugi yenu disebile ne gitu mu yandi?” 6Ne ga diyagule re: “Nde batu”, babasindige yandi, diguboku ne mamanyi ne batu botsu, mumbare bayatsi bwedi re Sa abile mubigitsi.» 7Ne vane bayagule Sesu re: «Diseyabe wu sindige Sa.» 8Sesu ayambile yawu re: «Ne me gandi masakeyambile yenu wuvege me dinyange di wuvage mambu mene.»

Nongu yi basalitsi bababi gu nungi milunde

9Kere vane Sesu abekonde yambile batu botsu nongu yiyi: «Dibagele dimoosi avare nungi yi milunde mikakunzu malamu. Avege yo bakyelitsi ne ayende munyalu wu yitsingu. 10Ve pule dikyesi di wudoke milunde, asindige musalitsi wumoosi gu bakyelitsi mure bakevege yandi dyandi dikabu di milunde mi nungyene. Te bakyelitsi badimbe musalitsi nugabuse yandi makake mwasi. 11Nge nungi abesindige musalitsi wususu; ne bakyelitsi bene babedimbe yandi, basenge yandi ne bagabuse yandi makake mwasi. 12Abesindige wu mureru; ne yandi adukusu, apunzu ne bakyelitsi. 13Ne vane nge nungi atase re: “Vave mavagi nde tsenyi? Makesindige mwanami dibagele wu murime, gotsu bagugobise yandi.” 14Te ve bakyelitsi ba nungi balabe mwane nge yo, bayambile yawu ne yawu re: “Labanu wuwu re wukesale ne mikwanyi. Kagu dibokyanu yandi dikesale ne mio.” 15Ne vane badute yandi ne gu pange nungi ne baboke yandi.» Sesu atombe yawu re: «Ake nge nungi aguvage yawu nde tsenyi?» 16Sesu numanetombe yawu nane, asupule re nge nungi aguruge, aguboke bakyelitsi bene nuvege nungyandi gu bakyelitsi bamosi. Ve yulu batu mambu ma yambilenge Sesu, bavage re mambu ma munongu wune maserungule labene. 17Te Sesu nubemine yawu, ayambile re: «Ga yenu diyagule nane, ake divindugulu di mambu matendu gu mugande wu Nzambi re:
“Dimanyi diveru ne barungitsi,
dyo re dimakalugu dikuti diwugwarisi ndagu, nde gi ▼

▼Mugande wu mimbu 118.22.

”?

18Mutu wotsu wukelage ve yulu dimanyi dyene, agutsungugu, ne wotsu wukelagulu ne dyo agunyigugu.» 19Bivunde bibavegitsi bamalagu ne batenditsi ba migage babenenge wugange Sesu mu dikyesi dyene mumbare bayabe re amevere nongwene re mu yawu. Te balabe wome wu batu botsu bababile vane.

Lepu yi Sesare

20Ve yulu vane, bivunde bi basifu balegenge Sesu. Mu wurambe yandi, basindige batu babalabunungu re bayi basungeme, mu wuyulu ga gugare makeyambilenge yandi gugubile mambu marekeme. Kere vane bakesambe yandi gu migage ne gu yivunde gi musengi. 21Batu bene badume yandi nzidu re: «Mulonzi, diyatsi re yigoneyambile, nulonze mambu ma sungeme. Yisandi ne dipasu, yigonelonze yimwanze gi mambu magonerume Nzambi. 22Kagu yambile yetu, mugage wu Muyise wugonesingise, vo wubuse wuvaane lepu gu Sesare?» 23Te Sesu ayabe re bamerambe yandi. Kere vane, ayambile yawu re: 24«Ritsiganu me dole mosi. Baritsige yandi. Kere ayubule yawu re: mu dole yiyi, yidimu ne nduge nde binyi?» Bayagule re: «Bi Sesare.» 25Kere ayambile yawu re: «Kagu gabusanu gu Sesare bi Sesare ne gu Nzambi bi Nzambi.» 26Baserungule dagise mbele mu mabigu mayambilenge yandi ve wusu batu. Te bagibeme mbili mu munongu wu mambu mayagulenge yandi ne barumbe.

Nyivu yi basadusi mu dyambu di bufwangugulu bu bafumbi

27Ne vane, dikabu di basadusi bagogule ve wusu Sesu. Basadusi bakatasi re babafu basakefwangugu. Dikabu di batu bene batombe yandi re: 28«Mulonzi, Muyise atendile yetu mu mugage re: “Ga dibagele abile ne mwane ngwandi wu dibagele ne mugatsi wu gabure baane, yanufu, mwane ngwandi wu dibagele arungule yonge mukwili mure bakeburile mufwitsi mbubi ne mukandi.” 29Nonge nuyelige, gurebile baane banguyi tsambu bababagele. Wu marege areyonge mugatsi, nufu, gugabure baane. 30Wu mubeyi areyonge mukwili, nufu, gugabure baane. 31Wu mureru areyonge mukwili, ne yandi, arefu, gugabure baane. Bile re munongu wumoosi gu yawu botsu ba tsambu, bayonge mukwili, ne bafu, gugasise baane. 32Ve yulu vane, mugyetu ne yandi gandi afu. 33Ake vekefwangugu babafu, wukebile mulumi mugyetu wene nde nyi, mumbare botsu ba tsambu babile balumi bandi?» 34Sesu ayagule yawu re: «Babagele ne bagyetu ba tsengi yiyi bakayongeni; 35Te botsu ne babagele ne bagyetu babakedagusu bayelimine ne Nzambi, mu wunyingene gu tsengi yimone yikarugi ne bagufwangugu gu difu, basakebeyongene. 36Vane basakebefu, mumbare bayi munongu wumosi ga bakime ba Nzambi ba yulu. Bayi baane ba Nzambi mumbare Nzambi atsefwangule yawu. 37Muyise alonze ne velee re babafu bagufwangugu. Ve nyigule yandi bumwenyi bu dikwake dilulenge, atsitse Fumu re: “Nzambi yi Abaraam, Nzambi yi Isaak ne Nzambi yi Sakob.”» 38Sesu akonde yambile re: «Nzambi sa Nzambi yi babafu, te nde Nzambi yi batu babamonyu, mumbare botsu bayi monyu ke mu yandi.» 39Dikabu di batenditsi ba migage bayambile Sesu re: «Mulonzi, yitseyambile ke bwedi.» 40Ne vane, baseberungule dume Sesu banzidu tsimosi.

Kristi wusoolu ne Nzambi nde mwane Davida?

41Sesu ayambile yawu re: «Tsenyi batu barungule yambile re Kristi wusoolu ne Nzambi nde mwane David? 42Nga David yabene ayambile gu Mugande wu mimbu re:
“Fumu Nzambi atseyambile Fumwami re:
Ruge tsitsageli ve mabagele mami,
43Kwange ne ve makesunze bakolitsi bagu
gutsi matambi magu ▼

▼Mugande wu mimbu 110.1.

.”

44David akatsitsi Kristi re Fumu, ake tsenyi aguberungule bile mwanandi?»

Sesu alubuse batu mu bitsagilitsi bi basupulitsi ba migage

45Sesu ayambile ne bayikitsi bandi ve wusu batu botsu babayulungu nayambilenge yandi re: 46«Dirambile! Diyavage munongu wumoosi ga batenditsi ba migage! Bakarondi wunange ne bilinge bibinene. Bakarondi wuyubulu ne digobe mu bitsige bi mbili batu. Bakasoli bikudu bimarege mu bandagu tsi masambulu ne bitsige bimarege mu mayayi. 47Bakabongili bakwili bivave byawu byotsu. Bakavagi masambulu mamale mure batu bakeyabe re bayi babanyi. Mu mambu mene, Nzambi agukilise yawu wuvyogilile bamosi.»