‏ Mark 5

Lawana alugo apapoehi hi nehaleya

1Galili bogana u tuponei dobu gowana Gelasene apoma uyahina hi lugeleta. 2Yesu wamgei i huhopu po badebade gehouna alugo apapoehi hi luiluiya kokowagagei i nei po mitehi hi witutuhaga. 3Lawana i memae kokowaga domohi uyahihi. Ma lawa hi letaya ipa gulawa pawapawasigei aena po nimana hina panipanihi ma ega emoemotahi matababana i lautuinihi ma i lowo po u pitapita i memae ma ega emoemotana po hina womomohi. 5Ma iyeta po uguwa hoi kokowaga po hoi oya i ototu nae ma hinina gaima kamkamna uyahinei i hapihapihi.

6Ma lawana i galena nae po Yesu i galeya ma i bulili po u matana i tupeu ma i polou. 7Ega yaka lawana i otu labatana i pa, ‘Yesu, Yaubada Gegewahagana Natuna tam. Awai uyahiu una dewaya? Ipa Yaubada gowanei una paligubau ega una ihiniwiyuwau.’ 8Geka bahana i bahebaheya babana Yesu amaka i baha nae uyahina i pa, ‘Alugo palopaloumam, lawana una hopu haleya!’

9Ma Yesu i lubayadeya, i pa, ‘Gowam iyai?’

Ma i pa, ‘Gowau Bolu, babana boluiyai to memae’. 10I lupali higihigili i pa, ‘Ega tupo geka uyahinei una iyagiyai’.

11Ma polo boluhi oya u hadana hi banibani, Yesu u liyaliyana. 12Alugohi hi lupali gonugonuwa hi pa, ‘Una himiliyai po polo uyahihi to lui’. 13Ega yaka Yesu i palihalehi po alugo apapoehi lawana hi hopu haleya po polohi hi luinihi. Polo magouhi mei tausana luwaga naka pitenana ma atapuhihi oyana yapanei hi haha hopu po bogana uyahina hi halele.

14Ma polo tu galena itetehi hi lowo po hi nae dobu baneina po pitapita tu miyehi uyahihi hi wibenabenama awai hi gelegeleta. Apoma lawa hi hopu po hi nae ipa awai i waawala hina galeya. 15Lawa Yesu uyahina hi geleta. Ma lawana alugo apapoehi boluhi hi nenehaleya hi tuhagaya Yesu aena u labena i tugutugula. Tauna i lukaleko po nugonugona a dumadumaluna ma hi gagaleya po hi matouta. 16Lawahi Yesu a bagibagi hi galeya po hi wituwega hi pa, ‘Alugo apapoehi lawa hi hopu haleya po hi lui polo uyahihi, po hi yoliyoligehi’. 17Yaka hi lupali gonugonuwa Yesu uyahina ipa tupo noka ina nehaleya.

18Hougana Yesu ipa hoi wam ina gelu ma lawana alugo apapoehi hi hopuhopu haleya i baha gonugonuwa Yesu uyahina ipa mitehi hina nae. 19Yesu a baha i wimiheya i pa, ‘Eega, ma tamogi una nae om meyagai uyahina po om guguni una paliwelehi Guyau i lunugotootogogem po i hagum’. 20Yaka lawana i nae a tupo uyahina dobuna gowana Dekapoli, po i wituwega po lawa hi nonoli ma hi gohola dumahi.

Yesu wiwine luwaga i widewadewahi

21Yesu a hewahewali mitehi hi damana meme hai u tupo po bolu hi'mboina meme gadowa uyahina. 22Apoma numa dalabu taniwagana gowana Yailo i nei Yesu uyahina po u aena i polou, 23ma i lupali gonugonuwa i pa, ‘Natuwe wawinena kikina ma apo ina hilage. Ma a luhogalem ipa una nei po una wodadani po ina luyagohana ma ina memae.’

24Ega yaka hi nenae a numa uyahina ma bolu baneina hi wotaghi po hi tataliyana mehi. 25Ma noka boluna u hinena wawine gehouna tootogona. Tauna a totogo naka tala i kolokololo bolima magouhi 12. 26Wawine geka tu ulaula gehouhi uyahihi a gapola i halehi po ipa luyagohana ina tuhagaya po ega ma tamogi a totogona i lalata. 27Tauna Yesu tuwegana i nonoli yaka i wimulitagoya po a kaleko i wodadani. 28Babana wawinena a nugotuhu i pa, ‘Apo Yesu a kaleko a wodadani yaka a luyagohana’, 29Yaka wawinena Yesu a kaleko i wodadani po mala emosi ma talana a kololo i wohouna ma mayana i wimeya amaka i dewadewa.

30Yesu mayana i wimeya naka manini i hopuhopu yaka i luhagawileya po i lubayada, i pa, ‘Iyai u kaleko i wodadani?’

31Ega yaka a hewahewali hi paliweleya hi pa, ‘Heki, bolu una galeya, he tataliyana mehi. Awai binei e laubayada upa iyai i wodadanim?’

32Ma ega yaka Yesu tauna i itotolana lawa u hayahi ipa ina galeya iyai i wodadani. 33Ma wawinena i hanapugeya tauna i dewaya yaka i matouta po i taatawa ma i nei Yesu u matana po i polou po i wibenabenama i pa, ‘Tau a wodadanim’. 34Yesu wawinena i paliweleya i pa, ‘Natuwe, om witumagana i wiluyagohanim; a nugodumolam una nae, om wiyuwa i kokoe.’

35Yesu yohola geka bahana i bahebaheya ma Yailo a numagei lawa gehouna i nei po Yailona uyahina i baha i pa, ‘Natum amaka i hilage ma ata bada ega una laigeno gawahi’.

36Yesu noya i nonoli ma Yailo i paliweleya i pa, ‘Ega una matomatouta tamogi una witumagana’.

37Ega yaka Yesu lawa atapuhi i talagagalihi po ega hita wotagohi ma Pita ma Yamesa walehina Yoni tunawahi i weluwinihi po mitehi hi nae Yailo a numa uyahina. 38Hougana hi gelegeleta meyagai uyahina ponapona hi nonoli naka lawa hi tutou po hi lauhiyawa. 39Ega yaka Yesu i lui numa u hinena po tu tou i paliwelehi i pa, ‘Awai binei o tutou ma o lauhiyawa? Tewela geka ega ita hilage ma e eneno.’ 40Geka bahana uyahina ma lawa atapuhi hi winameya.

Ma Yesu i baha po lawa atapuhi hi huhopu numa hinenei po hi nae hoi uputa. Ma tewelana hinana ma amana ma gasi a hewahewali tonuga mitehi hi lui po hi nae tewelana anu ani eno. 41Yesu tewelana u nimana i wogo ma ponahiyei i baha i pa, ‘Talida kum’, ponatiyei a bui i pa, ‘Kenuna una towolo’. 42Ma tewelana i wotowolo po i nae, babana a bolima magouhi 12. Amana po hinana ma a hewahewali hi galeya ma hi nugogohola duma. 43Yesu i lugagayogehi i pa, ‘Ega lawa gehouhi ona palipaliwelehi u bagibagi geka binei, ma tewela a yam ona weleya po ina am’.