1Th 2 | TabIBTNT | STEP | Учвуз аьгъячвуз, аьхир, гъардшар, учу учвухьна гъювал дав ляхин гъабхьундайи,

‏ 1 Thessalonians 2

Фессалоникдиъ Павелин ляхнар

1 Учвуз аьгъячвуз, аьхир, гъардшар, учу учвухьна гъювал дав ляхин гъабхьундайи, 2 аммаки Филипдиъ, учвуз аьгъюганси, аьзабар ва ужуз апӏувалар алахьунчуин. Хъа учу ихь Аллагьдин кюмекниинди, учуз писди къаршу удучӏвувалариз дилигди, учвуз дирбашди ва ачухъди Ужувлан хабарнакан ктибтнийча. 3 Учу учвуз улупу аьгъювалар ич улдугнайиваларин бинайиин алидар я чӏуру ниятназ апӏурайидар, я кучӏлар айидар дар. 4 Аллагьди, учу лайикь вуди гьисаб дапӏну, Чан Ужувлан хабар ич хилиъ ивнийи. Учу гьаци, адмийириз ккун ишри, кӏури гъапӏундарча, ваъ, хъа – ихь юкӏвар ахтармиш апӏру сар Аллагь бадали. 5 Учвуз аьгъюганси, учу гьич саб ражнукьан уччвудар гафар гъапӏундарча, ва ич хайирназ гьич саб аьмал гъапӏундарча – мидин шагьид Аллагь ву! – 6 ясана адмийирин ад гъазанмиш апӏуз шерик гъахьундарча – я учвухь, я жарадарихь.

7 Учу Месигьдин вакилар вуди хьпаз лигну, учхьан учву ишлемиш апӏуз шуйчухьан. Хъа учу учвʼин гъагъ илипундарча ва ичв арайиъ бицӏидар хъайи дадаси гъахьунча. 8 Юкӏвар ачухъди, шадвалиинди ичв хилариъ неинки Ужувлан хабар, хъа гьацира ич уьмрарра ивнийча. Магьа гьамкьан учву учуз ккун гъахьунчуз! 9 Ичв кӏваин илмийичвки, гъардшар, учʼин алахьу гъагъишнар ва ич аман-иман адатӏру жафйир. Учу Аллагьдихьан Ужувлан хабарнакан учвуз ктибтруган, учвʼкан гьич сариинра гъагъ илилипбан бадали, йишв-йигъ лихури гъахьунча.

10 Учву хъугърудар гъахьиган, учу фици марцциди, гьякьлуди ва тахсир ктарди учвухъди гъахьнуш, учвура Аллагьдихъди шагьидар гъахьунчва. 11 Учвуз аьгъюганси, адаш чан балихъди фици шулуш, учура учвухъди гьаруридихъди гьаци гъахьунча: 12 ичв уьмур Чан Паччагьлугъдиз ва аднахьна дих апӏурайи Аллагьдиз лайикьлуб хьпан бадали, учу учвуз дих апӏури гъахьунча, ял апӏури гъахьунча ва насигьятар туври гъахьунча.

13 Хъана учу Аллагьдиз зат сикин дарди баркаллагь кӏурача, гьаз гъапиш учву учкан гъеебхьу Аллагьдин Гаф гьаци, адмийин гафарси ваъ, хъа дугъридан гьякь Аллагьдин гафси ва учвуъ, хъугърудариъ, ляхин гъабхурайи кьувватси кьабул гъапӏунчва. 14 Учву, гъардшар, Месигь Исайихъди саб духьнайи Ягьудияйиъ айи Аллагьдин хъугърудариз ухшар духьначва: учвуз ичв адмийирихьан бегьем учӏврушин кубкьунчвуз, дурариз чпин адмийирихьан – жугьдарихьан кубкьубси. 15 Дурар, пайгъамбрар йивну йихруси, Агъа Иса дукӏну, ухьухъ хъергна. Дурарин ляхнар Аллагьдиз кьабулди дар, ва дурар вари адмийирин душмнариз илтӏикӏура. 16 Дурари ухьуз хабарнакан жугьуд дарудариз ктибтуз гъадагъа апӏура. Вари гьамцдар ляхнариинди дурари чпин гунгьарин гъагъ артухъ апӏура. Хъа Аллагьдин хъял дурариин сабан ва гьаммишандиз алабхъиди!

Павелиз Фессалоникдиз хъана гъягъюз ккун шулу

17 Гъардшар, учу учвхьан сабан цӏиб вахтназтӏан жара гъахьундайча, думура – бедендиинди, хъа юкӏвариинди – ваъ, гьамус учву рякъюз гизаф тямягь хъайич. 18 Ав, фу дапӏнура учвухьна гъюз гизаф ккун гъабхьунчуз. Дугъриданна узу, Павели, гьаци апӏуз гизаф ражари хъюгъюнза, хъа Шейтӏни гъитри гъабхьундар. 19 Учву дарди, сарун фужар шул ич миж кайидар, ич шадвал алидар, ич адлувалин заанвал хьайидар. Учвʼинди учу ихь Агъа Исайин улихь, Думу кьяляхъ гъафиган, фурслу хьидича?! 20 Фицики ич адлувал ва шадвал, иллагьки, учву вучва!