1Th 4 | TabIBTNT | STEP | Аьхиринишвʼин гъардшар, учу учвуз Аллагьдиз ккунидарси яшамиш хьуз улупганси, гьамусдихъантинара гьаци яшамиш хьуб учвкан Агъа Исайин ччвурнахъан ккун апӏурача. Учву гьамустӏанра гьаци яшамиш шули ачва, хъа вушра, хъана артухъ ужуйи яшамиш хьуз чалишмиш йихьай.

‏ 1 Thessalonians 4

Аллагьдиз ккуни уьмур

1 Аьхиринишвʼин гъардшар, учу учвуз Аллагьдиз ккунидарси яшамиш хьуз улупганси, гьамусдихъантинара гьаци яшамиш хьуб учвкан Агъа Исайин ччвурнахъан ккун апӏурача. Учву гьамустӏанра гьаци яшамиш шули ачва, хъа вушра, хъана артухъ ужуйи яшамиш хьуз чалишмиш йихьай.

2 Учу учвуз Агъа Исайин гьюкмиинди фицдар насигьятар тувнийиш, гьархнадарчвуз. 3 Аллагьдин ният учву Чаз бахш хьувал ва кьяппавалихьан гьудучӏвуб ву. 4 Гъит гьарсари, гирами ва марцц шлуси, чан жандин эйвал апӏри, 5 хъа, Аллагь аьгъдру аллагьсузарси, тямягьярин цӏа кабхъну даришри. 6 Гьацдар тямягьяриъ ахъуз ва гъардшин ихтиярариин лик иливуз гьич фикиркьан мапӏанай, гьаз гъапиш, учу улихьна гъаписи ва учвкан ижмиди ккун гъапӏганси, вари гьацдар ляхнариз Агъайи жаза гьадабтӏиди. 7 Аллагьди ухьуз чиркинвалиъ яшамиш хьуз ваъ, хъа гирамивалиъ гъузуз дих апӏура. 8 Гьаци вуйиган, шли му тина апӏураш, дугъу адми тина апӏурадар, хъа Чан Гирами Рюгь учвуз туврайи Аллагь тина апӏура.

9 Гъардшарихьна вуйи масанваликан бикӏуб думукьан лазим вуди гьисаб апӏурадарча, фицики Чав, Аллагьди, учву чиб-чпи ккун апӏуз улупунчвуз. 10 Хъа учву Македонияйиъ айи вари гъардшарихьна гьаци хьузра шулачва. Гъардшар, учвуз миннат апӏураза, имбубтӏан артухъ чиб-чпи ккун апӏинай 11 – 12 ва, гизафна-гизафси, архаинди яшамиш хьуз чара абгай. Жарадари ичв гьюрмат уьбхбан ва ичвра сабдиъра ул ади дархьбан бадали, гъит гьарсари чан ляхин апӏри ва уьмриз уьлин кьацӏ гьарди, учу учвуз мугагьназ гъапиганси, чан хилариинди гъазанмиш апӏри.

Агъа гъюбкан

13 Гъардшар, учуз учву гъийихдарикан фукӏа-мукӏа аьгъдарди гъитуз ккундарчуз. Сабдикра миж кимдру имбу адмийириси, дурарин дердер мизиганай. 14 Эгер ухьу, Иса, дукӏну, чӏиви хьувалихъ хъугъраш, ухьу гьацира Исайихъ хъугъну гъакӏидар Аллагьди аьршариз Гьадгъахьна хъади гъягърувалихъ хъугърахьа.

15 Учу учвуз Агъайин гафариинди кӏурача: Агъа гъяйиз, ухькан чӏивиди гъуздар дийихнайидарин улихь гьучӏвидар, 16 гьаз гъапиш, хабар утӏубччвган, аьхю малайикдин дих утӏубччвган, Аллагьдин зурна гъарабхган, Агъа Учв завариан гъиди ва сифте, Месигьдихъ хъугъну, гъийихдар чӏиви хьиди, 17 хъасин ухьу, чӏивиди гъузнайидар, гьадрарихъди сатӏиди дифариинди Агъа рякъюз гъахиди ва гьаци гьаммишандиз Агъайихъди гъуздихьа. 18 Гьаци вуйиган, гьамцдар гафариинди чиб-чпик юкӏв капӏри гъузай.