‏ 1 Thessalonians 5

Агъа гъюрайивалихьна гьязурди гъузай.

1Фуну вахтари ва фуну йигъан Думу гъюруш, гъардшар, учвуз дидкан бикӏуб лазим дар. 2Учвуз лап ужуйи аьгъячвуз Агъайин Йигъ, йишвну тӏафалси, кӏваин алдруган, гъюру. 3Адмийири: «Варишвариъ мясляаьт а ва гьич саб жюрейинра хатӏа имдар!» – пуз хъюгъиган, бицӏир кайи дишагьли сабпну бицӏир апӏуз иццрушну гъадагърубси, гьадмуган дурариина аьжал гъядябхъиди, ва дурарихьан гьергбиинди чпи уьрхюз хьибдар!

4Хъа учву, гъардшар, мучӏушнаъ адарчва, ва гьадму Йигъандин аквну, тӏафлиси, мюгьтал апӏидарчву. 5Фицики учву вари аквнан ва йигъандин веледар вучва. Ухьу мучӏушнакна йишвак кахьрадархьа. 6Гьаддиз, имбударси, даахну гъуздархьа! Ачухъ фагьум ади ва кӏубанди гъуздихьа! 7Йишвну нивкӏу улар удутӏнайидар ахури шулу, хъа пиянискийир ярхи йишвди убхъури шулу, аьхир. 8Хъа ухьу, йигъан аквнак кахьрайидар, ачухъ фагьум ади хьидихьа ва хъугъвалинна масанвалин халариъ учӏвдихьа, кӏулʼин ухьу уьрхру пӏапӏах улубкӏидихьа! 9Гьаз гъапиш Аллагьди ухьуз Чан хъял улупнадар, хъа, ихь Агъа Иса Месигьдиланмина вуйи ухьу уьрхювал улупна. 10Гьаддиз ухьу дийихну ашра, адаршра, ухьу гьаммишан Гьадгъахъди хьуз кӏури, Думу ухьхъанди гъакӏну. 11Гьаци вуйиган, чиб-чпик юкӏв капӏри йихьай ва чиб-чпиз хил туври апӏинай – му учву апӏурачва.

12Учвкан ккун апӏурача, гъардшар, учву Агъайихъ хъаърайидариз ва, гьарсаб улупури, кӏваантӏан жафа зигурайидариз артухъ гьюрмат апӏури йихьай. 13Дурари апӏурайи ляхниз дилигну, дурариз аьхю масанвалиинди гьюрмат апӏинай. Чиб-чпихъди мясляаьтниинди гъузай. 14Гъардшар, учвкан ккун апӏурача: ляхин апӏуз даккнидарин кӏулиъ аькьюл апӏай, кагьлидариъ кӏубанвал тӏапӏай, зяифдариз гъюн ккивай, варидарихъди сабурлу йихьай. 15Лигайгьа, ичв арайиъ гьич сарира чӏурувализ чӏуру жаваб тутруври. Гьаммишан, чиб-чпихьна шлуси, варидариз ужувлиинди йихьай. 16Гьаммишан шадвалиъ гъузай, 17зат сикин дарди ккарагури йихьай, 18варибдиз чухсагъул йипай – магьа учвуз, Месигь Исайихъ хъугърудариз вуйи Аллагьдин ният. 19Рюгь мукутӏуршванай, 20пайгъамбарвалин гафар тина магьадаанай, 21хъа вари ахтармиш апӏури, ужувлан тереф дибисну, гъузай, 22жюрбежюр писваларихьан ярхла йихьай!

23Гъит мясляаьтнан Аллагьди Чав учву гьуркӏну гирами апӏри. Ва гъит вари учвуъ: рюгьра, юкӏвра, жанра – ихь Агъа Иса Месигь гъюру гьадму Йигъаз саб зиян ктарди уьрхри. 24Учвуз дих Апӏурайир аьгьтлу ву, ва Гьадгъу му тамамра апӏиди!

25Гъардшар, учхъанра ккарагай!

26Вари гъардшариз гирамивалин мак апӏбиинди салам тувай. 27Агъайин ччвурнахъан миннат апӏураза, гьаму кагъаз вари гъардшариз урхай.

28Ихь Агъа Иса Месигьдин ужʼвал учвухъди ибшри!