1 Timothy 3
Хъугърударин аьхюдар
1Дишди кӏура: шлиз хъугърударин аьхюр хьуз ккундуш – баркаллагь чаз! 2Аммаки аьхюр кипуз саб тягьна ктру уьмрин адми духьну ккунду: саб ражаритӏан швушв дархир, сабурлур, аькьюллур, намус кайир, хялар ккунир, аьгъювалар улупуз удукьрур, 3дурубхърур, элелегрур, хъа гаф-чӏалнаъ гъюдлир, хъюхъ дазрабгрур, пулиъ ул адрур. 4Дугъу чан хал-хизан ужуйи гьюле гъабхури ккунду, хъпехъру ва чан гьюрмат уьбхру баяр-шубар ади ккунду. 5Хъа чан хулан эйвал апӏузкьан даршлурихьан Аллагьдин хъугърударин гъайгъу зигуз шулин? 6Тазади хъугъну имбударикан аьхюр ктагъну ккундар: дицир адмийик фурс кубчӏвди ва, иблисдинси, дугъанра суд апӏиди. 7Хътругърудар дицир касдикан, кьяляхъ тягьнийир дархьуз ва иблисди ккиву чулиъ адрахъуз, ужуйи улхури ккунду. 8Гьаму дурарин кюмекчйиризра кайиб ву. Дурар гьюрмат айи, кьюб маш гъядру, чяхрихъ юкӏв хъадру ва пулиъ ул адру касар духьну ккунду. 9Дурари, марцци намус ади, хъугъувалин сирар дидисну ккунду. 10Сифте дурарра ахтармиш дапӏну ккунду, ва, эгер дурарихъ «рижв» хътрибшиш, гъит кюмекчивалин гъуллугънаъ гъузри. 11Аьхюдарин кюмекчйирин хпарра гьюрматназ лайикьдар духьну ккунду, футнийир дарагърудар, тямягьяриъ адрахърудар, варибдиин хъугъвал алидар. 12Аьхюрин кюмекчира саб ражаритӏан швушв духну адрур ва чан хал-хизан ужуди кӏули гъабхрур духьну ккунду. 13Гьаз гъапиш чан гъуллугъ ужуди тамам апӏрури гьюрматра гъазанмиш апӏуру, ва Иса Месигьдикан вуйи чан хъугъуваликан дугъхьан, саб гучӏ адарди, ктибтузра шулу. 14Багарихьди увухьна гъюз кказа, хъа му узу увуз, 15нагагь узу кьан апӏруси гъабшиш, Аллагьдин хизандиъ жвув фици духьну ккундуш, увуз аьгъю хьпан бадали бикӏураза. Думу хизан – чӏиви Аллагьдихъ хъугъру гирами халкь ву. Думу халкь – мюгькам бин ва дебккрайи гьякьвал ву. 16Саб гаф адарди ихь хъугъувалин сир зурба ву: Думу бедендиъди гъафну,Рюгьну гьякь гъапӏну,
Думу малайикариз гъяркъну,
Дугъкан халкьариз ктибтну,
Думу дюнʼяйиъ хъугъувалиинди кьабул гъапӏну,
Думу адлуди завариз за гъахьну.
Copyright information for
TabIBTNT