1 Timothy 4
Тимофейиз насигьятар
1Аллагьдин Рюгьну ачухъди кӏура, аьхиримжи вахтари, хъугъувал дипну, гьацӏар гьудучӏвиди, дурари кучӏлин рюгьярин ва жинарин каламарин тереф бисиди. 2Дицдар каламар, намус дудубгнайи, кью-кьюбди машар гъивнайи кучӏляхяриланмина гъиди. 3Дурари швушвар хуз гъадагъа апӏура. Дурар, гьякьвал агъюдарина хъугърудари баркаллагь кӏури, ипӏбан бадали Аллагьди халкь дапӏнайи саб жюре итӏрудар митӏанай, кӏури, хъюгъна. 4Аллагьди арайиз дубхнайиб вари ужу ву. Баркаллагь кӏураш, вари кьабул апӏуз шулу. 5Гьаз гъапиш думу вари Аллагьдин гафну ва ккарагбу гирами апӏура. 6Эгер уву, Тимофей, гъардшариз гьацдар кӏури гъабшиш, уву хъахънайи сагъ аьгъюваларин ва хъугъувалин гафари ацӏрайи Иса Месигьдин ужур гъуллугъчи хьидивукан. 7Кьаби хпариз лайикь вуйи махъварихъди вахт давди маадапӏан, хъа гьарган хъугъувалин тӏалабарихъ йихь. 8Бедендиз вуйи гьяракатарикан сацӏиб мянфяаьт а, хъа хъугъувалин тӏалабарихъ хьуб варибдиъ мянфяаьтлу ву, фицики диди, гьамусси, гъюру вахтариъра уьмур тувди. 9Му гаф дюз апӏуб ва кьабул апӏуб лайикь ву. 10Гьаддин бадали ухьу лихурира ахьа, гьаддихьна гьачӏарккурира ахьа, гьаз гъапиш умуд чӏиви Аллагьдик кайихь, хъа Думу вари адмийир Уьрхрур ву, иллагьки – Чаин хъугъвал алидар. 11Адмийириз магьа гьамдихьна дих апӏин ва гьамдикан аьгъювалар улуп. 12Увухьинди, уву жигьил ву кӏури, гьясппикк ккадру саягъниинди, фужкӏара лигуз мигъитан. Хъугънайидариз уву гьам гафариъ, уьмриъ, масанвалиъ, хъугъувалиъ ва гьам марццишнаъ чешнеди гъуз. 13Узу гъяйиз хъугърударин улихь Гирами китабар ерхьури урх, Ужувлан хабар ктибтури апӏин, аьгъювалар улупру мялим йихь. 14Хъугърударин аьхюдари увʼин хилар иливуйрайиган увуз гъапи пайгъамбарвалин гафариланмина гъабхьи багъиш увхьан ярхла мапӏан. 15Яв гъуллугъ юкӏв хъади апӏин, дидиз гьуркӏну бахш йихь, ва гьадмуган варидариз яв хъуркьувалар рякъиди. 16Яв увʼин ва уву улупурайибдиин ул алди гъуз. Гьаму аьгъюваларихъан ижмиди хъичӏих, фицики гьамци апӏури, увура ва увухъ хъпехъурайидарра уьрхидиву.
Copyright information for
TabIBTNT