‏ 1 Timothy 5

Вазифйир, яни жвуву гьапӏну ккундуш

1Яшлу адмийириз хъжагъру саягъниинди макӏан, яв адашси, гъавриъ тӏаъ. Жигьил адмийирихъди, яв гъардшарихъдиси, гафар апӏури йихь. 2Аьхю дишагьлийир – дадйирси; жигьилдар чйирси дис, дурарихъди вуйи яв аьлакьйир лап марццидар шлуси гъуз.

3Гьич саб терефнаанкьан кюмек имдру ачӏни дишагьлийирин гъайгъу зиг. 4Эгер ачӏни дишагьлийиз баяр-шубар, ясана хтулар аш, дурари чпин хъугъувал ляхниъ улупри, чпин хизандинна абайир-бабарин гъайгъу зигури. Му Аллагьдиз кбалгру ляхин ву. 5Хъа гьякь ачӏни дишагьли, яни фужкӏа хътрур сар Аллагьдихъ йирфар хъирчнайир ва, йигъ-йишв ккарагури, Дугъкан кюмек ккун апӏурайир ву. 6Хъа кефер апӏурайи ачӏни дишагьли чӏивидимиди дукӏнайи гьисаб ву. 7Гьич саб жюрейин тягьнийир дархьбан бадали, хъугърудариъ тӏапӏ. 8Жвуван багахьлуйирин, сифтена-сифте жвуван хизандин гъайгъу ктрур, хъугъувалихьан гьудучӏвнайир ву ва хътругъруртӏан ужуз ву.

9Йирхьцӏур йислан зиина яш дубхьнайи ва саб ражаритӏан швувахь дархьи ачӏни дишагьлийиртӏан хъугърударин гъайгъушнаъ махьан. 10Думу дишагьлийин ужудар ляхнар аьгъю ишри: бицӏидар вердиш гъапӏу ва хялар кьабул гъапӏу, хъугъру гъардшарин ликар гъижикӏу, читинвал алабхъдариз кюмекнаъ ва гьарсаб ужудар ляхнариз бахш гъашир.

11Жигьил ачӏни дишагьлийир думу гьисабнак макаан, гьаз гъапиш чпин юкӏв хъипнайивал Месигьдихьан ярхла шлурихъ дурариз швуваз гъягъюз ккун хьибди, 12ва, чпи сифте Аллагьдин улихь туву гаф чӏюбгъюри, дурари чпин суд апӏура. 13Мидихъди сабси, лихурира адруган дурар гагь-гагьнак давди вахт адапӏуз вердиш шула, хулариан-хулариз ккажагъуз хъюгъра, футна либхура, жарадарин ляхнаригъ гъючӏвра, лазим дарубдикан улхури шулу. 14Гьаци вуйиган, узу жигьил ачӏни дишагьлийирикан швуваз гъягъюб, бицӏидар апӏуб, чан хулахъ зегьмет зигуб ва душмнар чпикан чӏуруди дулухруси апӏуб ккун апӏураза. 15Гьаз гъапиш гьацдарикан сакьюдар, жвуван хъугъувал дипну, иблисихъди гъушну.

16Эгер ачӏни дишагьлийириз хъугъру багахьлуйир аш, хъугърудариз артухъ гъагъ дархьуз, дурарин гъайгъу багахьлуйири зигри. Гьадмуган дугъридан кюмек адру ачӏни дишагьлийириз хъугърударихьан кюмек апӏуз хьибди.

17Ужуди аьхювал апӏру касариз хъугърударин артухъ гьюрмат ади ккунду, иллагьки Ужувлан хабар рабгърудариз вая аьгъювалар улупрудариз. 18Гьаз гъапиш Гирами китабари кӏура: «Гад апӏури, раццʼин али йицран ушв миилибтӏан» ва
«Лихрур кьиматназ лайикь ву».

19Хъугърударин аьхюрилан аьрз апӏуради гъабшиш, кьюр вая шубур шагьид хътарди, кьабул мапӏан. 20Хъа гунгьар апӏрур, имбударизра дарс хьузди, варидарин улихьна адагъ.

21Аллагьдин, Иса Месигьдин ва кадагънайи малайикарин улихь увкан ижмиди ккун апӏураза: гьаму узу гъапидар кьабул дапӏну, саризра майил мапӏан; сарин тереф дибисну, тмунуриз миилзиган.

22Жарадарин гунгьарин иштиракчи махьан. Хъугърударин аьхюдарин жергйириз гьялакди фужкӏара макадагъан. Марцциди гъуз.

23Саб шидтӏан дурубхъди мугъузан, яв фунин уьзриз ва кми-кмиди шлу иццрушнариз цӏибди чяхирра ишлетмиш апӏури йихь.

24Гьацӏарин гунгьар, суддин Йигъ гъяйиз гьамустӏанра рякъюра, хъа гьацӏарин – кьяляхъна ачмиш хьиди.

25Гьаци ужудар ляхнарра ву: гьацӏар гьамустӏанра рякъюра, хъа дярякърайидар кьанди арайиз удучӏвиди.