1Ti 6 | TabIBTNT | STEP | Лукӏвалиъ айидари Аллагьдин ччвур ва учу улупу аьгъювалар беябур дарапӏбан бадали, гъит чпин аьхюдарин гьюрмат уьбхри.

‏ 1 Timothy 6

1 Лукӏвалиъ айидари Аллагьдин ччвур ва учу улупу аьгъювалар беябур дарапӏбан бадали, гъит чпин аьхюдарин гьюрмат уьбхри. 2 Хъа аьхюдар хъугърудар вуш, дурар чпин гъардшар вуйивализ дилигну, фурс дарапӏри. Хъа гьаци, гъит имбубтӏан хъана уччвуйи чпин аьхюрихъ хъпехъури ишри, гьаз гъапиш чпи гъуллугъ апӏурайидариз дурарра дугъри ва ккуни гъардшар ву. Адмийириз уву гьамци улупну ва гьаддихьна дих дапӏну ккунду.

Кучӏлин улупбар ва гьякь девлет

3 Шли, Аллагьдиз лайикь вуйи гьюрмат хурайи ихь Агъа Иса Месигьдин сагъ гафар ва аьгъювалар тина гьадаъну, фу-вуш жараб улупураш, 4 думу хъюхъ забгурайир, амма фукӏа аьгъдрур ву. Дицир адми, гьюжатарин ва люкьнарин кчӏихбарин уьзри гъадагънайир ву. Гьацдарилантина бахилвал, гъярхьувалар, агьрар-люкьнар, хъугъвалиан адахъувал 5 ва кӏулиъ маъ адарди гьякьвал кӏваълан гъубшдарин гъанихвали, зат ккудудукӏру гьюжат арайиз хура. Аллагьдин ляхнар дурариз чпи ацӏузтӏан вуйидар дар.

6 Хъугъувалин тӏалабар тамам апӏуб ва варибдиин рази хьуб зурба хъуркьувал ву. 7 Фицики му дюнʼяйиз ухьу гъабхиб фукӏара адарихь, я фукӏа кьяляхъ гъабхидира дархьа. 8 Уьлна палат аш, гьаддиин рази хьидихьа. 9 Девлетлу хьуз ккунир гизаф абдал ва хатӏавалин тямягьяриъ ахъру. Дурари адмийир бедбахтвалин ва аьжалин деринариз хъчӏюхюру. 10 Вари жюре чӏуруваларин ччив – пул ккун апӏувал ву. Пул ккун дубхьну, хъугъувалихьан гьудучӏву адмийир гизаф бахтсуз гъахьну.

Фу кӏваълан гьархну ккундарш

11 Хъа уву, Тимофей, Аллагьдин адми вува, гьаддиз гьацдарихьан гьерг. Дюзвал, хъугъувал, хъугъувалин тӏалабар тамам апӏувал, масанвал, сабур, умунвал бисуз хилар гьачӏаркк. 12 Хъугъувал бадали игит йихь, увуз дих дапӏнайи гьаргандин уьмрихъан хъичӏих. Фицики уву лайикьлуди гизаф шагьидарин улихь яв хъугъуваликан гъапнийва. 13 Гьамус узу увуз, Понтий Пилатдин унтӏаъ кӏубанди гьаму хъугъуваликан шагьидвал гъапӏу Месигь Исайин ва варибдиз уьмур тувру Аллагьдин улихь дих апӏуразавуз: 14 увуз гьич саб тягьна дяргъруси, узу увуз гъапиб вари ихь Агъа Иса Месигь гъяйизкьан, тамам апӏури гъуз. 15 – 16 Вахт гъабхьиган, Думу ухьухьна Аллагьди, хушбахтавар ва сар вуйи Гьюкумдри, паччгьарин Паччагьди ва агъйирин Агъайи, лик кубкӏуз даршлу аквнаъ айи ва адмийирикан гьич саризкьан дярякъю ва рякъюз даршлу, аьжал хътру Сари гьаъди. Гьадгъануб ву гьюрмат ва кьудрат гьаммишандиз! Амин.

17 Гьаму дюнʼяйиин девлетлу вуйидариз йип: фурсар дарапӏри ва чпин девлетарихъ йирфар хътричри – думу мюгькам вуйиб дар. Уьмрикан кьукь ктабгъури яшамиш хьуз вари лазим вуйиб артухъра кади тувру Аллагьдихъ йирфар хъирчиш, хъа ужу ву. 18 Дурарикан ужувлар апӏуб ккун апӏин, гъит гъяни ляхнарихьди девлетлу ишри. Кьискьисар даришри ва иштагьниинди имбудариз чпин девлетнакан капӏри. 19 Гъит, гьамци чпиз хазна уч апӏри – му гъюз ккимбу гьякь уьмур гъазанмиш апӏру ижми шибритӏ хьибди.

20 Тимофей, яв хилиъ ивнайиб вари уьбх. Аллагьсузвалин улхбар-рахбарихьан ва кучӏлин аьгъюваларин гьюжатарихьан гьудучӏв. 21 Гьацдар аьгъювалар ачуз, кӏурайидар хъугъувалихьан гъирагъдиз душна.

Гъит ужʼвал учвухъди ибшри!