2Cor 10 | TabIBTNT | STEP | Узу, Павел, учву кӏуруганси, ичв багахь гьарган «начур», учвхьан ярхла айиган, «кӏубнир», Месигьси гъюдалди ва фурс ктарди учвухьна илтӏикӏураза.

‏ 2 Corinthians 10

Павели, чан гъуллугъ тягьнийирихьан уьбхюра

1 Узу, Павел, учву кӏуруганси, ичв багахь гьарган «начур», учвхьан ярхла айиган, «кӏубнир», Месигьси гъюдалди ва фурс ктарди учвухьна илтӏикӏураза. 2 Учвуз миннат апӏураза: учвухьна гъафиган, дюнʼяйин ляхнариз дилигну, учу ич гъуллугъ ккебгъна кӏурайидарихьна узу кӏваан ижми шлуси, мапӏанай. 3 Ухьу гьаму дюнʼяйиъ яшамиш шулашра, гьаму дюнʼяйин яракьниинди дяви апӏурадархьа. 4 Учу аьдати яракьнахьди ваъ, хъа мютӏюгъ даршлу гъалйир ккидирчру Аллагьдин яракьнахьди дяви гъабхурча 5 ва Аллагьдин фагьмиз къаршу дяви гъабхрудар ккидирчурача. Учу гьарсаб фикир, Месигьдихъ хъпехъруси, йисирвализ гъадабгъурача. 6 Учу Месигьдихъ хъпебехърайидариз, ичв хъпехърувал заан дережайиз гъафиган, жаза гьадабтӏуз гьязур вуча.

7 Учву шейʼарин зиъланди лигурачва! Месигьдинур вуза кӏури, саб шак адарди фикир апӏурайириз гъит аьгъю ибшри, думуси учура Месигьдин адмийир вуча. 8 Агъайи учуз, учву чӏур апӏуз ваъ, хъа артмиш апӏуз тувнайи гьюкмиъ узу хъа гизаф фурс апӏуйишра, узуз нач апӏуб рубкьдайи. 9 Узуз йиз кагъзариинди учвуз гучӏар ккауз ккунди а, кӏуру, фикир дарибшри. 10 Садари, кагъзариъ узу ижмир ва кьувватлур ву, хъа учвухь хьайиган зяифур, йиз гафар фукӏа дарудар ву, кӏури ашул. 11 Гъит гьаци кӏурудариз аьгъю ибшри, ярхлаъ учу ич кагъзариъ фицдар вуш, багахьна гъафиган, ляхнариъра гьацдар вуча.

12 Учхьан, чиб-чпин тярифар апӏру адмийириз ухшар хьуз ясана гьадрарихь тевуз, хьибдарчухьан. Дурари гьаци, чпи чиб-чпихь теври, ахмакьвал апӏура. 13 Хъа алдарди ич тяриф апӏидарча, аммаки Аллагьди учуз дерккнайи терефариъ учу ич тяриф апӏидича, му терефар учвухьнакьан рукьура. 14 Фицики учуз улупнайи терефарилан улдучӏвурадарча, аьхир, гьаци хьибдийи, эгер учу учвухьна гъафундайиш. Хъа учу учвухьна Месигьдикан вуйи Ужувлан хабар хьади гъафунча! 15 Учу кьадар адрубкьан ич тярифар апӏурадарча, гьаз гъапиш учу гъапӏу ляхин – думу ичуб ву, хъа жарадарин хъуркьувал дар. Ичв хъугъувал артухъ шул кӏури, умуд кайич, ва дидихъди сабси ичв арайиъ апӏру ич ляхинра артухъ хьибди. 16 Хъа гьадмуган учхьан дилинтина гъягъюз ва душваъра Ужувлан хабар рабгъуз хьибдичухьан. Чпиз улупнайи йишвариъ гъапӏу ляхнарин, жарадариси, ич тярифар апӏидарча. 17 «Шлиз тярифар дапӏну ккундуш, гъит дугъу
Агъайин тярифар апӏри!»

18 Чан тяриф чав апӏурайирин гаф Агъайи кьабул апӏидар. Агъайин тяриф апӏурайирин – апӏиди.