‏ 2 Corinthians 11

Кучӏлин вакилариз къаршу Павел

1Учву сацӏиб йиз «ахмакьвал» аьгь апӏур кӏури, умуд кайиз. Сацӏибсана аьгь апӏиначва. 2Узу учвхъан Аллагь хъюгъруси хъюгъраза. Узу учвук, сар Жилириз – Месигьдиз, Дугъан улихь тахсир ктру швушвси дугъужвбан бадали, лишан кипунзачвук. 3Аммаки, Ева, иблис битӏру алдатмиш гъапӏси, ичв фикирра Месигьдиз дугъриди ва марцциди бахш шлувалихьан гьадапӏур кӏури, гучӏуразуз. 4Сари, учвухьна дуфну, учу дарпи жара Исайикан ктибтруган, ясана учу тутруву жара рюгь вая учву кьабул дарапӏу жара хабар кьабул апӏруган – му вари учву рягьятди кьабул апӏуручва. 5Узу, йиз фикриан, гьадму «варитӏан заан вакилар вуча» кӏурайидарин кьяляхъ хътарза. 6Мумкин ву, узу гаф-чӏалнан уста дарди хьузра, хъа узуз аьгъювалар азуз ва учу дурар учвуз рябкъюри-рябкъюри варибдиъ улупунча.

7Узу, учву заъбан бадали, жвув асккан дисури, гунагь гъапӏнушул гьа, гьаз гъапиш Аллагьдин Ужувлан хабар учвуз кьимат дарди ктибтунза? 8Учвуз гъуллугънаъ хьузди, жара йишвариъ хъугърударихьан пул гъибисну кӏури, узу дурар тӏарашра гъапӏну, пуз шулу. 9Узу учвухьна дуфнайиган, гьеле узуз вари гьубкӏну адайишра, гьич саринра кӏулʼин алахъундарза. Вари лазим вуйиб узуз Македонияйин гъардшари тувунзуз. Узу гьамусдихъантинара учвʼин алахъидарза. 10Му йиз дамах – узу узуъ яшамиш шулайи Месигьдин гьякьвалиинди гаф тувраза – гьич сарихьанра вари Ахая вуйибси гъилицишра, батӏул апӏуз хьибдар! 11Гьаз? Учву даккниган? Узуз учву фукьан масанди вуш, Аллагьдиз ужуйи аьгъя!

12Гьамусдихъантинара узу ляхин гьаци давам апӏидизаки, узу апӏурайиси Аллагьдин ляхин чпира апӏурача, кӏури, къуру тярифар апӏуз ккунидарихьан дици апӏуз даршлуси.

13Думу адмийир, кӏучӏлин вакилар, марцци хил хьтру гъуллугъчйир Месигьдин вакилар вуча кӏурайи кӏучӏляхяр ву. 14Му аьламат вуйин хъа? Иблисра учв аквнан малайикси улупури гъабхьну! 15Гьаци вуйиган дидин гъуллугъчйири чпи гьякьлу гъуллугъчйирси улупуз чалишмиш хьувалиин мюгьтал хьуз хай даршул. Дурарин аьхирра чпин ляхнариз гъилигуб хьибди.

Павелиз алахьурайи читинвалар

16Хъана текрар апӏураза: узу ахмакьси мидисанай, хъа эгер дисураш, узухьди, ахмакьриси, сацӏибсана тярифар апӏуз гъитай. 17Гьаму ражари узуз пуз ккуниб, Агъайиси дарди кӏурза. Узу ахмакьуриси йиз тяриф апӏидиза. 18Гьаму дюнʼяйиъ гизафдари чпин тярифар апӏура, гьаддиз гъитай узухьдира йиз тяриф апӏуз. 19Учву, гьаци фикирлуйир вуйидари, ахмакъар ичв арайиъ хушниинди гъитрачва! 20Учву, учву лукӏар апӏрудар ва учвʼинди яшамиш шлудар, учвхьан тадабгърудар, ичв зиин фурсар апӏрудар, ичв машнагъян йиврудар ичв багахь гъитрачва. 21Йиз начʼвалиан кӏураза, учвуз гьаци апӏуз гъабхьундарчухьан.

Дурари фтин вушра чпин тяриф апӏураш, узхьанра йиз тяриф апӏуз шулзухьан ва му, йиз «ахмакьвалси» гьисаб апӏуз шулучвхьан. 22Дурар жугьдар вуйин? Узура вуза. Израилин баяр? – узура, Ибригьимдин наслар? – узура! 23Дурар Месигьдин гъуллугънаъ айин? Мици гьерхуб ахмакьвал вушра, узу хъа гизаф Месигьдин гъуллугънаъ айир вуза! Узу артухъ гъилихунза, узу гагь-гагьнак дустгъариъ итуйзу, гагь-гагьнак урччвуйзу, аьжаликкан швнуб-сабан ккутӏурччвури гъахьунза. 24Жугьдарихьан хьуб ражари сумчӏурна урчӏвуб гъирмаж гъитӏунза, 25шубуб ражари римлуйири маргъарихьди гъурччвунзу, саб ражари гъванарин жварра уьлюбхюнзуин, шубуб ражари саб нуфт ккахьрайи гимйириккан ккутӏурччвунзу ва ярхи йигъди гьюлерин кьялаъ ади гъахьунза. 26Узу гьаммишан рякъяриъ аза, гьаммишан нирарин, гъачгъарин, жвуван миллетарин ва аллагьсузарин хатӏайикк ккахъразу; шагьрарин, чӏурарин, гьюлин, кучӏлин гъардшарин хатӏйирикк кказа. 27Узу, нивкӏ адарди, гашди, убхъруб адарди, хураг адарди, аьхълу аргъури, палат алдарди, жандихъан хътахъайиз лихури гъахьунза. 28Гьаму варибдилан артухъ, варишвариъ айи хъугърударин гъайгъу хяртӏахъ хъайиз. 29Гьарсар зяифурин язухъ зигури шулза, гьарсар гунгьиъ ахъру адмийин язухъшну кӏваз аьзият шулиз.

30Узуз йиз тяриф апӏруси гъабшиш, узу фтиъ зяифди вуш, гьаддин тяриф апӏидиза. 31Агъа Исайин Аллагь ва Адашдиз – гъит Дугъан ад гьаммишандиз ибшри! – узу кучӏал дарапӏрайивал аьгъя. 32– 33Арет паччагьди, Дамаскдин аьхюрди дерккнайири, узу дисбан бадали, шагьур уликк уьбхюри гъахьну, аммаки узу жагваъди шагьрилан илбицнайи цалиъ айи урхъʼансина ирхнийзу, ва дугъан хилккан ккутӏурччвнийза.