2Cor 12 | TabIBTNT | STEP | Узу йиз тяриф апӏуз, гьеле дидкан айи хайир адаршра, буржлу духьназу. Агъайи улупубдихьинди, ачухъ гъапӏубдихьинди илтӏикӏидиза.

‏ 2 Corinthians 12

Павелиин улубкьуб

1 Узу йиз тяриф апӏуз, гьеле дидкан айи хайир адаршра, буржлу духьназу. Агъайи улупубдихьинди, ачухъ гъапӏубдихьинди илтӏикӏидиза. 2 Узуз сар хъугъру кас аьгъязуз, йицӏиюкьуд йис мидиз улихьна, чан бедендиъди вуш, ясана беден хътарди вуш, аьгъдарзуз, Аллагьдиз ужуйи аьгъя, думу, дидисну, шубубпи завʼина гъурхну. 3 – 4 Думу адми, чан бедендиъди вуш, ясана беден хътарди вуш, аьгъдарзуз, Аллагьдиз ужуйи аьгъя, женнетдиз гъахбакан ва душваъ дугъаз пуз даршлударстар гафар ерхьбакан аьгъязуз. Думу гафар ктитуз ихтияр айидар дар. 5 Гьацир адмийиинди тяриф апӏуз шулзухьан, хъа жвуван тяриф, жвуван зяиф терефарилан гъайри апӏидарза. 6 Гьеле узуз тяриф апӏуз ккун гъабхьнийишра, думу фагьумлу ляхин шуйи, гьаз гъапиш узу гьякьтӏан пидарза. Хъа узу, узу дяркъну вая йиз гафар деерхьну, дугъу учв заанди улупура, кӏури, сарира фикир дарапӏбан бадали, дици апӏидарза.

7 Гьациб зурба сир узухьна гъурубкьган, узуз узу заанди дярякъюз, йиз жандиъ аьзаб тувуз галам, иблисдин малайик, ивна. 8 Шубуб ражари Агъайиз узу дидхьан азад апӏин гъапунза. 9 Хъа Дугъу гъапунзуз: «Йиз ужʼвал увуз чӏяаьн ибшри, фицики Йиз кьувват зяифвалилан ужуйи гъюру». Гьаддиз, узуъ Месигьдин кьувват хьуз, шадди йиз зяифвалин тяриф апӏури шулза. 10 Гьаддиз узу зяифди вуйиган, гиран ктапӏруган, гьубкӏну фукӏа адруган, хъергруган, читинвалариъ итруган, Месигь бадали разиди гъузраза, гьаз гъапиш йиз зяифвалиъ кьувватлу вуза.

11 Узу бегьемди ахмакь духьназа, амма узкан гьаци гъапӏдар учву вучва. Йиз тярифар учву дапӏну ккундийи, фицики узу гьадму «заан вакилар вуча» кӏурайидартӏан, гьич сабдииндира асккан дайза. 12 Учвуз Месигьдин гьякь вакил жара апӏру лишнар улупначвуз: аьхю сабур, аьжайиб лишнар, аьламатар ва кьудратлу ляхнар. 13 Жара йишвариъ хъугърудариз, учвʼлан гъайри, узхьан гьациб фу гъурубкьну? Дициб фукӏа адар, сабдилан гъайри: узу учвʼин алалахъувал. Гьаму йиз тахсирналан хил алдабгъай!

14 Учвухьна шубубпи ражарира гъюз ккунди азуз, амма ичв кӏулʼин гъагъ хьидарза. Узуз ккуниб, учвуз айиб ваъ, хъа учву вузуз! Абйир-бабар веледари ацӏруб дар, хъа абйир-бабари – веледар. 15 Вари узуз айиб шадвалиинди, гьеле жвувра кмиди учву бадали учвуз харж апӏуз кказа. Узуз учву артухъ ккуниган, узу камди гьаз ккун апӏурачва?

16 Фици вушра узу ичв кӏулʼина гъагъ гъахьундарза, аммаки узу саб аьмлиинди учву алдатмиш гъапӏну, кӏурачва? 17 Белки, узу учвухьна гьау адмийирилантина учвхьан пул гъибисну шул? 18 Узу учвухьна сар гъардашра хъади Тит гьаунза. Белки, Титди учвхьан фукӏа гъибисну шул? Учу ич гъуллугъ учвухь сар рюгьнаъди ва саб метлеб ади гъапӏундайинхъа?

19 Учву ухдитӏан, учу ичв улихь ич тахсрар кжикурайидар ву, кӏури, фикир дапӏнашалчва. Ваъ! Учу, Иса Месигьдин терефкрари, Аллагьдин улихь кӏурача: йиз ккунидар, учу апӏурайиб вари ичв мюгькамвализ вуйич. 20 Узу учвухьна гъафиш, учву узуз ккуниси дярякъюр кӏури, гучӏ кайиз ва гьадмуган учвухъди вуйи йиз ляхнар учвуз ккуниси ваъ, хъа жараси хьиди. Ичв арайиъ узуз гьюжатар, бахилвал, хъял, гъярхьувалар, кӏучӏлар, футнийир, къуру дамагъар, къайдасузвал рябкъюр, кӏури, гучӏ кайиз. 21 Узу учвухьна хъана гъафиш, Аллагьди узу асккан апӏур, кӏури, гучӏуразуз ва чпин намус адрувалилантина, кьяппавалилантина, хилʼан адахънайивалилантина гунагь дапӏну, чпин гунгьариин швумал дархьи гизафдарихъанди ишлар апӏуб алабхъидизуз.