2 Corinthians 13
ЦӀийи гюрюшмишназ гьязур йихьай
1Учвухьна шубубпи ражари гъюраза. «Тахсир кипруган, кьюр вая шубур шагьид ади ккунду». 2Узу кьюбпи ражари учвухь хьайиган, учвуз улихьмиди гъапнийза, хъа гьамус, учвхьан ярхла айири, мугагьназ гунгьар гъапӏдариз варидариз кӏураза: гьаму ражари ичв язухъ зигидарза. 3Учвуз Месигьди йиз мелзниинди гафар апӏури аш, адарш, аьгъю апӏуз ккунди анчвуз? Дугъан кьувват зяиф дубхьнадар, Дугъу думу ичв арайиъ улупура! 4Гьеле Месигь зяифди айиган хачрак карснийишра, Думу Аллагьдин кьудратниинди чӏивиди а! Учура Дугъахъди саб вуди зяифдар вуча, аммаки ичв гъуллугънаъ хьпан бадали Аллагьдин кьудратниинди Гьадгъахъди яшамишра хьидича. 5Учвуъ хъугъувал имиш лигай; жвув ахтармиш апӏури гъузай. Ясана учвуъ Иса Месигь айибдикан аьгъдарди айчвуз, икибаштӏан, учву эгер вари аьгь апӏури гъашиш? 6Хъа учкан улхуруш, йиз умуд кайиз, учвуз рябкъюр, кӏури, учу фужар духьну ккундийиш, гьадрар вуча. 7Учву писвал дарапӏуз Аллагьдиз ккарагурача. Учу фужар духьну ккундуш, гьацдар хьузди, му ляхнар учвуз улупуз апӏурайиб дарич, хъа, учу фужар духьну ккундуш, гьацдар вуди учвуз гъяркъюндаршра, учву гьякьвалиинди ичв ляхнар апӏбан бадали, апӏурайиб вуйич. 8Гьякьвал гъибтну, учхьан фукӏара апӏуз шулдарчухьан, хъа апӏруб вари гьякьвал бадали вуйич. 9Эгер учву дугъриданра кьувватлу шулуш, учу зяиф хьуз шад вуча. Ва учву гьуркӏдар хьузди ккарагурача. 10Гьаму ражари узу ярхлаан, учвухьна гъафиган, учвухъди ижми дархьуз бикӏураза. Агъайи, пуч апӏуз ваъ, яратмиш апӏуз, гьюкум тувназуз. 11Гъардшар, кӏуразачвуз: шадвал хъапӏай, уьмриъ улихь гъарахай, чиб-чпик юкӏв капӏай, гъит ичв арайиъ сабвал ибшри, мясляаьтниинди яшамиш йихьай, ва Аллагь, масанвалинна мясляаьтнан Булагъ, учвухъди хьиди.Баркаллагь кӏуругандин саламар
12Чиб-чпиз салам, гирамивалин мак апӏури, тувай. Мушваъ яшамиш шулайи Аллагьдин вари гирами халкьди учвуз саламар хътаура. 13Агъа Иса Месигьдин ужʼвал, Аллагьдин масанвал ва Гирами Рюгьнахъди вуйи гаф-чӏал, гъит, учвухъ варидарихъ хъади ибшри.
Copyright information for
TabIBTNT