2Cor 5 | TabIBTNT | STEP | Учуз, жилин уьмрин паж терг гъапӏиган, аьршариъ гьаргандин хал – адмийирин хилари ваъ, хъа Аллагьди арайиз хру хал ккилибгурайиб аьгъячуз.

‏ 2 Corinthians 5

Хъугъувалин табшуругъарихъди яшамиш йихьай

1 Учуз, жилин уьмрин паж терг гъапӏиган, аьршариъ гьаргандин хал – адмийирин хилари ваъ, хъа Аллагьди арайиз хру хал ккилибгурайиб аьгъячуз. 2 Сабан, ухьу гьамушвʼин илмиди, ухьу аьршарин гьадму палтар фила алахьуйкӏан кӏури, гъагъи угьтар алдахьури, ккилигурайидар вухьа! 3 Думу палтар алахьган, ухьу гъяцӏалди гъузидархьа. 4 Хъа сабан ухьу, ихь гьаму жилин пажакк ккимиди, гъагъи угьтар алдахьури гъуздихьа. Ухьуз читинди вухьуз, гьаз гъапиш ухьуз гъяцӏалди гъузуз ккундархьуз, аьжал хъайиб вари уьмри хътӏюбкьбан бадали, палтар алахьуз ккундухьуз. 5 Гьаци апӏбан бадали Аллагьди ухьу халкь дапӏна. Дугъу Чан гаф тамам апӏрувалин лишан вуди ухьуз Чан Рюгь тувнахьуз.

6 Гьаддиз, гьеле сабан ухьу жвуван хулаъси бедендиъди Агъайихьан ярхлади ашра, архаин вухьа, 7 фицики ухьу улариз рябкъюри ваъ, хъа хъугъну яшамиш шулахьа. 8 Гьаци вуйивал аьгъяди, архаин вуча ва, жвуван беден дипну, Агъайихьна гъягъюз ккундийчуз. 9 Гьаддиз ич метлеб, учу бедендиъ ашра – адаршра, Агъайиз ккуниб апӏуб вуйич. 10 Фицики Месигьдин Суддиз гъюб ухьуз варидариз алабхъиди ва бедендиъ имиди ухьу гъапӏу гъяни ва пис ляхнариз дилигну, гьаруриз рубкьруб тувди.

11 Гьаддиз лигну, Агъайихьан гучӏурачуз ва думу гучӏ жарадаризра улупурача. Учу фужар вуш Аллагьдиз ужуйи аьгъя. Ичв намусназра учу фужар вуш, гьаци ужуйи аьгъя, кӏури, хиял вуйиз. 12 Учу ичв улихь ич тяриф апӏури хъана таниш шуладарча, хъа учвхьан, айтӏанубдикан дарди, зиъланубдикан тяриф апӏрударин улихь, саб гучӏ адарди, учкан тяриф апӏуз шулучвхьан. 13 Шли учу фикрихъан душна, кӏураш, Аллагь бадали гьаци духьнача. Хъа эгер учу ужуйи фикир апӏураш, мици учву бадали апӏурача. 14 Месигьдин масанвали гьяракатнак китнайидар вуча, варидарихъанди Месигь гъакӏнуш, гунгьар дарапӏуз вари дийихнайивалин саб шак адарич. 15 Думу варидарихъанди, гьамус яшамиш шулайидар чпи бадали ваъ, хъа чпихъанди жан Тувур ва чӏиви Гъахьир бадали яшамиш хьуз, гъакӏну.

16 Гьаци вуйиган, сарун учу адмийин фагьмиинди саризра лигури имдарча. Мугагьназ Месигьдиз гьаци лигуйча, сарун – ваъ. 17 Гьаддиз, Месигьдик кидикьнайир, цӏийиди бабкан духьнайир ву. Йирсивал имдар, цӏийиб дуфна! 18 Хъа му вари Месигьдиланмина учу Чахъди албагу Аллагьдихьан ву, ва имбударра Чахъди албагбан гъуллугъ Дугъу учуз тувна. 19 Яни Аллагьди, Месигьдиланмина Чаинди вари дюнʼя чпи гъапӏу гунгьариз дилигди, албагну. Ари гьаму албагбакан Хабар дебкк дупначуз. 20 Гьаддиз лигну учу Месигьди кадагъну гьаънайидар вуча, фицики учлантина Аллагь адмийирихъди улхура. Гьаддиз Месигьдин ччвурнахъан миннат апӏурача: Аллагьдихъди албагай! 21 Гунагь ктру Месигь Аллагьди ихь гунгьарихъанди гъурбан гъапӏну. Аллагьди гьаци, Чан улихь ухьу, Месигьдихъди саб духьну, гьякь хьуз кӏури, гъапӏну.