2 Corinthians 6
Уьрхюз шлувалин вахт дуфна
1Аллагьдин гъуллугъчйири, учу, учвкан ккун апӏурача: учвуз багъиш дапӏнайи Аллагьдин ужʼвал, гьавайиб дарибшри. 2Дугъу гьамци кӏура, аьхир: «Ужуб вахтна Узуз яв дих гъеебхьунзуз,ва уьрхру йигъан Узу увуз кюмек гъапӏунза».
Лигай, гьаму вахт ужуб вахт ву, гъийин йигъ уьрхру йигъ ву! 3Учу, ич гъуллугънаъ тягьна шлуси, шлиз-вуш лик хъипрадарча. 4Учу Аллагьдин гъуллугъчйир вуйивал варибдиъ улупурача: зурба сабурнаъ, бедбахтвалиъ, фукӏа гьубкӏну адрувалиъ, читинвалиъ, 5учу урччвруган, дустгъариъ итруган вая гъалабулугъариъ учʼин жарадар алаъруган, гъагъи ляхнариъ, йишвну нивкӏ адрувалиъ, гашʼвалиъ, 6марццивалиъ, аьгъювалариъ, гъюдливалиъ, ужʼвал апӏбаъ, Гирами Рюгьнан хиликк хьувалиъ ва кӏваантӏан вуйи ккунивалиъ, 7гьякь гафнаъ, Аллагьдин кьувватнаъ, гьякьвалин яракь гагул ва арччул хилиъ, 8ич аднаъ ва беябурвалиъ ккунивалинси даккнивалинра тягьнийириъ. Учкан кучӏляхяр кадаъна, хъа дугъри вуча. 9Учу саризра аьгъдрударси гьисаб апӏура, хъа варидариз учу аьгъя. Учу дийихна, кӏури, гьисаб апӏура, хъа чӏивиди ача. Учуз жазйир гьадатӏури шулу, хъа йивну дийихнадар. 10Учу дердерикк ккитри шулу, хъа гьарган шадди вуча. Касибди вуча, хъа гизафдар девлетлу апӏурача. Фукӏа адарчуз, хъа вари хилиъ айич. 11Коринф агьлар, учу учвуз варибдикан ачухъди гъапунча. Учу ичв улихь юкӏвар арццунча. 12Учуз учву гьаци ккундучузки, хъа учву учу ккун апӏурадарчва. 13Узу учвуз йиз гъахи веледаризси кӏураза: учву учуз ичв юкӏварра арццай! 14Хътругърударихъди саб юрккгъиъ кӏул мииванай. Гьякьлувална нягьякьвал сатӏи шулин? Аквна мучӏушин сатӏи шулин? 15Месигьдин Велиарихъди (иблисдин ччвур) аьлакьа хьуз мумкин вуйин? Ясана хъугърурна хътругърур саб шулин? 16Аллагьдин хална идолар саб вуйин? Ухьу – чӏиви Аллагьдин хал вухьа, фицики Аллагьди ухькан гьамци гъапну: «Узу дураригъ яшамиш хьидиза,
Узу дурарин арайиъ лицидиза,
Узу дурарин Аллагь хьидиза,
хъа дурарикан Узуз халкь хьиди».
17«Гьаддиз дураригъян гъюдучӏвай
ва жара йихьай, – кӏура Агъайи, –
чиркинубдик мукучанай,
хъа Узу учву кьабул апӏидизачву».
18«Узкан ичв Адаш хьиди,
ва учвкан Йиз баярна шубар хьиди», –
кӏура вари Чан хилиъ айи Агъайи.
Copyright information for
TabIBTNT