2Cor 8 | TabIBTNT | STEP | Гъардшар, Македонияйиъ айи хъугърудариз Аллагьди фициб ужʼвал улупнуш, учвуз ктибтуз ккундучуз.

‏ 2 Corinthians 8

Аллагьдин терефкрарин ачухъ хил

1 Гъардшар, Македонияйиъ айи хъугърудариз Аллагьди фициб ужʼвал улупнуш, учвуз ктибтуз ккундучуз. 2 Дурар гъагъи гьялнаъ ади гъахьну, дурариз учӏвру касибвал, дарвал гъябкъну, амма дурарин шадвалина жумартвали вари читинвалар ккагъну. 3 Магьа узу шагьид: чпин хушниинди дурари удубкьру кюмек, гьеле чпихьан шлубтӏан артухъра кади, гъапӏнийи. 4 Дурари, Ерусалимдиъ айи Аллагьдин гирами халкьдиз кюмек апӏуз ихтияр тувуб учкан ижмиди ккун гъапӏнийи. 5 Дурари гьамкьан кюмек апӏур, кӏури, хиял дайич. Фицики дурар вари, сифтена сифте Агъайин хилиз бахш гъахьнийи, хъасин, Аллагьдин амриинди – ич. 6 Гьаддиз учу Титдикан, гъардшариз кюмек апӏури, чав ккебгъу гьадму ужуб ляхин учвухьра кӏулиз адабгъуб, тӏалаб гъапӏнийча. 7 Учвуз вари артухъра кади айивализ дилигну: хъугъувал, уччвуб гаф-чӏал, аьгъювалар, ляхнихъ юкӏв хъайивал, учвуз учу ккунивал – гьаму ужуб ляхниъ учву заан хасият улупну ккундийчуз.

8 Му буйругъ вуди кӏурадарзачвуз, хъа имбудари юкӏв хъипну улупру гьяракатнакан кӏури гъабшиш, гьадму ляхнилантина узуз ичв дугъри ккунивал ахтармиш апӏуз ккундузуз. 9 Ихь Агъа Иса Месигьдин ужʼвал аьгъячвуз. Думу, Учв девлетлу вуйи, хъа Чан касибвалиланзина учву девлетлу хьуз кӏури, касиб гъахьну.

10 Гьаддиз дилигну, ичв хайирназ саб насигьят тувуз ккундузуз. Гъубшу йисан сарпидарди вуди учву ужуб ляхин ккебгъунчва, ва сифте гьадму фикирназ гъабхидарра учву вучва. 11 Учву думу ляхин сифте ккебгънамиди фициб аьшкьниинди ккебгънуш, гьациб аьшкьниинди ккудубкӏузра ккудубкӏай. Учвхьан шлу кьадарниинди тувай! 12 Эгер учвуъ аьшкь аш, адрубдиз ваъ, хъа ичв айибдиз дилигну, тувну ккунду.

13 Мушваъ улхуб вари гъагъар учвʼин иличну жарадарин гьял ужу апӏбакан дар, хъа вари сабси хьуваликан. 14 Гьаму ражари, учвуз артухъ вуйиб адрудариз тувну, гьудрубкӏрайиб гъубкӏуз шулучвхьан, хъасин, учвуз адарди дурариз артухъ айиган, дурари учвуз адруб тувдичвуз. Гьамциб жюрейиинди вари сабси хьиди, 15 Гирами китабариъ дупнайиси: «Гизаф уч гъапӏуриз артухъ адайи,
ва цӏиб гъабхьириз гьудрубкӏруб адайи».

16 Учу ичв гъайгъушнаъ фициб жюрейиинди аш, гьаци хьуб Титдин кӏваъра иву Аллагьдиз чухсагъул. 17 Тит, учу тӏалаб гъапӏнушра, чан хушниинди, учв улихь гьучӏвну, учвухьна гъюрайир ву. 18 Дугъахъди Ужувлан хабарнан ужур гъуллугъчиси варишвариъ айи хъугърудариз аьгъю сарсана гъардаш гьаърача. 19 Мидланра гъайри думу кас варишвариъ айи хъугърудари, учу ич хушниинди Агъайин ад бадали апӏурайи гьадму ужуб ляхниъ кюмекчиди ктагъур ву. 20 Учу, хъугънайидари, гьамкьан уч дапӏнайи аьхю пулар дюз дарди харж апӏурачва, кӏури, гьич сарихьанра учуз тягьна йивуз даршлуси, ихтиятди ача. 21 Учу, неинки Аллагьдин, хъа гьацира адмийирин улихьра, гьич саб тахсир ктарди ляхин апӏурача.

22 Учу учвухьна гизаф ляхнариъ гизаф ражари кӏубанвал улупу сарсана ич гъардаш гьаърача. Гьамус дугъак хъа гизаф юкӏв ка, гьаз гъапиш дугъан учвʼин лап ижми хъугъвал ал. 23 Титдикан кӏури гъабшиш, учвуз вуйи кюмекнан вари ляхнариъ ва рякъяриъ думу йиз юлдаш вуйиз, хъа имбу кьюр гъардшикан кӏури гъабшиш, дурар хъугърударин жямяаьтари гьаънайидар ва Месигьдин ад за апӏурайидар ву. 24 Гьаддиз, хъугърударин жямяаьтариз учу учвʼин дав дамахлу даруб рябкъбан бадали, учвуз дурар багьа вуйиб дурариз улупай.