2Cor 9 | TabIBTNT | STEP | Дугъри гъапиш, учу, Ерусалимдиъ айи Аллагьдин гирами касариз вуйи кюмекнакан учвуз бикӏубра рубкьурдар.

‏ 2 Corinthians 9

Месигьдихъ хъугърайи гъардшариз кюмек апӏури гъузай

1 Дугъри гъапиш, учу, Ерусалимдиъ айи Аллагьдин гирами касариз вуйи кюмекнакан учвуз бикӏубра рубкьурдар. 2 Дурариз кюмек апӏуз ичв ижмиди юкӏв хъайиваликан аьгъязуз. Македонияйин хъугърударин улихь ичв тярифарра гъапӏунза. Узу дурариз учву Ахаяйиъ кюмек апӏуз гьеле гъубшу йисʼанмина гьязурди айиваликан гъапунза ва ичв юкӏв хъайивали дурарикра гьяракат кипнийи. 3 Узу учвухьна гъардшар гьаъраза, амма узу ичв тярифар дапӏну, арайиъ ляхин адарди дарибшригьа. Узу учвуз, вари гьязур дапӏнади ибшри, улихьмиди гъапунзачвуз, 4 нагагь Македонияйин агьлар узухъди гъафиш, дурариз учву гьязурди адарди дярябкъригьа. Дарди гъабшиш, учу ичв гьамкьан тярифар дапӏну, дурарин улихь, гьеле учвкан улхурикьан адарза, хъа ич машар уьру даришри. 5 Гьаддиз узу, гъардшар, учву гаф тувнайиси, багъиш уч дапӏну, гьязурди гъибтбан бадали, учвухьна улихьмиди душну ккунивалин, гъавриъ аунза. Гьадмуган, му ляхин, учву алаъну апӏурайивал ваъ, хъа ичв хушниинди апӏурайивал, рябкъиди.

6 КӀваинди гъибтай: кьискьисди убзрури, гьаци ккадабцӏидира ву, булди убзрури булди ккадабцӏиди. 7 Гъит гьар касди, гьяйифсузди ва гужа-гуж дарди, чан кӏваъ айибкьан туври, гьаз гъапиш Аллагьдиз шадди туврур ккунду. 8 Аллагьдихьан вари учвуз лазим вуйиб гьаммишан артухъра кади хьпан бадали ва вари гъяни ляхнаризра гьубкӏну шлуси, фу вушра тувуз шулу, 9 дибикӏнадарин: «Дугъу чан девлет юкьуб тереф касибариз пай гъапӏнийи,
дугъан гьякьвал гьаргандиз гъубзруб ву».

10 Убзруриз тум Туврури, ипӏуз уьл Туврури учву гъубзуб зарб апӏиди ва ичв гьякьвалин бегьер артухъ апӏиди. 11 Учву варибдихьди гьаци девлетлу хьидичваки, гьяйиф дарди, гьарган адмийириз кюмекар апӏуз хьибдичвухьан, ва учву, гьяйиф дарди, учлан чпиз гъапӏу багъишарилантина дурари Аллагьдизра чухсагъул пиди.

12 Му учву апӏурайи гъуллугъну Аллагьдин гирами халкьдиз неинки кюмек тувди, хъа гьацира Аллагьдихьна вуйи ккунивал артухъ-артухъ хьуз гъибтди. 13 Ва ичв гьаму гъуллугънан бегьер рябкъюри, учвлантина адмийири Аллагьдин ад апӏиди, гьаз гъапиш учву рабгъурайи Месигьдин Ужувлан хабарнакк кӏул ккиврачва ва учвуз айибдикан шадди дураризра, имбударизра туврачва. 14 Учвуз Аллагьди тувнайи кьадар адру ужʼвалилантина дурар учвхъандира ккарагиди ва учвуз багахь хьиди. 15 Аллагьдиз, Чан ктибтуз даршлу багъишназ дилигну, чухсагъул!