2 Thessalonians 1
1Павелихьан, Силвандихьан ва Тимофейихьан – Фессалоникдиъ айи Адаш Аллагьдин ва Агъа Иса Месигьдин хъугърудариз. 2Ужʼвал ва мясляаьт ибшричвуз Аллагьдихьан, ихь Адашдихьан ва Агъа Иса Месигьдихьан! 3Вари учвуз гъапӏубдиз учу гьаммишан Аллагьдиз баркаллагь дупну ккунду, гъардшар. Му гьякь ву, гьаз гъапиш ичв хъугъувал кьадар адрубкьан аьхю шула ва учвкан гьарсари вари ккун апӏурайи ва чиб-чпи ккун апӏурайи масанвал айибтӏан артухъ шула. 4Гьаддиз Аллагьдин жара хъугърудариз, учву вари гьаму хъергувалариъна аьзабариъ аьгь апӏури арайиз хурайи ва мюгькам апӏурайи хъугъувал улупури, ичв тярифар апӏури шулча.Аллагьдин суддикан
5Варибди Аллагьдин Суддин дюзваликан шагьидвал апӏура ва учвура Аллагьдин Паччагьлугъдиз лайикь хьиди, гьадму бадали учву аьзабарра аьгь гъапӏунчва. 6Учвʼин аьзабар илирчу тахсиркрариз Аллагьди бедбахтвалар тувди – мура гьякь ву. 7Учву гьаму ражари аьзабариъ ачва, хъа Агъа Иса аьршариан цӏиъди Чан зурба гьунар кайи малайикарра хъади гъафи гьадму Йигъан, учухъди сатӏиди учвузра рягьятвал тувди. 8Аллагь кьабул дарапӏдариз ва Ихь Агъа Исайикан вуйи Ужувлан хабарназ мютӏюгъ дархьидариз жаза хибди. 9– 10Дурариз гьадабтӏру жаза гьаргандин аьжал хьибди: Иса Чан адмийирин арайиъ адлу хьпан бадали ва Чахъ хъугъдарин арайиъ за хьпан бадали гъафиган, Дугъан аднан ва кьувватнан нурнахьан, Агъайин багхьан гьацдар ярхла апӏиди. Исайин адмийирин арайиъ учвура хьидичва, гьаз гъапиш учву ич шагьидвалихъ хъугъунчва. 11Гьаддиз Аллагьди Чан дих апӏбаз учву лайикь хьпан бадали ва Чан кьувватниинди вари ичв ужудар ниятар ва хъугъувалин ляхнар тамам апӏбан бадали, учу учвхъанди гьаммишан ккарагурира шулча. 12Гьадмуган, учву кюмек духьну, ихь Агъа Исайин ччвур адлу хьибди, хъа ихь Аллагьдин ужувлиинди ва Агъа Иса Месигьдиинди Дугъу учву адлу апӏиди.
Copyright information for
TabIBTNT