2Th 2 | TabIBTNT | STEP

‏ 2 Thessalonians 2

Агъа гъяйиз гизаф писвал хьибди

1 – 2 Хъа гьамус ихь Агъа Иса Месигь кьяляхъ гъюбкан ва Дугъу ухьу фици сатӏи апӏуруш гьаддикан. Учу учвкан, гъардшар, ичв кӏулар дудругуб, ва, я пайгъамбарваларихьан, я ачмиш апӏуваларихьан, я кагъзарихьан, гъеле думу кагъзар учхьан вуйидар ву кӏури, эгер дурариъ Агъайин Йигъ сарун гъабхьну кӏури дибикӏну ади гъабшишра, улдудугувалиъ адрахъуб ккун апӏурача. 3 Гьич сарихьдира учву алдатмиш апӏуз мигъитанай – гьич саб жюрейииндира. Гьаз гъапиш, сифте, Аллагьдиз къаршуди, зурба вуйи гъедергувалар арайиз дуфну ккунду, писвал арайиз адмийиинди удубчӏвиди (думу адми, аьжализ кадатӏнайир ву), 4 къаршур, аллагьдинубдик вая гирами вуйибдик гъилигган, учв варитӏан зина вуза, кӏури, гьисаб апӏури хьиди, гьаци, гьеле думу Аллагьдин хулаъра кмиди деъди ва дугъу Аллагь учв вуза пиди.

5 Ичв кӏваин илмидарничв? Узу мидкан учвуз, учвухь хьайиган, гъапнийза аьхир. 6 Гьамус учвуз аьгъячвуз, гьаз думу къаршу вуйир чан вахт гъяйиз дерккнаш. 7 Фицики писвалин жини кьувватари чпин ляхин гьамустӏанра гъабхура, хъа сабан думу къаршу вуйириз рякъ гьадабтӏнайир дугъан рякъʼан удучӏвну ккунду. 8 Хъа гьадмуган думу душман ачухъ хьиди, хъа Агъа Исайи Учв гъафи гьадму Йигъан, гьеле Чан ил хътабгъбан адлувалин нурниинди думу тӏанкь апӏиди. 9 Писур гъювал Шейтӏнин хиларин ляхин ву. Думу писвал гьубкьу жюрейин аьламатар ва гъавриъ ахъуз даршлу кучӏлин лишнар улупбариинди 10 ва гьацира гьар жюрейин пис аьмалдарвалариинди арайиз удубчӏвиди. Дугъахъди аьжализ гъягърудар хьиди, гьаз гъапиш дурари гьякьвалихьна вуйи масанвал тина гъапӏнийи, хъа гьаддиинди дурарихьан чпи уьрхюз шуйи, аьхир. 11 – 12 Ва гьаддиз Аллагьди дурар, гьякьвалихъ хътругъди, писвал ктабгъдар, кучӏларихъ хъугъбан бадали ва гьациб жюрейиинди жаза адабтӏну гъитуз, кучӏлин гьюкмиъ итра.

Учву уьрхбан бадали кадагънайидар ву

13 Учвхъан, гъардшар, гьаммишан учу Аллагьдиз баркаллагь пуб рубкьура, Агъайин ккунидар! Фицики, учву марцц апӏурайи ва ичв хъугъувал гьякьвализ илтӏикӏурайи Гирами Рюгьнан кюмекниинди Аллагьди, учвуз сифте уьрхювал хьпан бадали, Дугъу учву ктагъну. 14 Гьаддиз Дугъу учвуз, ихь Агъа Иса Месигьдин адлувал пай апӏбан бадали, учу гъабхи Ужувлан хабарниинди дих гъапӏну!

15 Гьаци мюгькамди дийигъну гъузай, гъардшар! Учу учвуз ушвналан ва кагъзариинди улупу аьгъюваларихъан ижмиди хъичӏихну гъузай, 16 ва гъит ухьу ккун гъапӏу, ва Чан ужувлиинди ухьуз зат ккудудубкӏру ккарцувал ва ужувлан умуд багъиш гъапӏу Чав, Агъа Иса Месигьди, ва Аллагьди, ихь Адашди, 17 ичв юкӏвариъ ккарцувал тӏапӏри ва гьарсаб ужувлан ляхниз ва гафназ мюгькам апӏри.