2Th 3 | TabIBTNT | STEP | Ва аьхириъ, учу бадали ккарагай! Гъит, Агъайин Гаф зарбди улихь гъарабхри ва аьхю гьюрматниинди, Думу учву кьабул гъапӏиганси, имбударира кьабул апӏруси ибшри.

‏ 2 Thessalonians 3

Учу бадали ккарагай

1 Ва аьхириъ, учу бадали ккарагай! Гъит, Агъайин Гаф зарбди улихь гъарабхри ва аьхю гьюрматниинди, Думу учву кьабул гъапӏиганси, имбударира кьабул апӏруси ибшри. 2 Хъана ккарагай, Аллагьди учу лайикь дару ва чӏуру адмийириккан ккадаъри, кӏури, фицики варидариъ хъугъувал адар, аьхир! 3 Хъа Агъа Чав кӏурубдиин Алир ву, ва Гьадгъу учву мюгькам апӏиди ва писурихьан уьрхиди. 4 Учу учвуз ктиту Агъайин тӏалабар гьамусдиз тамам апӏури гъахьиганси, гьамусдихъантина тамам апӏрубдихъ ижмиди хъугърача. 5 Гъит ичв юкӏвар Агъайи Аллагьдин масанвалихьна ва Месигьдин мюгькамвалихьна илтӏикӏри!

Фарз – зегьмет зигуб

6 Гъардшар, ихь Агъа Иса Месигьдин ччвурнахъан тӏалаб апӏурачачвукан: чаз ккуниб апӏури яшамиш шулайи гъардшихьан ва учу учвуз туву насигьятарихъди даршулайи гьарурихьан ярхла йихьай. 7 Фицики учвуз аьгъячвуз, фици учхъан мисал гъадабгъну ккундуш. Гьаз гъапиш учу учвухь ляхин дарди гъахьундарча, 8 учвʼин гьич сариинкьан гъагъ илдрипбан бадали, гьич саринра давди уьлин кьацӏ гъипӏундайча; йишв-йигъ, кьувватар гьяйиф дарапӏди, лихури гъахьунча. 9 Учу гьаци, учуз ихтияр адруган, гъапӏуб дайи, хъа учву учхъан мисал гъадабгъбан бадали гъапӏуб вуйич. 10 Гьеле учу учвухь хьайи вахтна учу учвуз магьа гьамциб къайда гъибтунча: «ляхин апӏуз даккнири ипӏузра дирипӏри!» 11 Хъа гьамус учуз, учвухь лихуз даккнидар а, ляхин апӏуз даккунди, уьргъну, жарадарин ляхнаригъ гъючӏврайидар а, кӏури, ебхьурачуз. 12 Гьадму адмийирикан учу, архаинди лихуб ва жвуван хилариинди гъазанмиш гъапӏу уьл ипӏуб тӏалаб апӏурача ва Агъа Иса Месигьдин ччвурнахъан дих апӏурача.

13 Хъа учву, гъардшар, ужʼвал апӏбаъ меэрганай. 14 Хъа фуж учу гьаму кагъзиъ бикӏурайибдихъ хъпебехъиш, думу фикирназ гъадагъай, ва дугъахъди гаф-чӏал мапӏанай, гъит дугъаз нач ибшри! 15 Дугъахъди, душмнихъдиси, махьанай, хъа, гъардшизси, гъавриъ шлу гафар йипай!

16 Гъит Чав Агъайи, мясляаьтнан булагъди, гьарган ва гьубкьу жюрейиинди учвуз мясляаьт туври. Гъит учвухъди варидарихъди Агъа ишри!

17 Павелихьан саламар – му узу йиз хилариинди бикӏураза, узу гьарсаб йиз кагъзик гьамци лишан капӏри шулза. 18 Гъит ихь Агъа Иса Месигьдин ужʼвал гьарган учвухъди варидарихъди хъади ибшри.