2Ti 1 | TabIBTNT | STEP | Аллагьди гаф тувнайи Месигь Исайиъди сатӏи вуйи уьмур рабгъуз Аллагьдин ниятниинди гьаънайи Месигь Исайин вакил Павелихьан

‏ 2 Timothy 1

1 Аллагьди гаф тувнайи Месигь Исайиъди сатӏи вуйи уьмур рабгъуз Аллагьдин ниятниинди гьаънайи Месигь Исайин вакил Павелихьан 2 йиз ккуни вуйи бай Тимофейиз – ужʼвал, рягьимлувал ва мясляаьт Адаш Аллагьдихьан ва ихь Агъа Месигь Исайихьан!

Баркаллагь пуб

3 Йиз абйириси марцци намусниинди узу гъуллугъ апӏурайи Аллагьдиз, гьарсаб йиз ккарагбаъ уву кӏваин апӏруган, баркаллагь кӏураза. Узу уву, ккарагури, зат сикин дарди, йигънура йишвнура уву кӏваин апӏураза. 4 Узхъанди уву удурзу нивгъар кӏваин илмийиз, ва уву дяркъну, юкӏв шадвали абцӏуз ккунди, ктисурадарзу. 5 Сифте яв баб Лоидайин, хъа яв дада Евникайин кӏваз гъафибсиб марцци яв хъугъувал кӏваин апӏураза. Му мициб хъугъувал увуз айивалин саб шак адарзуз. 6 Магьа гьамци, кӏваин апӏуразавуз: Аллагьди увуз тувнайи, ва узу хилар иливган, увуъ кабхьу гъуллугънан багъиш, чӏиви цӏа кади, убгури гъит. 7 Аллагьдин Рюгьну ухьуз гучӏ туврадар, хъа кьувват, масанвал ва сагъ фикир тувру.

8 Гьаддиз, ихь Агъайикан ктибтуз нач мапӏан, ва Гьадму бадали дустагъдиъ айи узхьан нач мапӏан, хъа узухъди Ужувлан хабар бадали, узʼин улукьнайи аьзабарин пай гъадабгъ. Фицики Аллагьди ухьуз Чан ужувлакан ктибтуз кӏури кьувват тувна. 9 Дугъу ухьу ихь ляхнариз лигну дюрхнадар ва Чан гирами вуйи дихниинди ухьуз дих дапӏнадар, хъа, Чан гьаци апӏуз ккайивалин кьувватназ ва Чан зурба вуйи ужувлаз дилигну гьаци дапӏна. Дугъу ухьуз, Месигь Исайиланмина думу багъиш, вахтар ккергъайиз улихьна дапӏнайи. 10 Гьамус, аьжал терг Гъапӏуриинди, Ужувлан хабарниинди дюнʼяйиз уьмур ва аьжалсузвал Гъабхуриинди, ухьу Уьрхрур – Месигь Иса гъюбʼинди думу багъиш рябкъюри гъабхьну. 11 Гьадму Ужувлан хабар ктибтру вакилди, аьгъювалар улупрурди ва мялимди Аллагьди узу дерккну! 12 Магьа гьамдиз дилигну, узу гьацдар аьзабар аьгь апӏураза. Хъа узуз начди дарзуз! Узуз узу Шлихъ хъугънаш, аьгъязуз. Дугъу узʼин илипнайи гьадму ляхин Аьхиримжи йигъ гъяйизкьан вари уьбхрувалик йиз гьич саб шакра кадариз.

13 Хъугъувал ади ва масанвал ади узкан увуз гъеерхьу дюз аьгъювалар увуз дарсар ишри. Дурар учуз Месигь Исайиъ гъидихъдар вучуз. 14 Яв хилиъ ивнайи вари ужуб ухьуъ яшамиш шулайи Гирами Рюгьнан кьувватниинди уьбх.

15 Асия уьлкейиъ, Гермогенна Фигелра кади, узхьан вари гьидицнайиваликан аьгъявуз.

16 Гъит Агъайи Чан рягьимлувал Онисефордин вари хуландариз улупри. Дугъу гагь-гагьнак йиз кӏваз архаинвал хури гъахьну ва узу йитӏнайи зунжрарихьан нач гъапӏундар! 17 Учв Римдиъ айиган, дугъу узу, дихъайизкьан, гизаф агури гъахьну. 18 Гъит, Агъайи дугъаз гьадму Йигъан Чан ужʼвал туври! Хъа дугъу узуз Эфесдиъ фукьан кюмек гъапӏнуш, варидаризтӏан увуз ужуйи аьгъявуз.