‏ 2 Timothy 2

Хъугъувал али Месигь Исайин адми

1Гьаци, йиз бай, Аллагьдин ужувлаан кьувват адабцӏ, думу ухьуз, Месигь Исайиъ сатӏи вуйиган, туврайиб ву. 2Увуз узкан гъеебхьуб гизаф адмийирин улихь жарадаризра гьаци улупуз удубкьру хъугъвал али касарин арайиъ кидибт. 3Месигь Исайин дугъри эскерси, яв пай аьзаб гъадабгъуз гьязурди гъуз. 4Гьич сар эскерра хулан ляхнарихъ шулдар – дугъан вазифа, чан аьхюри гъапиб апӏуб ву. 5Я гьич сар талитчийиз, талитнан къайдйир гъючӏюргъиш, пешкеш тувидар. 6Гьаци нежберра ву: амкӏ ккудубзури гъилиху дугъаз чан пай мягьсул сифте ражну дурубкьну ккунду. 7Узу гъапибдикан фикир апӏин – Агъайи варибдин гъавриъ ахъуз кюмек апӏидивуз.

8Давуддин тухмиан удучӏву, дукӏну чӏиви гъахьи Иса Месигь кӏваин апӏин. Узу рабгъурайи Хабарнан мяна гьаддиъ а. 9Гьадму Ужувлан хабар бадали узу балайикк ккахъназа, тахсиркарси, зунжрариъ аза. Хъа Аллагьдин Хабар зунжрариъ дибтӏуз шлуб дар! 10Гьаддиз узу, кадагънайидар бадали, Месигь Исайихъди сатӏи вуйидариз, гьаммишандин адлувалра хъади, чпиз уьрхювал рубкьбан бадали вари аьгь апӏураза.

11Гьаму гафар гьякь ву: эгер ухьу Дугъахъди гъийихнуш, Гьадгъахъди яшамишра хьидихьа.
12Эгер аьгь апӏураш, Дугъахъди паччагьвалра апӏидихьа.
Эгер ухьу Дугъхьан гьудучӏвиш, Думура ухьхьан гьудучӏвиди.
13Эгер ухьу дугъриди гъудрузиш, Думу дугъриди гъузди, фицики
Думу Учв Чахьан гьудучӏвидар!

Аллагьди кадагънайи гъуллугъчи

14Гьаму вариб адмийириз кӏваин апӏбаъ яваш ва инжик махьан. Аллагьдин улихь дурарикан гьюжаткарвал дебккуб ккун апӏин. Дурарихъ хъпехърудариз, аьжалихъна хувалтӏан, хайир адар. 15Аллагь увкан разиди гъитруси, диш рякъди гъярайи касси, гьич сабдихьанра нач даршлу гьякьвалин гаф деебтури, яв хилʼан удубкьруб вари апӏин. 16Хъа ичӏи ва аллагьсуз лягълягъярихьан гьудучӏв. Фицики дурари адмийир Аллагьдихьан ярхла апӏура. Чпин хътругърувалариъ дурарин хъуркьувалар артухъ хьиди. 17Дурарин каламарра, кубчӏвру аьзарси, даргъиди. Дицдарин арайиъ Филетна Гименейра ахьна. 18Дурар гьякь рякълан улдугна. Дурари, гъийихдар чӏиви духьна, кӏура. Гьамци кӏури, дурари сакьюдарин хъугъувал чӏюбгъюра. 19Хъа Аллагьди ккивнайи бин мюгькамди дийибгъна, ижмиб ву. Дидʼин гьамци кӏури, лишан алабсна: «Аллагьдиз Чандар аьгъя». Ва хъана: «Гьарсари, Агъайин ччвур бисрури, гьич чӏуруб дарапӏри!»

20Аьхю хулаъ, гъизилинна арсранси, гакӏвлинна ругдин гъабарра а. Гьюрматлуди ишлетмиш апӏру багьа гъабарра а, аьдатнан гьяжатназ – ужуз гъабарра. 21Вари чӏурубдихьан марцц гъахьир гьюрматлу гъаб хьиди: дицир кас гирами дапӏна; Эйсийи гьадму ишлетмиш апӏиди, думу гьаммишан гьарсаб ужувлан ляхниз гьязурди гъубзди.

22Жигьилвализ хас вуйи тямягьярихьан ярхла йихь ва, Агъайихьна марцци юкӏвариинди илтӏикӏрударихъди сабси, дюзвалихьна, хъугъувалихьна, масанвалихьна, мясляаьтнахьна варидарихъди гьачӏаркк. 23Ахмакъ ва абдал гьюжатарихьан ярхла йихь, увуз аьгъявуз: дицдар гьюжатар элегбариинди ккудукӏуру. 24Агъайин гъуллугъчийиз гьюжатаригъ гъючӏвуб лайикь дар. Думу варидариз гъюдлир ва ужур, аьгъювалар улупуз аьгъюр духьну ккунду. Чӏурувал кӏваъ гъибтну ккундар, 25жвуваз къаршу удучӏврур гъюдалди дюз алаъ. Белки Аллагьди дурариз гьякьʼвал аьгъю хьпан бадали чпи гъапӏубдиин швумал хьуз хъана мумкинвал тувур, 26дурарра хъиргди, ва, чан ниятназ мютӏюгъ дапӏну, иблисди йисирвализ гъадагънайи гьарсар азад хьиди.