2Ti 4 | TabIBTNT | STEP | Чӏивидаринна гъийихдарин суд апӏуз гъюру Месигь Исайин ва Аллагьдин улихь ккун апӏуразавукан (узу мици, Месигьдиз Паччагьлугъ айиган ва Думу багарихьди гъюрайир вуйиган, кӏураза):

‏ 2 Timothy 4

1 Чӏивидаринна гъийихдарин суд апӏуз гъюру Месигь Исайин ва Аллагьдин улихь ккун апӏуразавукан (узу мици, Месигьдиз Паччагьлугъ айиган ва Думу багарихьди гъюрайир вуйиган, кӏураза): 2 Аллагьдин гаф рабгъ, рягьят вуйи ва рягьят дару вахтнара ижмиди гъуз, гъалатӏар ктагъури апӏин, жинивалар ашкар апӏури гъуз, инсанарин рюгь за апӏин ва сабурлуди аьгъювалар тув. 3 Гьациб вахт гъибдики: гьякь аьгъювалар улупбахьан гьудучӏвиди ва, чпиз фу деебхьну ккундуш, гьаддихъ хъпехъуз тямягь ади, мялимар чпилан илтӏикӏуз гъитди. 4 Гьякьʼвализна дюзвализ чпин ибар гьеркну, дурар, махъварихъ хъпехъбан бадали, дурарихьан гьидициди.

5 Хъа уву варибдикан марцци саягъниинди фикир апӏин, гъагъивалар аьгь апӏуз дубгъ, яв ляхин апӏин – Ужувлан хабарнакан кидибт, яв гъуллугъ гьубкӏну тамам апӏури гъуз. 6 Хъа узкан хабар гъадабгъуруш, сарун йиз уьмур гъурбан апӏрушвʼина дубхнайиси алиб ву. Йиз гъягъру вахт ву сарун. 7 Узу ужуйи женг гъубхунза ва узуз улупнайи вари манзил ккадапӏунза, хъугъувал гъюбхюнза. 8 Гьамус узуз Агъайи, дюзвалин Судьяйи, гьадму Йигъан пешкеш тувди – узу гьякь апӏиди, неинки узу, хъа Думу хъадакну гъюру Йигъаз масанвалиинди ккилигурайи гьарсар гьякь апӏиди.

9 Узухьна ухди гъюз чарйир аг! 10 Фицики Демас узухъди гъузундар. Думу, чан юкӏв гьаму дюнʼяйиз тувну, Фессалоникдиз гъушну. Креск Галатияйиз гъушну, Тит – Далматияйиз. 11 Узухъди сар Лукатӏан хътар. Увухъди Маркра хъади гъач, гьаз гъапиш, дугъу узуз йиз гъуллугънаъ гизаф кюмек апӏури шулу. 12 Тихик узу Эфесдиз гьаунза. 13 Уву гъюруган, йиз валжагъра гъадабгъ – думу Троадайиъ айи Карпдихь гъубзниз, йиз китабарра гъадагъ, гизафси гъидкьиндар.

14 Рукьан уста Эскендери узуз гизаф чӏуруб гъапӏунзуз. Гъит, Агъайи дугъаз, чан ляхнариз лигну, туври! 15 Хъа уву дугъхьан ихтиятди гъуз, думу яманди ухьу тувру вари аьгъювалариз къаршу гъедергури гъахьну.

16 Суддиъ узуз йиз тереф уьбхюри улхуз сабпи ражну мумкинвал тувиган, кюмекназ сар касра гъафундайи, варидари узу гатӏахьну. Гъит му дурарин тахсир гьисаб дарапӏри! 17 Хъа йиз кьяляхъ Агъа дугъужвнайиз. Ари Гьадгъу узуз, узлантина Ужувлан хабарнакан жугьуд дарудариз ктибтбан бадали, варидариз ебхьуз гъитруси кьувват тувунзуз. Дугъу узу асландин кӏанччаригъян гъядягъну. 18 Агъайи узу гьарсаб чӏурубдиккан ккадаиди ва, Чан Аьршарин Паччагьлугъдиз гъахуз кӏури, уьрхиди. Гьадгъаз ибшри ад аьсрариан-аьсрариз! Амин.

19 Прискилайизна Акилайиз саламар йип, ва гьацира Анесифордин вари хуландариз. 20 Эраст Коринфдиъ гъузну. Трофим, иццру гъахьир, Милетдиъ гъитунза. 21 Кьюрд хьайиз гъюз чара апӏин! Увуз саламар хътаура Эвбули, Пудди, Линди, Клавдияйи ва вари гъардшари. 22 Гъит, яв рюгьнахъди ишри Агъа! Гъит, учвухъди Аллагьдин ужʼвал ибшри!