Col 2 | TabIBTNT | STEP | Узу учвхъанди, Лаодикияйин хъугърударихъанди ва узу чпин улариз рякъюзкьан дяряркъдарихъанди фициб ижми дяви гъабхураш, учвуз аьгъяди ккундузуз.

‏ Colossians 2

Месигьдихъди яшамиш йихьай

1 Узу учвхъанди, Лаодикияйин хъугърударихъанди ва узу чпин улариз рякъюзкьан дяряркъдарихъанди фициб ижми дяви гъабхураш, учвуз аьгъяди ккундузуз. 2 Йиз метлеб ичв юкӏвариъ масанвалин сатӏивал ва кӏубанвал тӏапӏуб вуйиз. Масанвалин сатӏивал ва кӏубанвал аш, учвуз Аллагьдин сир, яна Месигьдикан вуйи аьгъюваларин гьубкӏу девлет хьибдичвуз. 3 Хъа вари аькьюллувалин ва фагьмин девлетар Месигьдиъ а. 4 Узу учвуз му, гьич сарира уччву гафариинди учву ичв рякълан алдауз гъидритуз, кӏурайиб вуйиз. 5 Бедендиинди учвухъди хътаршра, рюгьниинди учвухъди хъаза ва, Месигьдихъди ичв албагувал ва хъугъувал узуз рябкъруган, шад шулуза.

6 Гьаци вуйиган, эгер учву Месигь Иса ичв Агъади кьабул гъапӏнуш, Гьадгъахъди сатӏиди яшамиш йихьай. 7 Гьадгъаъ ччивар деетай, жвуван уьмур Гьадгъахъди хъапӏай, учву айи хъугъвалиъ мюгькам йихьай ва учвуз гъапӏу ужувлан гъадри кади гъузай.

8 Лигайгьа, гьич сарира, Месигьдихьан ваъ, хъа адмийирин аьдатарихьан ва гьаму дюнʼяйин кьудратарихьан гъюру ичӏи ва кучӏлин фикрари учву чпин чулиинди дисуз мигъитанай. 9 Гьаз гъапиш вари Аллагьдин тамамвал Гьадгъаъ рябкъюри а. 10 Учвузра тамамвал гьякимарин ва гьюкмарин КӀул вуйи Гьадгъаъди дурубкьначвуз. 11 Гунагьнан хасият учвлан, палатси, уьлчӏюбгъю Месигьди ичв суннат Чаъ гъапӏну. Думу адмийин хилари апӏурайибсиб суннат дар. 12 Учву штуан хьувал учву Гьадгъахъди накьвдиъ иву мисал ву. Думу чӏиви гъапӏу Аллагьдин кьувватнахъ хъугъували Дугъахъди учвура чӏиви гъапӏунчву.

Адмийири дерккнайи къайдйирихъди мягъянай

13 Ухди учву, ичв гунгьариз ва суннат дапӏну адрувализ дилигну, дийихнайидар, Аллагьдин халкьдик кахьри адайчва. Хъа гьамус Аллагьди учву Гьадгъахъди уьмрихьна кьяляхъ хътаъну. Дугъу ихь вари тахсрарилан хил алдабгъну. 14 Дугъу ухьуз къаршу вуйи къайдйир кайи китаб, хачрак кьумарихьди кабсну, жвартӏ гъапӏну. 15 Гьамци Думу, гьякимарихьан гьюкум, яракь тадабгъну, варидарин улихь беябур дапӏну, дурариин Чан хачрахьди гъалиб гъахьну.

16 Гьаци вуйиган, гъит, гьич сарира учву ипӏрубдиз ва убхърубдиз тягьнийир дириври ва учвхьан, машкврар, ваз цӏийи алаувалар ва султ йигъар къайд апӏури гъахьунчва, кӏури, гьедрерхри. 17 Фицики му вари гъюз ккимбубдин гъарантутӏан дар, хъа улариз рябкъювал Месигь ву! 18 Мютӏюгълуди хьуз ккунидари, малайикариз икрам апӏрудари учвук тахсир кипруси мапӏанай. Дурар чпин гьугъужвувалариъ ахьна. Давди, чпин фагьмиин элеъну, фурс апӏура – думу гьаму дюнʼяйинуб ву! 19 Аллагьдин ниятниинди вари беден аьхю хьпан бадали, табар-дюгьберихьди думу либхуз ва сатӏи апӏуз гъитрайиб – КӀул ву. Сарун дицдар адмийирин КӀулихъди аьлакьа имдар.

20 Учву, Месигьдихъди дукӏнайидар, му дюнʼяйин кьудратарихьан азад вуйиган, дюнʼяйиндариси, гьамци кӏури, къайдйир гьаз уьрхюрачва: 21 «Мидик мукуркьан!», «Мунуб мипӏан!», «Гьамунубдик мукучан!» 22 Гьаму вари гъадагъа дапӏнайиб ишлетмиш апӏруган, жвартӏ шлу мутмйирикан къайдйирна аьдатар арайиз дуфнадарин? 23 Диндин аьдатариз мютӏюгъваликан, жвув гьадатӏуваликан, бедендиз ккуниб дарапӏуваликан кӏуру гьамцдар къайдйир, зиълан гъилигган, фагьумлударси рякъюру. Амма дурари бедендин тямягьариз къаршу дийигъуз кюмек апӏдар!