Colossians 4
Насигьятар
1Учвура, агъйир, лукӏарихъди дугъриди ва намуслуди гъузай. КӀваинди гъибтай, ичв Агъара завариин ал. 2Гьаммишан ккарагури йихьай, ккарагруган, кӏубанди йихьай ва чухсагъул кӏури йихьай! 3Гьацира, Аллагьди учуз Месигьдин сирнакан гаф рабгъбан урчӏар арццбан бадали, учхъанди ккарагай. Гьадму сир ктибтруган, узу зунжрариъ аза. 4Узуз дидкан аьгъювалар, узхьан удубкьрубкьан ужуди, ачухъди ва тамамди улупбан бадали, узхъанди ккарагай. 5Жарадарихъди фагьумлуди гъузай, гьубкьу жюрейин мумкинвал ишлетмиш апӏинай. 6Гъит, ичв сюгьбатар гьаммишан кабалгрудар ва фагьумлудар ишри ва, гъит, гьардиз лазим вуйи жаваб бихъри. 7Узкан вари хабрар Тихикди пидичвуз. Думу ихтибар али гъуллугъчи, узухъди Агъа бадали лихурайи йиз ккуни гъардаш вуйиз. 8Узу думу учвухьна, ич ляхнарин хабрар кидитну, ичв юкӏвар шад апӏуз, гьаъраза. 9Узу дугъахъди дугъри ва ккуни вуйи гъардаш Онесимра гьаъраза – думу ичвдарикан сар ву. Дурари учвуз, гьамшваъ шулайи варибдикан ктибтидичвуз. 10Учвуз узухъди дустагъдиъ айи йиз юлдаш Аристархди, Варнавайин халуйин бай Маркди саламар хътаура. Дугъкан учвухьна тӏалаб дурубкьначвухьна: эгер думу учвухьна гъафиш, думу кьабул апӏуб ккун апӏурача. 11Учвуз гьацира саламар хътаура Юстус кӏуру лакӏам хъайи Исайи. Аллагьдин Паччагьлугъ бадали жафа зигурайи жугьдарикан гьадрартӏан хътарзухъ. Дурар узуз аьхю кюмек вузуз. 12Ичвдарикан саламар Месигь Исайин гъуллугънаъ айи Эпафрасди хътаура. Думу гьарган учвхъанди, учву тамамвалинна дугъривалин мюгькамвалиинди Аллагьдин ниятнахъ хъпехъури гъузри кӏури, ижмиди ккарагура. 13Думу учвхъанди ва Иерапольна Лаодикия шагьрарин хъугърударихъанди, гьяйиф дарди, аьхю жафайиинди лихбан узу шагьид вуза. 14Учвуз ихь ккуни духтир Лукайи ва Демасди саламар хътаура. 15Лаодикияйиъ айи гъардшариз, гьацира Нимфандиз ва дугъан хулаъ уч шлу хъугърудариз саламар йипай. 16Му кагъаз учвухь гъурхиган, Лаодикияйин хъугърударизра урхуз шлуганси апӏинай. Хъа учву Лаодикияйиан вуйи кагъаз урхай. 17Ва Архипдиз йипай: «Лиг, увуз Агъайихьан гъабхьи гъуллугъ тамам апӏури гъуз!» 18Йиз хусуси хилʼинди бикӏураза: Павелихьан саламар. Йиз зунжрарикан кӏваинди гъибтай. Гъит учвухъди Аллагьдин ужʼвал ибшри!
Copyright information for
TabIBTNT