Eph 1 | TabIBTNT | STEP | Эфесдиъ айи Аллагьдин гирами халкьдиз, Месигь Исайихъ хъугъну яшамиш шулайидариз Аллагьдин амриинди Месигь Исайин вакил Павелин терефнаан

‏ Ephesians 1

Месигь – ухьуз тувнайи ужʼвал ву

1 Эфесдиъ айи Аллагьдин гирами халкьдиз, Месигь Исайихъ хъугъну яшамиш шулайидариз Аллагьдин амриинди Месигь Исайин вакил Павелин терефнаан – 2 ужʼвал ва мясляаьт учвуз, ихь Адаш Аллагьдихьан ва Агъа Иса Месигьдихьан!

3 Гъит адлу ишри ихь Агъа Иса Месигьдин Адаш, Аллагь. Дугъу аьршариъ ухьуз, Месигьдихъди ухьу саб гъашиган, рюгьнан вари ужувлар тувунхьуз: 4 Дугъу ухьу, Месигьдиъ саб духьну, Аллагьдин улихь гирамиди ва тахсир ктарди яшамиш хьуз дюнʼя халкь апӏайиз улихьна ктагъну. Дугъу Чан масанвалиинди, 5 Чан хушнииндина ниятниинди, Иса Месигьдилантина ухькан Чаз веледар ктауз улихьмиди кьаст дапӏнади гъахьну. 6 Чав ккун гъапӏу Месигьдилантина ухьуз туву Дугъан ужувлан вари ад магьа гьамдиъ а. 7 Гьадгъахъди саб гъахьиган, Дугъан ифди ухьу дюрхна ва Аллагьдин аьхир адру ужʼвали ихь гунгьарилан хил алдабгъна. 8 Думу ужʼвал Дугъу ухьуз жумартди тувну. Вари фагьмиинди ва аьгъювалиинди 9 Дугъу ухьуз Чан хушниинди Чан ниятнан сир ачухъ гъапӏну. Думу ният Месигьдиланмина арайиз хуз ккайиб вуйи. 10 Дугъан му ляхнар улупнайи вахтна завариин ва жилариин халкь дапӏнайиб вари Месигьдин гьюкмиккна сатӏи апӏбан бадали вуйидар вуйи.

11 Гьадгъахъди саб гъахьиган, Аллагьди Чан вари хушниинди ва ниятниинди улихьмиди апӏурайи ниятнаъ айиси, учу ктагъну. 12 Му мици учу, Месигьдик сифте миж кивну, адлу духьнайи Аллагьдин тярифар апӏуз гъабхьиб ву. 13 Гьаци учвура, учвуз уьрхювал тувру гьякьвалин гаф – Ужувлан хабар гъеебхьиган, Месигьдик ктикьунчва. Дугъахъ хъугъиган, Аллагьдин печать гъивунчвуин – гаф тувну гъафи Гирами Рюгь. 14 Гьадму Гирами Рюгь ухьуз тувнайиган, адлу духьнайи Аллагьдин тярифар апӏуз ухьуз ирс рубкьруб ва ухькан Чан адмийир ктаъруб аьгъяхьуз.

Павел хъугърударихъан ккарагура

15 Магьа гьаддиз, Агъа Исайихьна айи ичв хъугъуваликан ва Аллагьдин вари гирами халкьдихьна айи ичв масанваликан узуз гъеебхьиган, 16 йиз ккарагбариъ учву кӏваин апӏури, Аллагьдиз гьаммишан учвхъанди баркаллагь кӏураза. 17 Ихь Агъа Иса Месигьдин Аллагьди, адлу Адашди, фагьум туврайи Рюгь ва Чан гъавриъ ахъуз шлу ачмишʼвал учвуз тувуз кӏури, узу сикин дарди ккарагураза. 18 – 19 Узу, Аллагьди ичв юкӏвариз гьякь рябкъювал туври, кӏури, ккарагураза. Гьадмуган, Чав дих дапӏну, учвуз тувнайи гьадму умуд фу вуш, Аллагьдин гирами халкьдиз ирсди рубкьру аднан девлет фукьан зурбади вуш, ва ухьуъ, Дугъан кьадарсуз кьувватнан кюмекниинди хъугънайи адмийириъ айи ебцуз даршлу Дугъан кьудратнан зурбавал фукьануб вуш, агъю хьибдичвуз. 20 Гьадму кьувватнан кюмекниинди Аллагьди Месигьдиъ, Думу чӏиви гъапӏган, гьяракат ипнийи ва аьршариъ Чан арччул хилихъинди, 21 рюгьнан дюнʼяйин вари аьхюдартӏан, гьюкумдрартӏан, агъйиртӏан, ва неинки гьаму, хъа гъюз ккимбу уьмрариъра кӏваина хру заан ччвурартӏан зиина дитнийи. 22 Аллагьди вари Месигьдин ликариккна гъабхну. Думу, вари гъурдаъ Дибиснайир, вари дюнʼяйиъ хъугънайидарин Аьхюрди дерккну. 23 Дурар сатӏиди Гьадгъан беден, варишвариъ ва варибдиъ вуйи Гьадгъан тамамвал ву.