Eph 2 | TabIBTNT | STEP | Учву ичв тахсрарна гунгьарилантина дийихнайидар вуйчва

‏ Ephesians 2

Аьжалихьан уьмрихьна

1 Учву ичв тахсрарна гунгьарилантина дийихнайидар вуйчва 2 ва, гьаму дюнʼяйиъ фици апӏури гъахьнуш, учвура Аллагьдиз къаршуди удучӏвнайидариъ айи рюгьнан гьавайиъ айи чӏуру кьувватарин аьхюрин хиликкди гьаци апӏуйчва. 3 Саб вахтназ ухьура гьацдар вуйхьа ва, бедендиз ккуниси, ихь тямягьярин ва ихь чӏуру ниятарин ляхнар апӏуйхьа. Варидарихъди ухьузра, ихь хасиятназ дилигну, Аллагьдин хъял ккилибгурайи. 4 Хъа, зурба рягьим айи Аллагьди Чан зурба масанвалиинди ккун гъапӏунхьу. 5 Гьаддиз ухьу ихь тахсрарилантина дийихнайидар вуйишра, Месигьдихъди чӏиви гъапӏунхьу. Гьадгъан ужувлиинди дюрхнайидар вучва. 6 Аллагьди ухьу Месигьдихъди чӏиви гъапӏну ва Иса Месигьдиъ саб духьнайи ухьу аьршариъ дитну. 7 Гьаци Дугъаз Иса Месигьдилантина гъюз ккимбу вахтари ухьуз тувру Чан ужувлан кӏан-кӏул адру девлет варидариз улупуз ккун гъабхьну. 8 Гьаддиз Аллагьди учвуз Чан ужʼвал тувну, ичв хъугъувалилантина гъюрхюнчву. Ичв дюрхнайивал ичв гьунар дар, хъа – Аллагьдин багъиш ву. 9 Учву, учву гъапӏу ляхнариз дилигну, дюрхнадар. Гьаддиз, ич ляхнариз лигну, гъюрхюнча, кӏури, фурс мапӏанай! 10 Аллагьди ухьуз дерккнайи ужувлан ляхнар тамам апӏуз, ухьу Иса Месигьдиъ саб дапӏну, халкь дапӏнайидар вухьа.

Месигьдиъ сатӏи вуйидар

11 Гьаддиз кӏваинди гъитай: учву бабкан аллагьсузарди гъахьунчва. Адмийирин хилари бедендин суннат апӏру аьдат гъапӏдари учвуз «кададабтӏдар» кӏури шуйчвуз. 12 Думу вахтари учву Месигь хътарди гъахьунчва. Учву Аллагьдин халкь вуйи Израиларик кахьрайидар дайчва. Гирами Йикьрариъ Аллагьди тувнайи гаф учвуз кайиб дайи. Учву му дюнʼяйиъ миж ктарди, я Аллагь адарди яшамиш шулайидар вуйчва. 13 Хъа гьамус учву, Месигь Исайикди ктикьган, саб вахтна Аллагьдихьан ярхла айидар, Месигьдин учвхъанди удубзу ифдиинди багахь гъахьунчва.

14 Месигьди ухьу, жугьдар ва жара халкьар, саб мясляаьтназ гъахну ва кьюбдикан саб гъапӏну; Чан жан гъурбан дапӏну, ихь арайиъ дийибгънайи цал, яни ухьу жара апӏурайи душманвал адабгъну. 15 Дугъу аьдатарна къайдйир хъайи Къанун арайиан идипну. Дугъан метлеб – Чаъ сатӏи дапӏну, кьюбдикан цӏийи халкь дапӏну, мясляаьт ипуб ву, 16 кьюридра саб халкьси, хачриин гъабхьи ккадаъру Чан аьжалилантина Чаинди душманвал терг дапӏну, Аллагьдихъди мясляаьтназ хуб ву. 17 Думу дуфну, учвуз, Аллагьдихьан ярхла айидариз, ва Дугъаз багахь хьайидариз мясляаьтнакан хабар дебккну. 18 Гьаддиз Гьадгъулантина ухьуз, жугьдариз ва миди вуйи халкьариз, сар Рюгьну сатӏи дапӏну, аьршарин Адашдихьна гъюз ихтияр дубхьнахьуз.

19 Гьаци вуйиган, учву сарун жарадар ва гъирагъдилан дарчва. Учву Аллагьдин гирами халкьдизстар ихтиярар айи саб пай вучва ва Дугъан хизандин адмийир вучва. 20 Учву вакиларина пайгъамбрари ккивнайи шибритӏиин бина ккебгънайидар вучва. Гьадму шибритӏин сабпи ва мурччван Гъван – Месигь Иса Учв ву. 21 Дидʼин ягъал-ягъал шулайи ва Агъайиз бахш вуйи, гирами дараматдиз илтӏибкӏурайи мюгькам хал дийибгъна. 22 Дидиъ учвкан Чан Рюгьниинди Аллагь яшамиш шлу ужагъ шула.