Ephesians 3
Аллагьсузарин арайиъ Павелин ляхнар
1Магьа гьаддиз узу, Павел, учву, аллагьсузар бадали, Месигь Исайиланмина дустагъдиъ аза. 2Учвуз, икибаштӏан, Аллагьди узуз Чан ужʼвал учвуз улупуз табшурмиш дапӏнайиваликан деебхьначвуз. 3Дугъу узуз Чан сир ачухъ гъапӏунзуз, узу дидкан учвуз жикьиди гъибикӏнийза. 4Гьаму гъурхиган, Месигьдин сирнакан узуз фу аьгъяш, йиз аьгъюваларикан учвхьанра аьгъю апӏуз шулчвухьан. 5Му сир аьгъю хьуб гьамусдизкьан айи инсаниятдиз тувнайиб дайи. Хъа гьамус Рюгьну Аллагьдин гирами вакиларизна пайгъамбрариз думу аьгъю гъапӏну. 6Думу сир магьа гьаму ву: жугьдарихъди сабси жугьуд дарударра, Ужувлан хабарнахъ хъугъну, Аллагьдин ужувлан ирсчйир ву ва дурарихъди сабси саб бедендик ктикьура. Иса Месигьдик ктикьрудариз тувнайи гафнакан гьадраризра ка. 7Аллагьдин кьувватну узуз тувнайи ужувлиинди гьадму Ужувлан хабар рабгъру гъуллугъчи духьназукан. 8Узуз, Аллагьдин халкьдин арайиъ варитӏан асккануриз, гьаму багъиш тувназуз: Аллагь аьгъдрудариз ебцуз удудубкьру Месигьдин девлетнакан Ужувлан хабар дебккуб. 9Вари халкь гъапӏу Аллагьди сифте бинайиан жиниди уьбхюрайи гьадму ляхнин гьякьнаан варидариз аьгъювалар арццру багъиш тувназуз. 10Гьадму ляхнин метлеб: гьарсаб жюрейиинди арайиз удубчӏвру Аллагьдин фагьум вари дюнʼяйиъ айи Месигьдихъ хъугънайидарилантина аьршариъ айи аьхюдариз ва гьюкмариз гьамус ачмиш дубхьну ккунду. 11Му Дугъан ихь Агъа Иса Месигьдиинди тамам гъапӏу гьаммишандин ният ву. 12Месигьдиъ саб духьну ва Гьадгъахъ хъугъну, ухьхьан, гучӏ ктарди ва саб шак адарди, Аллагьдихьна гъюз шулу. 13Гьаддиз, учву бадали узу аьзабарикк ккахъна кӏури, ккун апӏураза, юкӏв макадабтӏанай, дурар ичв адлувализ ву.Месигьдин масанвал
14Гьаддин бадали узу Адашдин улихь, кьамкьариинди ккарагури, дийигъназа. 15Гьадгъухьан завариин ва жилариин гьарсаб тухми ччивар дисура. 16Узу, Аллагьди Чан аднан булвалиан Чан Рюгьниинди ичв рюгь кьувватлу апӏуз, 17хъугъувалиинди ичв кӏваъ Месигь учӏвуз, ичв уьмрин ччивна шибритӏ масанвал хьуз, 18Аллагьдин вари гирами халкьдихъди учвура Месигьдин масанвалин яркьушнан, ярхишнан, ягълишнан ва деринвалин гъавриъ ахъуз, 19учвуз инсандин фагьмиъ удрубшру гьадму масанвал аьгъю хьуз, ичв уьмур Аллагьдин тамамвалихьди абцӏуз ккарагураза. 20Хъа, ухьуъ Чан кьувват гьяракатнаъ ипну, ухьу ккун апӏрубтӏан вая ккунийкӏан, кӏурубтӏан гизаф артухъ тувуз Шлуриз, 21гъит, Иса Месигьдилантина ва вари дюнʼяйин хъугърударилантина гьаммишандиз наслариан наслариз ад ибшри! Амин.
Copyright information for
TabIBTNT