‏ Ephesians 4

Рюгьнан сабвал

1Узу, Агъайин тереф дибисна кӏури дустагъдиъ айири, миннат апӏуразачвуз: Аллагьди учвуз дих дапӏнайи гъуллугъназ лайикь вуйиси яшамиш йихьай. 2Дамагъсузди ва гъюдалди гъузай, чиб-чпихьна сабурлуди ва масанди йихьай. 3Вари кьувват жалб дапӏну мясляаьтнахьди рюгьнан ичв сабвал йибтӏай. 4Рюгь сар ву, Месигьдин беденра саб ву ва, гьадрарси, Аллагьди учвуз дих дапӏнайи умудра саб ву. 5Сар Агъа, саб хъугъувал, ухьу вари штуан хьувалин метлебра саб ву. 6Айир – сар Аллагь. Думу варидарин Адаш ву. Думу ихь варидарин зиин Алир ву, Дугъан ляхнар ухьʼинди варидариинди ву, ва Думу ухьуъ варидариъ яшамиш шула.

7Месигьди улупнайи кьадарниинди ухьуз гьарсариз хъуркьувал гъазанмиш апӏуз шлу багъиш тувнахьуз. 8Гьаддиз дибикӏнура а: «Чахъди кьадарсуз йисирар хъади,
Думу гъалибвалиинди кӏакӏназ удучӏвну,
ва Чан адмийириз багъишар тувну».

9«КӀакӏназ удучӏвну» кӏуру гафну мугагьназ Думу исина, жилин кӏанакк йишвариз гъювал улупура. 10Чахьди вари дюнʼя абцӏбан бадали аьршартӏан зиина за Гъашир, гьадму исина Гъушур ву. 11Ари Гьадму ву багъишар Тувур: фужариз – вакилар хьуб, фужариз – пайгъамбрар, фужариз – Ужувлан хабар ктибтрудар, фужариз – хъугърударин аьхюдар ва мялимар хьуб. 12Мици, Аллагьдин гирами халкь, Месигьдин беден артмиш апӏуз гъуллугъназ гьязур апӏбан бадали, гъабхьну. 13Му мици, ихь хъугъувалиъ ухьу вари саб хьайизкьан, Аллагьдин Бай аьгъю апӏайизкьан, рюгьнаъ хъуркьувалихъна гъяйизкьан ва вари тамамвал Айириз – Месигьдиз ухьу ухшар шайизкьан хьибди.

14Хъа думуган ухьу сарун лепйири ккалакьурайи ва гьар жюре каламарин микӏарихь гьитнайи, инсанар улдугуз гъитри, аьмалдар кучӏляхярикк ккахъру бицӏидарси хьидархьа. 15Эгер ккунивалиинди гьякьʼвал кӏури гъабхьиш, варибдин кӏул вуйи Месигьдин хасиятназ ухшарди ухьу аьхю хьидихьа. 16Гьадгъан кюмекниинди вари беден саб дубхьна ва гьар жюре аьлакьйири кибтӏна, дидин вари паяри гьарсабди чаз улупнайиб тамам апӏура. Гьамци вари беден аьхю ва масанвалиъ артмиш шула.

Йирси ва цӏийи уьмур

17Гьаци вуйиган узу Агъайин ччвурнахъан кӏураза, тӏалаб апӏураза: ичӏи фикрар айи аллагьсузарси яшамиш хьуб дипай. 18Дурарин фагьум рюгьнан курвалиан ва юкӏвар дициркънайивалиан мучӏу дубхьна, дурар Аллагьди тувру уьмрихьан гьадатӏна. 19Дурар, инсанвалин лишан дудубгну, адрацӏди, гьубкьу чиркишнаъ арсри, кьяппавалиъ ахьра.

20Хъа учвуз Месигь дици аьгъю гъахьундарчвуз. 21Саб шак адарди, Дугъкан учвуз гъеебхьунчвуз ва, Гьадгъан терефкрар вуйивализ дилигну, учвуз гьякьʼвал улупунчвуз, фицики гьякьʼвал Исайиъ а. 22Ичв йирси табиаьтдиз хас вуйи, улар йитӏру кучӏлин тямягьяри пуч апӏурайи мугагьназдин уьмур гъибтуз учвуз улупнийи. 23Ичв фикир апӏбан саягъ цӏийи алапӏай, 24Аллагьдин хасият – гьякь вуйи дюзвал ва гирамивал улупурайи цӏийи табиаьт «алабхьай».

25Гъит гьарсари кучӏал дипри ва жвуван багахь хьайидариз дюзвал йипри, гьаз гъапиш ухьу вари саб бедендин паяр вухьа. 26Хъял кубчӏвнади гунагь мапӏанай. Гъит ичв хъял ригъ алабхъайиз ккядябхъри, 27ичв уьмриъ иблисдиз йишв мутуванай. 28Шли гьитӏибкӏуйиш, сарун мигьитӏибкӏан, жвуван хилари гъазанмиш апӏин ва адрудариз капӏ.

29Гьич сабкьан ахмакь гаф мапӏанай, ужуб рякъюхъ хъаъру ва хъпехърудариз хайирлу гафар йипай. 30Ккадаъру Йигъ гъяйиз учвʼин печать йивнайи Аллагьдин Гирами Рюгьназ гиран макадапӏанай. 31КӀван гьарсаб кьутӏкьливалихьан, хъял гъювалихьан, тюнтвалихьан, чӏигъарихьан, люкьнар-агьрарихьан, гьар жюре хъял бисувалихьан азад йихьай. 32Сар-сарихьна гьюрмат ади йихьай, учву Месигьдиъ саб гъахьиган Аллагьди учвлан фици хил алдабгънуш, учвура чиб-чпилан хил алдабгъури гъузай.