‏ Ephesians 5

Аквнахь яшамиш шулайиси гъузай

1Аллагьдин ккуни веледарси, Гьадгъаз ухшар йихьай. 2Кабалгру ицци ниар адаури, Аллагьдиз Месигь Учв фици гъурбан гъахьнуш ва фици ухьу ккун гъапӏнуш, гьаци масанди яшамиш йихьай.

3Ичв арайиъ кьяппаваликан, вая жара чиркинваликан, ясана тямягькарваликан гафаркьан даришри – мурар Аллагьдин гирами халкьдиз хас дар. 4Ичв ушвниъ гьич фицикӏа лайикь даруб, ичӏи улхуб вая кацӏу зарафтар духьну ккундар, Аллагьдиз чухсагъул кӏури гъабшиш, ужу шул! 5Кьяппавалиъ ахъру гьич сар кас, я чиркин кас, я тямягькар (мицир идолариз икрам апӏрурик гьисаб ву) Аллагьдинна Месигьдин Паччагьлугъдиъ ирснан эйси хьидар.

6Гъит, зиихъ дупнайибдиз къаршу удучӏвну, гьич сарира учву алдатмиш дарапӏри, гьаз гъапиш мютӏюгъ дарудари чпиина Аллагьдин хъял алапӏура. 7Мицдар адмийирихъди ичв фукӏа уртахъуб дарибшри.

Аквнан баяр

8Саб ухди учву мучӏушин вуйчва, хъа гьамус, учву Агъайиъ саб вуйиган, акв вучва. Аквнан баярси яшамиш йихьай. 9Хъа аквнан бегьер – гъянивал, дугъривал ва гьякьвал ву. 10Агъайиз фу кьабулди шулуш, аьгъю апӏури йихьай. 11Мучӏушнан бегьерсуз ляхнариъ иштирак махьанай, хъа дурар дюз дарувал улупай. 12Дурари жиниди апӏурайидарикан пуз гьеле начра шулу. 13Хъа вари жиниб аквнахь ачухъ хьибди. 14Вари рябкъюри апӏруб акв ву, гьаддиз гьамци кӏурира а: «Даахнайир, хъирг!
Дукӏнайир, гъудужв!
Месигьди уву аквнакк ккаъди».

15Лигайгьа, ахмакьарси яшамиш махьанай, хъа фагьумлуйирси. 16Жвуван вахт ужуйи гьапӏуз ял апӏинай, гьаз гъапиш му йигъариъ гизаф писвал а. 17Пчӏу юкӏв ади махьанай, хъа Агъа Аллагьдин ният фу вуш, гъавриъ ахъуз чалишмиш йихьай. 18Ички гизаф мубхъанай, диди ягь-намус дубгуз гъитру, хъа Рюгьнахьди ацӏай. 19Чиб-чпихъди Мяълийирин китабдиан тярифнан ва рюгьнан мяълийириинди сюгьбатар апӏинай. Ичв юкӏвариъ Агъайиз мяълийир апӏури, Дугъан ад апӏинай. 20Ихь Агъа Иса Месигьдин ччвур дибисну, Адаш Аллагьдиз гьаммишан ва варибдихъан чухсагъул йипай.

Жилиринна хпирин аьлакьйир

21Месигьдиз айи лап дерин гьюрматнаан чиб-чпиз мютӏюгъ йихьай.

22Учву, хпар, Агъайизси, ичв жиларизра мютӏюгъ йихьай. 23Гьаз гъапиш Месигь фици Чан бедендин – вари хъугърударин – КӀул ва дурар Уьрхрур вуш, жилирра чан хпирин кӏул ву. 24Месигьдиз хъугърудар фици мютӏюгъ вуш, ари хпарра чпин жилариз гьаци мютӏюгъ духьну ккунду.

25– 26– 27Хъа учву, жилар, Месигьди Чахъ хъугърудар фици ккун гъапӏнуш, ичв хпарра гьаци ккун апӏинай. Дугъу, гафналантина штуъ марцц дапӏну, гирами апӏбан бадали, я миж, я камивал, ясана жара фукӏа гьациб ктарди, швушвси, чпин вари аднаъди Чан улихь дерккну Чаз бахш апӏбан бадали, тахсир ктру хъугърударин гирами Жямяаьт хьпан бадали, хъугърударихъанди Чан жан тувну. 28Гьаци жиларра, чпин жанар фици ккундуш, чпин хпарра гьаци ккун апӏуз буржлу ву. Шлиз чан хпир ккундуш, дугъаз учв ккунду. 29Хъа мегьел чан жан даккнир гъахьундар, адми дидин гъайгъушнаъ шулу, думу тухъ апӏури шулу. Гьаци Месигьра хъугърударин гъайгъушнаъ а, 30гьаз гъапиш ухьу Дугъан бедендин паяр вухьа. 31«Гьаддиз адми, чан адашна дада гъитну, чан хпирик карсди, ва кьюрикан саб жан хьибди». 32Мушваъ зурба вуйи сир а, узу кӏурайиси, думу сир Месигьдинна вари хъугърударин аьлакьйирикан ву. 33Хъа учвуз кайиб, гъит гьар жилири, чаз учв ккуниси, чан хпир ккун апӏри ва хпирира чан жилирин гьюрмат уьбхри.