‏ Ephesians 6

Абйир-бабар ва бицӏидар

1Бицӏидар, Агъайихъди гъягърудариз лайикь вуйиси, ичв абйир-бабарихъ хъпехъури апӏинай – му дюзвал ву. 2– 3«Уву бахтлу хьпан ва жилиин ярхи уьмур
хъапӏбан бадали,
яв адаш-дадайиз гьюрмат апӏин» –

му Аллагьди гаф тувнайи сабпи табшуругъ ву.

4Адшар, ичв бицӏидарик хъял макапӏанай, хъа Агъайин тербияйихъдина насигьятарихъди ижмиди вердиш апӏинай.

Эйсйир ва лукӏар

5Лукӏар, учву Месигьдиз мютӏюгъ шлуси, вари юкӏв хъипну, гьюрмат ади ва гучӏ кади жилин ичв агъйириз мютӏюгъ йихьай. 6Дурариз учву ккун хьпан бадали, зиълан апӏруси мапӏанай, хъа юкӏв хъипну, Аллагьдин ният тамам апӏурайи Месигьдин лукӏарси лихай. 7Адмийирихъ лихурайиси ваъ, хъа аьршарин Агъайихъ лихурайиси юкӏв хъади лихай. 8Учвуз аьгъюганси, учв лукӏ вушра – даршра, шли ужуб ляхин гъапӏиш, гьарсаб ляхниз Агъайи пешкеш тувди.

9Учвура, агъйир, лукӏарихьна гьаци йихьай. Гучӏар ккауб гъибтай. Учвуз аьгъюганси, ичвра, дураринра сар Агъа ву аьршариъ Айир, хъа Думу гьич саринра тереф бисрур дар.

Аллагьдин рукьан палат алабхьай

10Аьхирки, Агъайиъ саб хьувалиъ, Дугъан удукьувалиъ ва кьувватнаъ ижми йихьай. 11Аллагьди учвуз тувнайи вари яракъ, иблисдин тӏулариз къаршу дугъужвуз, алабхьай. 12Фицики ухьу дяви йиккканна ифдикан вуйи адмийирихъди гъабхурадархьа, хъа аьхюдарихъдина гьюкумдрарихъди, гьаму мучӏушнан дюнʼя хилиъ дибиснайидарихъди ва завариъ писвалин рюгьярихъди гъабхурахьа. 13Ари гьаддиз, писвал алжабгъуз хъюбгъю йигъан учвхьан къаршу дийигъуз, ва кӏул адабгъну гъузуз, Аллагьдин вари яракъ учвухьна бисай. 14Юкьвнаан гьякьвал идибтӏну ва дюзвалин рукьан палатдиъ учӏвну, ижмиди дийигъай. 15Ичв ликариин алахьрударра, дюнʼяйиз Ужувлан хабар гъабхуз, гьязурди ишри. 16Варибдилан гъайри, иблисдин цӏа кайи чӏимрар ктӏуршвуз, хъугъвалин гъалхан ижмиди бисай. 17Уьрхрувалин рукьан баккара улубкӏай ва Рюгьнан ханжалра, яни Аллагьдин Гаф гъадабгъай. 18Гьубкьу жюрейиинди ккарагай ва Рюгьнаъди учвуз ккуни вахтна Аллагьдикан тӏалаб апӏинай. Гьаци хьуз гьязурди ва Аллагьдин вари гирами халкьдихъан гьаммишан ккарагури гъузай.

19Узу ушв абццубси, лазим гафар тувбан бадали ва Ужувлан хабарнан сир улихь гучӏ ктарди ктибтбан бадали, узхъандира ккарагай. 20Узу гьеле гьаму зунжрариъ ашра, гьаддин гьякьнаан гьаънайир вуза. Узу лазим вуйибси дирбашди дидкан хабар дебккбан бадали, узхъан ккарагай.

21Узу гьапӏраш, Агъайиз дугъривалиинди гъуллугъ апӏурайи йиз ккуни гъардаш Тихикди узкан вари пидичвуз. 22Думу гьаддиз учвухьна, ич ляхнарикан ктибтуз ва ичв юкӏварик аьшкь капӏуз гьаърайир вуйиз.

23Гъит, гъардшар, мясляаьт, масанвал ва хъугъвал Адаш Аллагьдихьан ва Агъа Иса Месигьдихьан ибшричвуз. 24Зат аьхир адарди ихь Агъа Иса Месигь ккуни варидариз ужʼвал ибшри.