Gal 1 | TabIBTNT | STEP | Адмийири гьял дапӏну ваъ, я адмийин кюмекниинди ваъ, хъа Иса Месигьдин ва Думу гъачӏидаригъян за гъапӏу Адаш Аллагьдин кюмекниинди вакил гъахьи Павелихьан ва

‏ Galatians 1

Гьякь – саб Ужувлан хабартӏан дар

1 Адмийири гьял дапӏну ваъ, я адмийин кюмекниинди ваъ, хъа Иса Месигьдин ва Думу гъачӏидаригъян за гъапӏу Адаш Аллагьдин кюмекниинди вакил гъахьи Павелихьан ва 2 гьамшваъ узухъди хъайи вари гъардшарихьан – Галатдиъ айи хъугърударин жямяаьтриз саламар.

3 Ужʼвал ва мясляаьт учвуз, ихь Адаш Аллагьдихьан ва Агъа Иса Месигьдихьан. 4 Дугъу, Адаш Аллагьдин ният тамам гъапӏну, писвали агъавал апӏурайи гьаму дюнʼяйин гьюкмиккан ухьу азад апӏбан бадали ихь гунгьарихъанди Чан жан тувну. 5 Гьадгъан ад – аьсрариан аьсрариз ибшри. Амин.

6 Учву гьамкьан ухди, Чан зурба вуйи ужувлиинди учвуз дих Дапӏнайирихьан гьидицну, саб жара ужувлан хабарнахъ хъергуз кьаст дапӏнайивалиин гъах духьназа. 7 Ужувлан хабар сарун жараб айиб дар! Ичв ара бикьурайи, Месигьдикан вуйи хабар айтӏлан апӏуз ккуни адмийир а. 8 Эгер шли ичв арайиъ, учвуз дебккнайи Ужувлан хабарналан гъайри, сарун жара гьациб хабар ипраш, гьациб хабар ипрайир, узу вушра, завариан малайикди гьаци апӏурашра – гъит гьаци апӏурайир, жегьеннемдин цӏигъ гъяхъри! 9 Улихьнаси узу гъапнийзаки ва гьамус хъана текрар апӏураза: гьарсар, учвуз тувнайи Ужувлан хабарналан гъайри фукӏа-мукӏа жараб кӏуру кас жегьеннемдин цӏигъ гъяхъри!

10 Узуз гьапӏуз ккунди а: адмийири йиз тереф бисуз гъитуз, даршиш – Аллагьди? Хъа узу, адмийириз ккуниб апӏуз хъюгънайир вуйинхъа? Эгер узу адмийириз ккуниб апӏурайир вуйиш, узу Месигьдин лукӏ хьидайза.

Павелиз кьувват Аллагьди тувну

11 Гъардшар, узуз учвуз аьгъю дубхьну ккундузуз: узу учвуз ктибту Ужувлан хабар адмийирихьан гъафиб дар. 12 Узуз думу адмийирихьан гъебхьуб дариз, я адмийири улупуб дариз, хъа Иса Месигьди узуз думу ачмиш гъапӏунзуз.

13 Учвуз, узу Къанун гьярф-гьярфди тамам апӏру жугьуд вуйиган, гьич саб инсаф адарди, Аллагьдихъ хъугърударихъ, терг апӏури, хъергрур вуди хьуваликан, гъеебхьунчвуз. 14 Йиз таярик узукьан жугьуд дин улихь гъабхру кас адайи, абйирин аьдатар алдарди тамам апӏуйза. 15 Хъа Аллагьди Чан ужувлиинди Чан гъуллугънаъ хьуз узу ктагъну. Дугъан гьациб ният узу бабкан хьайиз айи. 16 Дугъу Чан Бай узуз ачмиш апӏуру ва Гьадгъукан Аллагь аьгъдру халкьариз Хабар дебккуз гъитру. Думуган узу гьич сар касдихьнакьан, насигьят ккун апӏури, гъушундарза. 17 Узу Ерусалимдиз узутӏан ухди вакилар гъахьидарихьнакьан гъушундайза, хъа Аравияйиз гъушунза, хъасин Дамаскдиз кьяляхъ хътакунза.

18 Хъасин, шубуд йис гъубшиган, узу Ерусалимдиз Петр рякъюз гъафунза. Дугъахь йицӏихьуд йигъан гъузунза. 19 Хъа имбу вакиларикан узуз, Агъайин гъардаш Якьубдилан гъайри, фужкӏара гъяркъюндарзуз. 20 Узу учвуз бикӏурайиб кучӏал дариз, Аллагь шагьид ишри!

21 Хъасин узу Сирияйизна Киликияйиз гъушунза. 22 Ягьудияйиъ айи Месигьдихъ хъугърудариз машна-машди узу таниш дар. 23 Узкан дурариз аьгъюб: «учухъ мугагьназ хъергрури улихьди чав тӏанкь апӏурайи хъугъуваликан ктибтура» кӏурубтӏан дайи. 24 Узу гьаци гъахьну, кӏури, дурари Аллагь адлу апӏуйи.