‏ Galatians 3

Хъугъували Аллагьдин ужʼвал хуру

1Галатлуйир, ахмакьар, шли ичв фагьум гъибикьну?! Узу учвуз Хабарнакан ктибтруган, учвуз ичв улариинди хачрак карснайи Месигь гъяркъну кӏури, хиял вуйизки!

2Учвхьан сабдикан гьерхуз ккунди азуз: учвуъ Гирами Рюгь, Къанун тамам гъапӏну кӏури, учӏвунчвуъ, даршиш, Ужувлан хабарнакан деебхьну, хъугъиган? 3Учву гьадмукьан ахмакьар вунчвахъа, ккебгъруган – Рюгьнахъди ккебгъну, хъа ккудубкӏруган – адмийири чпикан ктагъдариинди ккудубкӏуз?! 4Ясана, учвуз гъахьи ва учву апӏури гъахьи ляхнар, гьаци, ичӏи сес вуйинхъа? Хьуз мумкин дар! 5Аллагьди учвуз Рюгь багъиш ва ичв арайиъ аьламатнан ляхнар, учву Къанундин къайдйир хъаъра кӏури, гъапӏну кӏурачва, даршиш, Гьадгъан хабарнакан деебхьну, учву хъугъиган?

6Мисалназ, Ибрагьимдиз лигай. Думу «Аллагьдихъ хъугъру, ва Аллагьди думу, чан хъугъувализ дилигну, гьякь апӏуру». 7Гьаци вуйиган, гъавриъ ахъай, Ибрагьимдин баяр фужар вуш – хъугърудар ву. 8Гирами китабариъра, хъугъу халкьар Аллагьди гьякь апӏиди кӏури, улихьмиди дупнайи. Ибрагьимдиз, «Увлантина жугьуд дару халкьариз Аллагьдин ужʼвал хьибди», кӏури, Ужувлан хабарнакан сифте хабар гьадмугантӏан дебккнийи. 9Гьаддиз Аллагьдихъ фужар хъугъруш, гьадрариз варидиз Ибрагьимдихъди сабси, чпин хъугъувализ дилигну, ужувлар хьиди.

10Къанундихъ йирфар хъирчну, дидин аьдатар тамам апӏуз ккунидар агьнакк ккахъуз мумкин ву, гьаз гъапиш «Къанундин китабдиъ дибикӏнайиб вари, сабкьан гъидидипди, тамам дарапӏрур, агьнакк ккахъна» кӏури, дибикӏна. 11Хъа Къанундиинди Аллагьдин улихь гьич фужкӏара гьякь даршлуб гьаму гафариан ачухъ шула: «Чан хъугъувализ дилигну гьякь гъапӏуртӏан яшамиш хьидар». 12Къанундин хъугъувалихъди айиб гьич фукӏара адар. Дидиъ дупна: «Анжагъ му къайдйир вари тамам апӏруртӏан яшамиш хьидар».

13Месигьди ухьу, Къанун тамам дарапӏруган, ухьʼин улубкьру агьнаккан ккадаъну. Дугъу Чав Къанундиъ улупнайи кьаза-балйир ухьу бадали Чаина гъадагъну, гьаз гъапиш гьамци дупна: «гьарикк ккерхнайир агьнакк ккахъна». 14Ибрагьимдиз тувурза дупнайи ужʼвал Иса Месигьдилантина вари халкьариз хьпан бадали ва ихь хъугъувализ дилигну тувурза гъапи Рюгь ухьуз рукьбан бадали, Къанундиъ улупнайи кьаза-балйир Дугъу Чаина гъадагъну.

Къанун ва тувнайи гаф

15Гъардшар, ихь гьар йигъандин уьмриан мисал хибдизачвуз: эгер адмийи дюз гъюруси васиятнан кагъаз дибикӏнаш, думу гьясбикк ккадрапӏуз вая дидик жараб капӏуз хьибдар. Ари гьамшваъра гьаци ву. 16Ибрагьимдиз ва дугъан наслиз Аллагьди гаф тувнайи. Фикир тувай, фици дупнаш: «наслариз» дупнадар – мици, гизафдарикан улхураш, кӏуру, хъа, «яв наслиз» – мици сарикан улхруган кӏурайиб ву. Ари гьадму насил – Месигь ву. 17Узуз гьамци пуз ккундузузки: юкьудваржна сумчӏур йислан арайиз гъафи Къанундихьан Аллагьди дебккнайи йикьрар арайиан адабгъуз шлуб дар ва дидиъ тувнайи гаф тамам дарапӏди гъибтуз хьибдар. 18Эгер ирс Къанундилан асиллу вуйиш, думу тувнайи гафналан асиллу хьибдайи. Хъа Аллагьди, Чан гаф тувну, Ибрагьимдиз гьаму ирс тувна.

19Дици вуйиган, Къанун гьаз ву? Думу, тахсрар артухъ хьувализ дилигну, гьадму гаф тувну гъюру «Насил» гъяйизкьан адабгънайиб вуйи. Къанун малайикариланмина ва ара сатӏи апӏрурин кюмекниинди дебккнайиб ву. 20Ара сатӏи апӏрур, аьлакьа йибтӏуз ккайи кьюб тереф айигантӏан шлур дар. Хъа Аллагь сартӏан дар, аьхир.

Мусайин Къанундин ляхин

21Дици вуш, Къанун, Аллагьди тувнайи гафназ къаршу вуйинхъа? Икибаштӏан, ваъ! Эгер адмийириз, уьмур тувуз шлу Къанун гъабхьнийиш, икибаштӏан, дурар гьякь апӏувал гьациб Къанундилан асиллу хьибдийи. 22Аммаки Гирами китабари дюнʼяйиин алиб вари, Иса Месигьдихъ хъугъувалиланмина, хъугънайириз тувнайи гаф тамам апӏбан бадали, гунгьин гьюкмикк кка, кӏура.

23Хъугъувал ачмиш хьайиз Къанундин дустагъдиъ, хъугърувалин вахт гъяйиз, итнайхьа. 24Гьаци вуйиган, Къанун ухьуз, ихь хъугъувалиинди ухьу гьякь апӏбан бадали Месигьдихьна гъахру тербиячи вуйхьуз. 25Хъугъувалин вахт гъафиган, ухьу тербиячийин хилккан ккадаунхьу.

26Учву вари Месигь Исайихъ хъугърувалилантина Аллагьдин баяр вучва. 27Фицики, Месигьдик ктикьбан бадали штуан гъахьидар, учву Месигьдин гъаравликк ккачва. 28Сарун жугьдаринна жара миллетарин фаркьлувал имдар, лукӏранна азад вуйирин фаркьлувал имдар, жилижвуванна дишагьлийин фаркьлувал имдар. Гьаз гъапиш учву вари, Месигь Исайихъди саб вучва. 29Сарун учву Месигьдиндар вуш, Ибрагьимдин наслар вучва ва, гаф тувнайиси, ирс рубкьрудар вучва.