‏ Galatians 4

Павелиз Галатдин хъугърудар ккунивал

1Учвуз сабсана мисал хибдиза: ирс рубкьуз ккайир, васиятниинди вари ирснан аьхюр учв вушра, бицӏиди имиди, лукӏрахьан сабдинра артухъ дар. 2Думу чан адашдин васиятнаъ улупнайи вахт гъяйизкьан, чан хулаз лигурайидарин ва чан гъайгъу зигрударин хиликк ккади шулу.

3Ари гьаци ухьура ахьа: ухьу бицӏиди айиган, гьаму дюнʼяйин кьудратарин хиликк ккайхьа. 4Аммаки Аллагьди, вахт гъабхьиган, Къанундиккди яшамиш шулайи дишагьлийи гъахи Чан Бай гьаъру. 5Думу му дюнʼяйиз, Къанундин гьюкмиккди яшамиш шулайидар азад апӏбан бадали ва Аллагьди ухькан Чаз веледар ктаъбан бадали, гъафну.

6Учву Чан веледар вуйиган, Аллагьди ичв кӏваъ, «Авва! Адаш!», кӏури, дих апӏру Чан Балин Рюгь аъну. 7Гьаддиз, сарун уву лукӏди имдарва, хъа Дугъан бай духьнава. Хъа эгер уву Дугъан бай вуш, Дугъу увкан ирс рубкьурайир ктаъну.

8Мугагьназ, учвуз Аллагь аьгъдру вахтари, учву аллагьар дару кучӏлин аллагьарин лукӏар вуйчва. 9Гьамус, учвуз Аллагь аьгъю гъахьиган, яна дюзди гъапиш – Аллагьдиз учву аьгъю гъахьиган, гьаз учву хъана гьадму зяиф ва касиб дюнʼяйин кьудратарихьна хътакурачва? Гьадрарин лукӏвалиъ учӏвуз ккунди анчвуз? 10Учву, саспи йигъар, вазар, йисан паяр ва йисар къайд апӏурачва. 11Амма учвуз ужувлаз вуйи йиз ляхнар, учвухь дав шул, кӏури, гучӏ казуз.

12Гъардшар, учвуз миннат вуйиз, узу фицир вуш, учвура гьацдар йихьай! Фицики узура учвусир даринхъа? Учву узуз гьич зат фукӏара чӏуруб гъапӏундарчва. 13Учвуз аьгъячвуз: узу учвухьна сифте ражари гъафиган, иццурашра, учвуз Ужувлан хабарнакан ктибтуз гъабхьунзухьан. 14Йиз уьзри учву узхьан ярхла гъапӏундайи. Узу даккун дапӏну, учву узхьан гьидицундайчва, хъа Аллагьдин малайикси, Месигь Иса Учвси, узу кьабул гъапӏнийчва. 15Гьамус ичв думугандин гьевес-шадвал набши? Думуган, саб шак адарди кӏураза, лазим гъабхьнийиш, ичв ул узуз тувуз гьяйиф хьибдайчвуз! 16Гьамус фу дубхьна? Учвуз гьякьнакан гъапну кӏури, узкан ичв душман духьнайин?

17Пис хиялар ади ичв кӏулʼин аьхювал апӏуз ккуни адмийириз учву учхьан гьадатӏуз, хъасин учву, чипкан каркар ктатури дерккуз ккунди а. 18Жвуван тереф бисуз гъитбаъ фукӏара чӏуруб адар, эгер ниятар ужудар вуш. Гьаци узу учвухъди гъузу йигъазтӏан дархьиди дарибшригьа. 19Йиз ккуни веледар! Узу хъана уьзур-аьзиятниинди, учву тазатӏан бабкан шулайиси, Месигьдиз ухшар айидар шайизкьан, цӏийи алаидизачву! 20Гьаму ражари, узу учвухъди хъади, жараси улхуз ккунди айзуз! Узу учвʼин мюгьтал духьназа!

21Учвуз Къанундиз мютӏюгъ хьуз ккунди анчвуз? Дици вуйиган, узуз йипай: Къанундиъ фу кӏураш, гъавриъ анчва? 22Душваъ, Ибрагьимдихъ кьюр бай хъайи, кӏури, дупнаки, сар – гъараваш дишагьлийикан, тмунур 23– Аллагьди гаф тувнайиган – азад дишагьлийикан. 24Му ихтилатнаъ саб жини мяна а: кьюр дишагьли кьюб йикьрар вуди гьисаб апӏура. Дурарикан сар – Агар, Синай дагъдиин гъийитӏу йикьрар ву. Ари гьадму Агар лукӏ вуйи ва дугъан веледарра лукӏарди бабкан шули гъахьну. 25Агар Аравияйи айи Синай дагъ гьисаб ву, ва гьацира гьадму вахтари чан веледарра хъади лукӏвалиъ абхънайи Ерусалим. 26Хъа аьршарин Ерусалим – азадуб ву, ва гьадму – ихь дада вуйихь! 27Гирами китабариъ дибикӏна: «Шад йихь, бицӏидар даршлур ва бицӏидар дархир!
Чӏигъар апӏин ва гьарай ип, бицӏир апӏруган шлу аьзиятарикан хабар адрур!
Фицики, ялгъуз дишагьлийин бицӏидар жилирихь хьайиринтӏан гизаф ву!»

28Учвура, гъардшар, гаф тувну бабкан духьнайи веледарси, Исакьдиз ухшар вучва. 29Аммаки, аьдати жюрейиинди бабкан духьнайир Гирами Рюгьниинди бабкан гъахьирихъ хъерграйиси, гьаму вахтарира гьаци шула. 30Гирами китабариъ фу кӏура? – «Азад дишагьлийин балихъди ирснан пай ккудрубкьбан бадали, лукӏ дишагьли, чан байра хъади, утӏукк». 31Гьаддиз, гъардшар, ухьу лукӏран веледар дархьа, хъа – азад дишагьлийиндар!