‏ Galatians 5

Ичв азадвал уьбхяй

1Месигьди ухьу, азад хьуз кӏури, ккадаъну. Гьаддиз ижмиди дийигъай, хъана лукӏʼвалин юрккгъиъ ичв кӏул мииванай!

2Узу, Павели, учвуз кӏуразачвуз: эгер аьдатариз дилигну, суннатар апӏури, Къанундиъ кӏурайибдихьна учву кьяляхъ хътакуруш, учвуз Месигьдикан вуйи гьич саб хайирра адарчвуз. 3Узу учвуз хъана текрар апӏураза: аьдат бадали шли чан суннат апӏуз гъитиш, гьадгъу Къанундиъ улупнайи вари къайдйирна аьдатар тамам дапӏну ккунду. 4Эгер Къанундиинди гьякь хьуз ичв умуд каш, гьамусдихъантина Месигьдихъди вуйиб гьич фукӏара адаричв ва Аллагьдин ужувлихьан жара гъахьунчва. 5Хъа ухьу гьякь хьуз ихь умуд хъугъувалик кайихь ва Рюгьну ккилигуз кюмек апӏурахьуз. 6Эгер Месигь Исайихъди ухьу саб вуш, адмийин суннат дапӏну а – адар, дурар сар сарихьан жара дар. Мушваъ айи метлеб – масанвалиланмина арайиз удубчӏвурайи хъугъвал ву.

7Учву жаргъуб ужуди ккебгънийчва. Думуган учвуз шли машат гъапӏунчвуз ва гьякьнахъ хъпебехърудар шли ктаунчвукан? 8Мидхъан шли хътаунчву? Учвуз дих Гъапӏури дици дарапӏур! 9«Вари хямир утуз сацӏиб дун чӏяаьн ву» 10Узу, Агъайихъди сабси, учву жара фикрариъ адрахърубдихъ, хъугъурза. Хъа ичв ара бикьурайидариз, чпи фужар вушра, жаза гьадабтӏиди. 11Гъардшар, эгер узу гьамусра суннатнакан ктибтуйиш, гьаз узухъ хъергуйихъа? Эгер узу гьамусра гьаци ктибтури имийиш, хачракан вуйи йиз аьгъювалари къаршувалар арайиз хидайи. 12Хъа ичв арайиъ гъипрайи футнакрари, неинки суннат, хъа чпин вари ккадатӏузра ккадатӏри!

13Учвуз Аллагьди азадди яшамиш хьуз дих дапӏна, гъардшар. Аммаки, лигайгьа, ичв азадвал, ичв жандиз ккуниб апӏури хъаъру гунгьариз ишлетмиш апӏуз мигъитанай! Хъа учву чиб-чпин гъайгъушнаъ, масанди йихьай. 14Гьаз гъапиш, мушваъ вари Къанун гьаму саб гафнаъ а: «Яв багахь хьайир, увуз увуси, ккун апӏин». 15Хъа эгер учву, чиб-чпи кчӏвукьури ва чиб-чпин йикк ипӏури гъашиш, лигайгьа, учву чиб-чпи тӏанкь апӏуз мумкин ву!

Рюгь ва беден

16Узу учвуз кӏураза: Рюгьну кӏурайиси яшамиш йихьай, ва гьадмуган, ичв жандин тямягьяриъ кӏулихъди ахъидарчва. 17Ихь гунагькар бедендиз ккуниб – Рюгьназ ккуниб дар, хъа Рюгьназ ккуниб – ихь гунагькар бедендиз ккуниб дар. Дурар чиб-чпиз къаршу ву. Учвхьан учвуз ккуниб гьаддиз апӏуз шулдарчвухьан. 18Эгер учву Рюгьну хъаъраш, ичв зиин Къанундин гьюкум гъубзрадар.

19Гунагькар бедендин ляхнар варидариз рякъюрайидар ву. Дурарик кьяппавал, чиркинвал, хилʼан адахънайивал, 20идолариз икрам апӏувал, фал китувал, душманвал, гьюжатар, жарадариин хъугъвал алдрувал, хъял, учвтӏан даккнивал, гъярхьувалар, къаршувалар, 21бахилвал, пиянвал, шадлугъар-кьяппавалар ва гьацдар жарадар кахьра. Узу учвуз улихьнасира гъапунза ва гьамусра кӏуразачвуз: гьаци апӏрударикан гьич саризра Аллагьдин Паччагьлугъдиъ ирс ккубкьидар.

22Хъа Рюгьнан ляхнарик – масанвал, шадвал, мясляаьт, сабур, ужʼвал, хил ачухъвал, хъугъвал алди хьуб, 23гъянивал, жвув хилиъ дисувал кахьра. Гьамцдар ляхнариз закон лазим дар. 24Месигь Исайиндари, чпин гунагькар бедендин вари дерккуз даршлу ва чиркин тямягьяр хачрак карсна. 25Ухьу гьамус Рюгьнахъ хъайиган, гъачай, Рюгьну кӏурайиси, апӏурхьа! 26Гьаддиз, фурс кубчӏвуз гъузидархьа, чиб-чпик хъял капӏидархьа, чиб-чпʼин бахил шули хьидархьа!