Gal 6 | TabIBTNT | STEP | Гъардшар, эгер шли гунагь гъапӏиш, учву, рюгьнахъ хъайидари, тахсир гъапӏур гъяниди дюз рякъюхъна духну ккунду. Лиггьа, жвувканра гьациб тахсир ктудубчӏвбан бадали, жвувʼин ул алди гъуз!

‏ Galatians 6

Чиб-чпиз кюмек апӏури йихьай

1 Гъардшар, эгер шли гунагь гъапӏиш, учву, рюгьнахъ хъайидари, тахсир гъапӏур гъяниди дюз рякъюхъна духну ккунду. Лиггьа, жвувканра гьациб тахсир ктудубчӏвбан бадали, жвувʼин ул алди гъуз! 2 Гьардиз чаин алиб апӏуз кюмек апӏури гъузай, гьаци учву Месигьдин закон кӏулиз адабгъидичва. 3 Шлиз, чав фукӏа дарапӏишра, учв заанди рякъюраш, дугъу учв алдатмиш апӏура. 4 Гъит, гьарсари аькьюллуди чпин ляхнарикан фикир апӏри, ва гьадмуган дугъхьан, чан хъуркьувалариз дилигну, фурс апӏуз хьибди, ва дугъу чан ляхнар жарадариндарихь тевдар, 5 фицики, гьарди чаин алиб апӏиди.

6 Шли Аллагьдин гафнан аьгъювалар гъадагъураш, гъит, гьадгъу, чаз айи вари хазнайикан, чаз улупурайиризра капӏри.

7 Жвуву жвув алдатмиш мапӏанай: Аллагь ахмакь апӏуз хьибдарчвухьан! Адмийи, фу гъубзиш, гьадму ккадабцӏиди! 8 Чан гунагькар беден бадали убзрури, ккадабцӏруб аьжал хьибди. Хъа Рюгь бадали убзрури, Рюгьнахьан гьаргандин уьмур ккадабцӏиди. 9 Гьаци вуйиган, ужʼвал апӏуру кӏури эргувалиъ кӏул ипдархьа, ва гьадмуган, эгер хътадахъиш, ухьуз улупнайи вахтна бегьер ккадабцӏидихьа. 10 Магьа гьаддиз, вахт имиди, варидариз ужʼвал апӏидихьа, иллагьки, хъугъувалиъ саб хизан гъашидариз.

Павели чан кагъаз ккудубкӏура

11 Гьамус узу учвуз йиз хусуси хилʼинди бикӏураза – гьаму аьхю гьярфар рякъюрачвузки? 12 Хъа учвухьди суннатнан аьдатар хъауз гъитрудари, чпи адмийириз ккун хьузди гьаци апӏура, фицики дурариз Месигьдин хачралантина чпихъ хъергри ккундар. 13 Дурари, аьдатниинди чпин суннат дапӏнашра, Къанундиъ улупнайи аьдатар хъаъри шулдар. Дурариз, аьдатназ дилигну, ичв суннат апӏуз ккунди а. Гьаци дурариз чпин тяриф за апӏуз ккунду. 14 Хъа узуз, ихь Агъа Месигь Исайин хачрииндитӏан гъайри, жарабдиинди фурс апӏуз ккундарзуз. Узуз – дюнʼя думу хачрак кабсна ва дюнʼяйиз – узу думу хачрак карсна. 15 Суннат дапӏну ашра – адаршра, мидлан фукӏара шулайиб адар. Мушваъ ккундайиб: жвув Аллагьдиз цӏийи кас хьувал ву. 16 Мясляаьт ва ужʼвал ибшри гьамци апӏрудариз ва Аллагьдин Израилиз!

17 Гъит, гьамусдихъантина узу гьич сарира пашман дарапӏри, фицики йиз бедендиин Исайин лишнар ал.

18 Ихь Агъа Иса Месигьдин ужʼвал ичв рюгьнахъди ибшри, гъардшар. Амин!