‏ Hebrews 11

Хъугъувалин мисалар

1Хъугъувал – ихь миж кайибдиз саб шак адарди ккилигуб ва гьелелиг дярякърайиб дугъриди а, кӏуру гаф ву. 2Ихь абйир, гьациб хъугъувалиинди уьмур хъапӏну, баркаллагьназ лайикь гъахьну.

3Ухьу, хъугъувал ади, Аллагьдин амри дюнʼя халкь дапӏнайиб ва вари рябкъюрайиб дярябкърайибдикан арайиз дуфнайиб, аьгъяхьуз.

4Авели, хъугъувал ади, Аллагьдиз Каиндитӏан ужуб гъурбан гъабхну. Дугъу гъабхи гъурбан Аллагьди, дугъан хъугъувализ дилигну, кьабул гъапӏну ва гьаддиинди думу гьякьра гъапӏну. Дугъан хъугъувалин мисал, гьеле думу учв чӏивиди имдаршра, гъира кмиди ухьуз метлеб ади гъубзрахьуз.

5Енох, хъугъувал ади, чӏивидимиди гьаму дюнʼяйиан гъурхнийи. Думу агури гъахьнушра, гьич сабишваъкьан гъидихъундайи, гьаз гъапиш Аллагьди думу Чахьна гъурхнийи. Хъа гьадмугандиз, гьаму дюнʼяйиан учв гъадагъайиз дугъу хъугъну, Аллагьдиз ккуниси апӏуйи, ва дугъʼин Думу разира гъахьнийи. 6Хъугъувал адарди Аллагьдиз ккуниси апӏуз шлуб дар, гьаз гъапиш Дугъахьна гъюру гьарсар кас, Аллагь айивалихъ ва Учв агруриз Дугъу пешкеш туврувалихъ хъугъну ккунду.

7Нюгьдиз улубкьуз ккайибдикан, чаз думу фу-вуш рябкъяйизра, улихьмиди хабар дебккнийи ва дугъу, хъугъувал ади, Аллагьдихъ хъебехъну, дюнʼя ккапӏру штарихьан чан хизан уьбхюз гими гъапӏнийи. Аьхирки дюнʼя жазайикк ккипуз гьял гъапӏнийи, хъа думу чан хъугъувализ гъилигу гьякьвал гъурубкьу ирсчи гъахьнийи.

8Хъугъувал ади, Ибрагьим, Аллагьди чаз дих гъапӏубси, Дугъаз мютӏюгъ духьну, фила-вуш ирсди жил тувдиза, кӏуру гафниин элеъну, гьеле дугъаз учв наана гъягъюрашкьан аьгъдарди, гьадина гъушнийи. 9Хъугъувал ади, думу, Аллагьди гаф тувну гъурубкьу жилиин, жара йишвʼан удучӏвну гъафи адмиси, чадрарикк яшамиш хьуз хъюгъну. Дугъахъди чадрикк Исакьра, Якьубра яшамиш гъахьну. Тувнайи гафниинди жил гьадраризра дурубкьну ккундийи. 10Фицики Ибрагьим ижми бинайиин диврайи шагьриз ккилигурайи. Думу шагьур фициб шулуш, капӏрур ва апӏрур Учв, Аллагь вуйи.

11Хъугъувал ади, Ибрагьимдикан чан шив Сарайик, гьеле думу бицӏидар даршлур вуйишра ва кьюридра лап кьабидар вушра, бицӏир киршнийи, фицики Ибрагьимдин миж чаз гаф туву Аллагьдик кади гъабхьну. 12Ва гьациб жюрейиинди сар адмийикан, учвра беден кьаби-кьюци дубхьнайирикан, завуъ хядаркьан ва гьюлихъ гъумкьан гизаф инсанар гъахьну.

13Вари гьадму адмийир, хъугъну ва, чпиз гаф тувнайиб улубкьайиз, гъийихну. Дурариз думу гаф тувнайи уьлке ярхлаан гъябкънийи ва рази гъахьнийи. Дурариз, чпи му дюнʼяйиъ гъурабйирди айиб ва вахтназтӏан даруб аьгъю гъабхьнийи.

14Чпи гьацдар вуйиб гьисаб апӏурайидари, гьаддиинди чпин Ватан абгурайивал улупура. 15Эгер дурари чпи дипну гъушу ватандикан фикир апӏури гъахьнийиш, дурариз дина кьяляхъ хътакузра мумкинвал айи. 16Хъа, дугъридан, дурар ужубтӏан-ужуб ватандихъ хъчӏарккурайидар вуйи – аьршаринубдихъ. Гьаддиз Аллагьдиз, Узу дурарин Аллагь вуза, пуз начди дар, фицики Дугъу дурариз шагьур гьязур дапӏна.

17– 18Хъугъувал ади, Ибрагьимди Аллагьди учв ахтармиш апӏурайи вахтари чан бай гъурбанди гъахнийи. Дугъаз гаф тувнайи ва думу, гьеле Аллагьди чаз, «Исакьдилантина увуз насил хьибдивуз» дупнайишра, хъайи-хъадру сар бай гъурбан апӏуз гьязур гъахьнийи. 19Ибрагьимди Аллагьдихьан дукӏнайирра чӏиви апӏуз шул, кӏури, хиял дапӏнайи, ва, гьаци кӏури гъабшиш, дугъриданра, Исакь дукӏнайидаригъян кьяляхъ гъадагънура вуйи.

20Хъугъувал ади, Исакьди чпин ярхи уьмрариъ Якьубдизна Исавдиз, Аллагьдин ужувлар ишричвуз, гъапнийи.

21Хъугъувал ади, йикӏурайи Якьубди Юсуфдин баяриз жа-жаради Аллагьдин ужувлар ишричвуз, гъапнийи, хъа чан маргълин кюмекниинди Аллагьдиз икрам гъапӏнийи.

22Хъугъувал ади, чан уьмур ккудубкӏурайиган, Юсуфди израилар Египетдиан удучӏвну гъягъбакан гъапнийи ва йикӏбалан кьяляхъ гъузру чан кӏурбарин гьякьнаан васият гъапӏнийи.

23Хъугъувал ади, Мусайин абйир-бабари думу, бабкан гъахьиси, шубуб вазлин айитӏ гьитӏикӏну гъюрхнийи, гьаз гъапиш дурариз думу гьадмукьан уччвурди гъяркънийики, абйир-бабариз паччагьдин буйругънахьан гучӏ гъабхьундайи.

24Хъугъувал ади, аьхю гъахьи Муса, учв фараондин шуран бай ву, кӏурайивалихьан гьудучӏвнийи. 25Дугъу, Аллагьдин халкьдихъди сабси, цӏиб вахтназтӏан дару гунагь ляхнарикан кефер ктагъайиз, аьзабарикк ккахъуб ктабгънийи. 26Дугъаз, чаз фициб пешкеш ккилибгураш, гъябкънийи, гьаддиз Месигь бадали учв аскан апӏуб Египетдин вари девлетартӏан багьади гъабхьнийи. 27Хъугъувал ади, думу, фараондин хъюлхьан, гучӏ ктарди, Египетдиан удучӏвнийи. Дугъу, чан улихь Дярякърур рякъюри, вари аьгь гъапӏнийи. 28Хъугъувал ади, дугъу израилариз Пасхайин машквар апӏинай, сифте бабкан гъахьидар йихури гъючӏвнайи пуч апӏрури дурарик ктручбан бадали, урчӏарикан ифи кадатай, гъапнийи.

29Хъугъувал ади, халкь, жилиланси, Уьру гьюллантина гъушнийи; хъа египтаризра гьаци апӏуз ккун гъабхьиган, дурар вари ккахьну гъарагънийи.

30Израиларин хъугъувалиинди Ерихон шагьрилан илтӏикӏнайи зурба цалар, душвлан ургуд йигъан хъади-хъади илтӏикӏган, гьарагъну ахьнийи.

31Кьяппади лихурайи Рахав, хъугъувал ади, душмандин тереф ахтармиш апӏурайи израилар мясляаьтниинди кьабул гъапӏган, хътругърударихъди тӏанкь гъахьундайи.

32Артухъ хъана фу кӏуза? Узуз Гедеондикан, Варакайикан, Самсондикан, Ефтайикан, Давуддикан, Самуиликан ва пайгъамбрарикан пуз вахт адарзуз. 33Дурари, хъугъувал ади, гьюкуматар дисуйи, дугъривал ипуйи, гаф тувнайиб дурарихьна рубкьуйи, асланарин ушвар хъяркьюйи, 34гъизгъин цӏа ктӏубшвуйи, учӏру ханжларихьан чпи уьрхюйи. Дурарин зяифвал кьувватназ илтӏибкӏуйи, дурар дявдиъ кьувватлу шуйи ва алжагънайи къушмар гьергну гъягъюз гъитуйи. 35Дишагьлийирихьна, чӏиви духьну, чпин дийихнайи багахьлуйир кьяляхъ гъюйи. Гьацӏарикан, чпиз улупу азадвалихьан думутӏан лап ужуб уьмриз чпи чӏиви шлуб аьгъяди гьудучӏвган, йикӏру гьялнахъна хру аьзабар кчӏюкьюйи. 36Гьатмундари чпиин аьлхъюри хьувалар ва урччвувалар, хъа гьацира зунжрар ва дустгъар аьгь апӏуйи, 37жарариин гъвандин жвар уьлюбхюйи, кьюб йишвʼина парчйир апӏуйи, ханжларихьди йихуйи, сасдар марччаринна цӏигьарин гъидкьариъди уьлкйириъ ахъуз мажбур шуйи, сасдариз фукӏара гьубкӏну адайи, сасдарихъ хъергуйи ва сасдарикан, рихшанд апӏури, зивзивар кчӏюкьюйи. 38Хъа саспидар, чпи вари дюнʼятӏан багьа вуйидар, ичӏи чюллериъ, дагълариъ, хьарариъ ва чӏуру гъярариъ уьргъну ими.

39Дурар варидарикан, чпин хъугъувализ дилигну, Аллагь рази гъахьнийи. Дурариз саризра чӏивидимиди чпиз гаф тувну рубкьруб гъурубкьундайи, 40гьаз гъапиш Аллагьди ухьузра кади, гьадрарихъди ухьура гьуркӏувалихъна гъюбан бадали, фу-вуш лап ужуб гьязур дапӏна.