‏ Hebrews 12

«Аллагь учвуз Чан баяризси лигури шулу»

1Лигай, ухьлан, дифаркьан, шагьидар илтӏикӏна! Гьаддиз гъачай, ухьлан ухьуз гьергуз машат апӏурайиб ва гьацира ухьу алдакуз гъитрайи гунагь вари илдипурхьа ва сабурлуди ухьуз кадабтӏнайи манзил ккадапӏурхьа. 2Зат ктӏатӏарццди Исайиз лигури гъузурхьа. Думу, ихь хъугъувалин ккергъубра ва ккудукӏубра ву. Дугъу, гъюз ккайи шадвал бадали, беябурваликкди хачриин аьзиятар аьгь гъапӏну ва гьамус Думу, Аллагьдин тахтнан арччул терефнахъинди деъна.

3Гьамциб даккнивал гунагькрарин терефнаан аьгь Гъапӏурикан сацӏиб фикир апӏинай. Миди учвуз, ичв юкӏв-рюгь усалвалиъ адрабхъуз ва рюгь дурубгуз кюмек апӏидичвуз.

Аллагь Адашдиз ухшар ву

4Учвуз сабан гунгьихъди ифи ктипайиз элегуб алабхъундарчвуз. 5Учвуз Жвуван веледаризси дупнайи аьшкь капӏру гьамцдар гафар кӏваълан гьархначвуз: «Йиз бай, Аллагьди увуз жаза адабтӏурайивал ибак апӏури апӏин,
Думу увуз хъжагъруган, мукуцухан.
6Фицики Аллагьди жаза Чан юкӏв алидариз адабтӏури шулу ва
Чан байди кьабул дапӏнайириз
йивури шулу».

7Учву аьгь апӏурайи жазйир учву вердиш апӏурайивалин саб пай ву. Аллагь учвуз Чан баяризси лигури шулу. Адашди жаза тутрувру бай шлуб вуйин? 8Эгер учвуз жаза адабтӏури гъахьундарш, – хъа гьарсариз жаза адабтӏури шулу, – учву бичди гъахьидар вучва, гьякь баяр дарчва. 9Ухьухъ варидарихъ му жилиин жаза адабтӏу адшар гъахьунхьухъ, ва дурарин ухьу гьюрмат уьбхюйхьа. Хъа яшамиш хьуз, фукьан артухъ ухьу ихь рюгьярин Адашдихъ хъпехърудар духьну ккунду! 10Ихь адшари ухьу саб вахтназтӏан вердиш гъапӏундар – думура ккабхъубси. Хъа Аллагьди, ухьура Чан гирамивалин иштиракчйир хьпан бадали, ухьуз ужʼвал ибшри, кӏури, вердиш апӏурахьу. 11Ухьуз фициб жюре жаза вушра, шадвал хруси ваъ, хъа иццрушназ вуйибси гьугъубжвурахьуз. Хъасин, жазайиинди вердиш дапӏнайири, дугъривалинна мясляаьтнан бегьер ккадабцӏури шулу.

12Гьаддиз амансуз хилар ва зяиф кьамкьар ижми апӏинай. 13Дюз рякъюъди, ликуриз зиян шлуси ваъ, хъа сагъ шлуси, гъарахай.

Аллагьдихьан ярхла махьанай

14Вари адмийирихъди мясляаьт ади яшамиш хьуз ва гирамидар хьуз ял апӏинай – гирамивал адарди, гьич сарихьанра Агъа рякъюз хьидар. 15Лигайки, гьич сарра Аллагьдин ужувлахъ мягьрум даришри ва кьутӏкьли кьаблиси зарар-зиян тувруси дарибшри, гьацдарилантина чиркин даришри. 16Лигай, учвкан сарира кьяппавал мапӏанай ва, саб гъаб ипӏрубдихъ хизандиъ аьхю бализ айи ихтиярар масу туву Исавси, Аллагьдихьан гьадмукьан ярхлади махьанай. 17Учвуз аьгъячвуз, хъасин Исавдиз чан ихтиярар кьяляхъ апӏуз ккун гъабхьнийи, аммаки думу тина гъапӏнийи. Дугъхьан, чпин адашди гьял гъапӏуб, гьеле уларилан рубзури гьаддикан ккун гъапӏнийишра, дигиш апӏуз гъабхьундайи.

18Учву хил кучуз даршлу ва цӏа алабхъну убгурайи дагъдихьна, мучӏувалихьна, пашманвалихьна ва тӏурфнахьна дуфнадарчва. 19Зурнайин сеснахьна ва улхурайи дихнахьна дуфнадарчва. Думу дих гъеебхьдари чпикди улхуб давам дарапӏуз миннат апӏуйи. 20Инсанарихьан чпиз дебкку гьамциб табшуругъ аьгь апӏуз шулдайи: «Эгер гьяйванат гьаму дагъдик кубкьиш, думу, йивури гъванар, йибкӏну ккунду». 21Думу шиклихьан гьадмукьан гучӏ айики, гьеле Мусайира кмиди гьамци гъапнийи: «Узу гукӏнишин кабхъну йикӏуразу».

22Ваъ! Учву Сион дагъдихьна, чӏиви Аллагьдин шагьрихьна, Аьршарин Ерусалимдихьна дуфначва! Учву шадвалин мяракайиз уч духьнайи агъзрариинди малайикарихьна дуфначва. 23Учву, аьршариъ ччвурар дидикӏнайи, сарпидар вуди бабкан гъашидарин мяракайиз дуфначва. Учву вари халкьарин суд апӏру Аллагьдихьна ва гьуркӏу дугъридарин рюгьярихьна дуфначва. 24Учву, Исайихьна, ЦӀийи Йикьрар Дерккурихьна, Авелин ифитӏан ужуди улхурайи кибчру Дугъан ифдихьна дуфначва.

25Лигай, учвухьна илтӏикӏурайи Аллагь тина мапӏанай. Израиларихьан гьаму жилиин гафар апӏурайирихъ хъпебехъган гьадабтӏу жазайиккан кӏул ккадабгъуз дархьиган, дидлан артухъ аьршариан гафар Апӏурайирихьан гьудучӏвиш, ухьхьанра кӏул ккадабгъуз хьибдар. 26Думуган Дугъан дихну жилар тӏурччвуйи, хъа гьамус Дугъу гаф тувна: «Узу саб ражарисана жилар тӏурччвидиза, неинки жилар, хъа гьацира аьршарра». 27«Саб ражарисана» кӏуру му гафар: вари халкь дапӏнайибдикан вари ккадабшвруб ва саб вахтназтӏан даруб дубгди, хъа ккадабшвуз даршлуб гъубзди, кӏурайидар ву.

28Гьаци вуйиган ухьуз ккадабшвуз даршлу Паччагьлугъ рубкьурайиган, чухсагъул кӏури гъуздихьа, гьюрматлудина гукӏунди Аллагьдиз икрам апӏури гъуздихьа, 29гьаз гъапиш ихь Аллагь – вари хътӏюбкьру цӏа ву.