‏ Hebrews 13

Аьхиримжи насигьятар

1Учву гъардшарси чиб-чпи ккун апӏинай. 2Рякъюъ айидар кьабул апӏруваликан кӏваълан магьарханай. Гьаци апӏрудари, чпизра аьгъдарди, малайикар хялижв апӏури шулу. 3Дустгъариъ айидар, гьадрарихъди дустгъариъ айидар учву вуйибси, кӏваин алаури апӏинай. Улуржурайидар, гьадрарихъди аьзабариъ учвура айибси, кӏваин алаури апӏинай.

4Нюкягь гьюрматлуб ва марцциб дубхьну ккун. Аллагьди, чан жилир вая хпир гъитну, гъирагъдиъ ул айир ва кьяппавал апӏрур жазайиз тувди.

5Пул ккун апӏувалихьан шлубкьан азадди гъузай. Учвуз айибдиин разиди гъузай, фицики Аллагьди гъапну: „Узу уву сарди гъитдарза ва гатӏахьдарза“.

6Гьаци вуйиган ухьхьан саб шак адарди пуз шулухьхьан: “Агъа – йиз Кюмекчи вуйиз,
узуз сабдихьанра гучӏ адарзуз.
Инсандихьан узуз гьапӏуз шул?“

7КӀваин апӏинай учвуз Аллагьдин гаф улупдар: дурарин уьмриз ва аьжализ лигури, гьадрарин хъугъувал учвуъра ади гъузай. 8Иса Месигь накьра, гъира, гьаммишанра зат дигиш шлур дар.

9Ужувлан хабарназ къаршу гьар жюре каламари учву гьякьʼвалихьан гьадауз мигъитанай. Юкӏвар, фициб хураг ипӏуруш, гьаддин къайдйириинди мюгькам дарапӏди (дурар тамам апӏрудариз дурари хайир гъабхундар), хъа Аллагьдин ужувлиинди апӏуруш, ужу шул. 10Ухьуз ихь хусуси гъурбнар хрушв ахьуз. Душвʼан гирами Чадриъ гъуллугъ апӏурайидариз хураг ипӏуз ихтияр адар.

11Аллагьдин заан гъуллугъчийи „Лап Гирамишваз“гьяйванатарин ифи хура – му гъурбан гунгьарихъанди вуйи – хъа жандкар чӏатанишваъ ургура. 12Гьаци Исайира, шагьрин урнарин чӏатанди, Чан ифдиинди халкь гирами апӏбан бадали, аьзаб гъизигнийи. 13Гьаддиз гъачай ухьура, Гьадму ккахъу беябурвал ухьура пай апӏруси, Дугъахьна шагьрин урнарин чӏатинди удучӏвидихьа. 14Ухьуз му жилиин гьаргандин шагьур адархьуз, ухьу гъюз ккайи шагьриз ккилигурайидар вухьа.

15Гьаммишан Аллагьдиз, Дугъан ччвур рабгъури, ушвниан удучӏвурайи тярифнан гъурбнар Исайилантина хидихьа. 16Ужʼвал апӏуз ва гьудрубкӏрудариз тувуз кӏваълан магьарханай – мицдар гъурбнар Аллагьдиз кабалгрудар ву.

17Учвуз аькьюл-насигьят туврайидарихъ хъпехъури, мютӏюгъ йихьай. Дурар, ул иливну даърахди, ичв юкӏварин гъайгъушнаъ а, гьаз гъапиш дурариз чпи Аллагьдин улихь жаваб тувруб аьгъя. Дурари чпиин али гъуллугъ, гъагъи бала алиси, тямягь хътру саягъ тамам апӏруси мапӏанай, фицики дидкан учвуз айи хайир адар, хъа разивалиинди кӏулиз адабгъруси, ичв терефнаан кюмек апӏинай.

18Учу бадали ккарагури йихьай. Ич намус марцци вуйивалик ич саб шак кадарич, ва варибдиъ дугъриди гъузуз ккундучуз. 19Хъа гизафна-гизафси узу учвухьна ухди хъадакну гъюз ккарагай.

20Гъит, мясляаьтнан Аллагьди, марччарин зурба Марччлихъан вуйи, Чан ифдиинди гьаммишандиз вуйи Гирами Йикьрариин печать гъиву ихь Агъа Иса чӏиви Гъапӏури, 21учву Чан ният тамам апӏру гьарсаб ужуб ляхнихъ хъаъри. Ва, гъит, Иса Месигьдилантина Дугъу ухьу, Чаз ккуниб апӏруси, гъитри. Хъа Иса Месигьдин, гъит, гьаммишандиз ад ибшри. Амин.

22Гъардшар, узу учвуз миннат апӏураза, учвук юкӏв капӏрайи гьаму гафар сабурлуди кьабул апӏинай, фицики му йиз кагъаз думукьан ярхиб дар.

23Аьгъю йибхьай, ихь гъардаш Тимофей азад гъапӏну. Эгер думу багарихьди мина гъафиш, узу учвухьна гьадмура хъади гъидиза.

24Ичв вари аьхюдариз ва Аллагьдин гирами вари халкьдиз – саламар. Италияйианра Иса Месигьдин терефкрари учвуз саламар хътаура.

25Гъит ужʼвал учвухъ варидарихъди гъубзри!