Heb 2 | TabIBTNT | STEP | Магьа гьаддиз, дюз рякъʼан ададахъбан бадали, ухьуз гъеебхьубдиз варитӏан уччвуйи фикир тувну ккунду.

‏ Hebrews 2

Иса Месигьди туврайи уьрхювал варитӏан зиина ву

1 Магьа гьаддиз, дюз рякъʼан ададахъбан бадали, ухьуз гъеебхьубдиз варитӏан уччвуйи фикир тувну ккунду. 2 Ухди малайикариланмина тувнайи Аллагьдин Гафнаъ кьувват айи ва гьарсаб дюз дарувализ ва хъпебехъувализ гъилигу жазара гьадабтӏуйи. 3 Хъа гьамус, зурба уьрхювал кьабул дарапӏиш, гьадабтӏру жазайиккан ухьхьан сарун фици гьергуз хьибди? Чав Агъайи сифте му уьрхювал ухьуз дебккну, му Гьадгъукан гъеебхьдари тасдикь гъапӏунчуз. 4 Агъа Исайин Хабар гьякь вуйивал Аллагьди аьжайиб лишнариинди, аьламатариинди, гьар жюреди ачмиш шлу кьудратниинди ва Чан ниятниинди Чаз ккунириз тувру Гирами Рюгьнан багъишар гьаъбиинди тасдикь гъапӏну.

Ухьу уьрхбан бадали, Иса Месигь адмийиз илтӏикӏну

5 Учу кӏурайи гьамус цӏийиди арайиз гъюру дюнʼя Аллагьди малайикарин хилиъ иврадар. 6 Хъа сари наан-вуш тасдикь гъапӏну: „Адми гьапӏрур ву, Уву дугъхъан гьадмукьан юкӏв убгуз?
Инсандин бай гьапӏрур ву, Уву дугъан гьадмукьан гъайгъушнаъ хьуз?
7 Уву думу малайикартӏан цӏиб вахтназтӏан исинди дерккундарва.
Уву дугъаз аднан ва гьюрматнан таж тувунва.
8 Вари Уву дугъан ликарикк, дубхну, дипунва!“

Аллагьди инсандиз вари мютӏюгъ гъапӏну. Дугъаз мютӏюгъ даруб Аллагьди фукӏара гъибтундар. Гьелелиг инсандиз вари мютӏюгъ дапӏну рябкъюрадархьуз. 9 Ухьуз Иса сацӏиб вахтназ малайикартӏан исинади Дерккур гьамус адлуди ва гьюрматлуди рякъюрахьуз, гъаз гъапиш аьжаликк ккахъур Гьадму ву. Фицики Аллагьди ухьуз ужʼвал дебккбан бадали, гьарсарин аьжалнахъанди Думу Учв аьжализ гъушну.

10 Гьаци дубхьнура ккундийи. Аллагьдиз Чан Рюгьнахъди гъягъру гизаф веледар адлу духьну ккундийи. Дюнʼяйиъ айиб вари Аллагь бадали ву ва дюнʼяйиъ шулайибра вари Аллагьдилантина шулайиб ву. Хъа дурар адлу апӏуз Аллагьди Иса гьязур апӏуру. Дугъу Дугъкан, гизаф веледар уьрхбан бадали, гьацдар аьзабариантина духну Гьуркӏур гъапӏну. 11 Адмийир гирами Апӏруризра, гирами шулайидаризра – варидариз сар Аьршарин Адаш а. Гьаддиз Исайиз, дурар Чан гъардшар вуйиз пуз, начди дар. 12 Дугъу кӏура: «Йиз гъардшариз Яв ччвур улупидиза
ва вари хъугърударин арайиъ Яв адназ мяълийир апӏидиза».

13 Дугъу кӏура: «Узу Гьадгъак миж кади хьидиза».

Ва хъана: «Магьа Узу ва Аллагьди Узуз туву веледар».

14 Хъа веледар йиккканна ифдикан духьнайидар вуйиган, Дугъу Чахъра гьациб беден хъивну. Дугъу дици, Чан аьжалниинди аьжалин зиин гьюкум али иблисдихьан гьюкум бисузди, 15 вари чпин уьмриъ аьжалин улихь гучӏури лукӏарди дугъужвнайидар азад апӏузди гъапӏну. 16 Рябкъюрайиси, Дугъу кюмек малайикариз апӏурадар, хъа – Ибрагьимдин наслариз. 17 Гьаддиз Месигь, Учв халкьарин гунгьарихъанди ккахъбан бадали, вари терефарихъанди, Чан гъардшар фицдар вуш, гьацдарсир духьну ккундийи. Гьацир хьубʼинди Дугъкан ужʼвал ккуни ва дугъриди Аллагьдин гъуллугънаъ шлу заан Гъуллугъчи ктучӏвнийи. 18 Вари Чаин алахьу ахтармишнан аьзиятариан Думу удучӏвну. Гьамус Дугъхьан ахтармишнан аьзиятнаккан гьарсариз кюмек апӏуз шулу.