Heb 4 | TabIBTNT | STEP | Сабан кьан дубхьнадар, ва Аллагьди тувнайи гаф – рягьятвал туврушваъ учӏвуз шлувал – кьувватнаъ ими, гьадму рягьятвал дурубкьди гъудрузбан бадали, гъачай гизаф дикъатлуди гъузурхьа.

‏ Hebrews 4

Аллагьди рягьятвалин йишв Чан халкьдиз тувди

1 Сабан кьан дубхьнадар, ва Аллагьди тувнайи гаф – рягьятвал туврушваъ учӏвуз шлувал – кьувватнаъ ими, гьадму рягьятвал дурубкьди гъудрузбан бадали, гъачай гизаф дикъатлуди гъузурхьа. 2 Ухьузра, гьадму гъалабулугъ гъитӏибккрударизси, рягьятвалин Ужувлан хабар ктибтнийи, хъа думу Хабарнакан дурариз хайир гъабхьундар, гьаз гъапиш дурари думу хъугъувалиинди кьабул гъапӏундар. 3 Хъа ухьу, гьадму Хабарнахъ хъугъдар, Дугъу рягьятвал туврушваъ учӏврахьа. Хъа хътругърударикан Аллагьди гъапну: «Гьаддиз Узук хъял кмиди гьамци ху гъапӏунза:
дурар чпиз Узу рягьятвал туврушваъ учӏвидар».

Дугъу мици, гьеле Чан ляхин дюнʼя арайиз хайиз ккудубкӏну айивализ дилигди, гъапнийи. 4 Жара йишваъ Дугъу ургудпи йигъкан гьамци дупна: «Ургуд гъапи йигъан Аллагь, Чан вари ляхнар ккудукӏну, саламат гъахьнийи». 5 Аммаки зиихъ: «Дурар чпиз Узу рягьятвал туврушваъ учӏвидар» – дупнайи гафар кӏваинди гъитай.

6 Гьамусра Дугъу рягьятвал туврушваъ аърувалин гаф кьувватнаъ ими. Хъа Ужувлан хабар ухди деебхьнайидарихьан, чпин хъпебехъувализ лигну, душваъ учӏвуз дархьиган, 7 Аллагьди, ичӏи чюлиъ гъахьи гьядисйирихъан лап кьанди, хъана саб йигъ улупну – «Гъи». Дидкан, зиихъ гъапиганси, Давуд паччагьдиланмина хабар дебккна: «Гъи, эгер учвуз Дугъан дих ебхьураш,
ичв юкӏвар мючӏюркьянай».

8 Эгер мушваъ дурариз Ешуайи туву рягьятвалин йишвкан, яни Ханаандин жиликан улхури айиш, сарун Аллагь дидин кьялхъян саб жара йигъкан улхидайи. 9 Гьаддиз Аллагьдин халкьдиз рягьятвал гьамус рябкъюз ккимбуб ву. 10 Аллагьди рягьятвал туврушваъ учӏвури, Аллагьди Чан ляхнарихъан фици рягьятвал гъадабгъураш, гьаци рягьятвал гъадабгъиди. 11 Гьаддиз гьадрарси, чпин хъпебехърувалилантина фужкӏа алдадакбан бадали ва гьадму рягьятвал туврушваъ учӏвбан бадали, ухьʼан удукьруб вари апӏидихьа.

12 Фицики Аллагьдин гаф яшамиш шула ва либхура. Думу гаф кьюбиб мурзарра учӏру дапӏнайи ханжалтӏан учӏруб ву. Думу гаф, ихь инсанвалин варитӏан деринариз: юкӏвна рюгь, йиккна кӏураб жара шлушвариз ва кӏурбарин мааризкьан гъябгъюру. Гьадму Гафну фикраринна кӏван хияларин суд апӏуру. 13 Халкь дапӏнайи вари дюнʼяйиъ Аллагьдин улихь гьитӏибкӏнайиб гьич фукӏара адар. Дугъан улихь вари ачухъди ву. Дугъан улариз вари рябкъюру. Ари Гьадгъан улихь ухьу жавабра тувдихьа.

Иса Месигь – Аллагьдин заан Гъуллугъчи ву

14 Ухьухъ зурба вуйи Аллагьдин заан Гъуллугъчи хъахьухъ – аьршариз Гъушур. Думу – Аллагьдин Бай, Иса ву. Гьаддиз гъачай, хъугъну, учу ктибтурайи гьякьʼвалихъан ижмиди хъичӏихну гъуздихьа. 15 Ихь заан Гъуллугъчи ихь камиваларин гъавриъ адрахърударикан дар. Думура, ухьуси, гунгьариъ ктарди, вари аьзаб-аьзиятариъ Ахъур ву. 16 Гьаддиз ухьхьан, саб гучӏ адарди, ухьуз рягьим апӏуз ва лазим вахтназ кюмек бадали ухьуз ужʼвал тувуз, Ужувлан тахтнахьна гъюз шулухьхьан.