Hebrews 5
1Фицики Аллагьдин гъуллугънаъ шлу гьарсар заан гъуллугъчи адмийирин арайиан ктагъури гъахьну. Дугъу, Аллагьдин улихь адмийирихьан дугъужвуз шлуси, дурарин гунгьарихъанди Аллагьдиз багъишар хури, мал-марччлин гъурбнар апӏури гъахьну. 2Гьацир гъуллугъчи чпин аьгъдрувалиан улдугнайидарин гъавриъ ади духьну ккундийи, гьаз гъапиш чавра чан тямягьярикк ккахънайир ву. 3Гьамци вуйивализ дилигну, дугъу чан ва вари халкьдин гунгьарихъанди гъурбнар дапӏну ккундийи. 4Мициб гъуллугънаъ учӏвуб адмийихьан чахьан бисуз шлуб дар. Дугъаз, чан вахтна Гьарундиз дих гъапӏганси, Аллагьди дих дапӏну ккунду. 5Ари Месигьдира, заан Гъуллугъчи хьубʼинди Чав Учв адлу гъапӏундар, хъа Аллагьди Дугъаз гьамци гъапну: «Уву Йиз Бай вува.Гъи Узу Яв Адаш гъахьунза».
6Дугъу жара йишваъра кӏура: „Уву гьаммишандиз Аллагьдин Гъуллугъчи,
Мелхиседексир Гъуллугъчи вува“.
7Учв жилиин али вахтна Исайи гьарай ипну, нивгъариинди Учв аьжаликкан Уьрхруриз ккарагну ва Аллагьдин улихь улупу зурба гьюрматназ дилигну, Дугъаз думу гъеебхьну. 8Гьеле Думу Дугъан Бай вуйишра, Дугъаз Чаин алахьу аьзабарилантина хъпехъувалин кьимат аьгъю гъабхьну. 9Дугъкан, Гьуркӏур духьну, Чахъ хъпехърудариз варидариз гьаммишандин уьрхювал тувру Булагъ гъахьну. 10Аллагьди Дугъаз, Мелхиседекдиз ухшар айи заан Гъуллугъчи вува, гъапну.
«Учву Аллагьдин гьии гафарин читинди гъаври ахъурчва»
11Мидкан хъана гизаф пуз хьибдийчухьан, хъа учву гъапибдин читинди гъаври ахъурчва, хъпехъдарчва. 12Учву хъугърудар гъахьихъанмина гъубшу вахт гьисабназ гъадабгъуруш, гьамусдиз учвкан мялимар ктучӏвуз вахт ву, хъа рябкъюрайиси, Аллагьдин лап гьии гафарин гъавриъ тӏауз учвуз мялимар лазим шула. Учвуз сабан ижми хураг ваъ, хъа никк ккунди ими. 13Хъа никк убхърур, гьякьваликан цӏибтӏан аьгъдру тазади бабкан духьнайи бицӏир гьисаб ву. 14Ижми хураг аьхюдариз ву. Чпин тажруба айивализ дилигну, дурарихьан ужубна харжиб жара апӏуз шулу.
Copyright information for
TabIBTNT