Heb 6 | TabIBTNT | STEP

‏ Hebrews 6

1 – 2 Гьаддиз гъачай, Месигьдикан вуйи аьгъюваларин бинайиланзина яшназ дуфнайидариз вуйи аьгъювалариина улдучӏвидихьа. Ухьу гьамус хъана аьжалихъна гъахру гунгьар гардандиъ дисуваликан, Аллагьдихъ хъугъну ккуниваликан, штуан хьуваликан, хилар иливбакан, гъачӏидар чӏиви хьуваликан ва гьаргандин Суддикан вуйи аьгъюваларин бин хъана ккивуз хъюгъидархьа. 3 Хъа, Аллагьди гъитиш, улихь гъягъидихьа.

4 Гьаз гъапиш саб ражари Аллагьди аьгъювалар тувдар, заварин багъишдик тӏяаьм капӏдар, вари хъугърудариси, Гирами Рюгь кьабул гъапӏдар, 5 Аллагьдин гъяни гафнакан тӏяаьм гъабхьидар, гъюз ккимбу аьсрин кьувватнакан хабар айидар 6 хъугъувалихьан гьудучӏвиш, дурар хъана гунгьар гардандиъ дисбиинди таза алауз шлуб дар, гьаз гъапиш дурари чиб-чпиинди Аллагьдин Бай, Думу вари эллерин аьйибнакк ккитри, хачрак карсра.

7 Гагь-гагьнак чаина убгъурайи мархь зибгру жили учв тартиб апӏруриз ужуб бегьер тувру, дугъаз думу Аллагьди дебккнайи ужʼвал ву, 8 хъа варжина заз али хутӏил фукӏа дар. Дидиз бала гъядябхъюр ва, аьхирки, думу убгиди.

9 Аммаки йиз ккунидар, учу гьаци кӏурашра, учву ужуб гьялнаъ айивалик ва уьрхювалихъан хъичӏихнайивалик умуд кайич. 10 Аллагь дюз дарур хьуб гьич мумкин дар. Дугъаз я учву апӏурайи жафйир, я Чан гирами халкьдин гъуллугънаъ хьубʼинди улупу ва улупурайи Чахьна вуйи ичв ккунивал кӏваълан гьархидар. 11 Учуз ккунди айиб, учвкан гьарсар ичв кӏван метлебар бадали, аьхиризкьан гьяракатнаъ хьуб вуйич. 12 Учуз учву тӏагъру дапӏну ваъ, хъа жвуван хъугъувалииндина аьгь апӏбиинди Аллагьди тувнайи ирс рубкьрударси учвура духьну ккундучуз.

Аллагьди Чав туву гаф тамам дарапӏди гъибтдар.

13 Аллагьди Ибрагьимдиз гаф тувруган, Чав Чаинди ху гъапӏну, фицики ху апӏуз ужур сарун Учвтӏан зиина вуйир адайи. 14 Дугъу гъапну: „Гьапӏнура Узу увуз ужʼвал улупидиза ва Узу увуз гизафна-гизаф наслар тувдизавуз“.

15 Сабурлуди ккилигури гъахьи Ибрагьимдиз дугъриданра гаф тувнайиси гъабхьнийи.

16 Адмийири чпитӏан фтиинди-вуш зина ва багьа вуйириинди ху апӏури шулу. Ху апӏувал, гъапиб дюз ву кӏури, тасдикь апӏуб ву, ва диди гьарсаб гьюжат дебккру. 17 Гьаци Аллагьдира, Чан ниятар гьюдюхрудар дариз, кӏури, Чав гаф тувуриз ачухъди улупуз ккунди айиган, Чан гаф ху апӏбиинди мюгькам гъапӏну. 18 Ва гьаму кьюб гьюдюдюхру мутму – гаф тувувална ху апӏувал – Аллагьдин мурар кучӏал кайидар дар, ухьуз, чара абгури, улубкьру ихь умуднахъан хъичӏихнайидариз, мюгькамди юкӏв капӏувал вухьуз. 19 Му умуд, ихь кӏваз хатӏасузвал хурайи ижми бин вухьуз. Миди ухьуз, чарчликк ккайи Гирамишван айитӏинди учӏвуз ихтияр туврахьуз. 20 Ари гьадушвазди, Мелхиседекдиз ухшар ади, гьаммишандиз заан Гъуллугъчи духьну, ихь улихьди гъафи Иса учӏвну.