‏ Hebrews 9

Сабпи Йикьрарнаъ Аллагьдиз фици икрам апӏуруш

1Сабпи Йикьрарнаъ Аллагьдиз фици икрам апӏуруш ва жилиин гирами йишв фунуб вуш, улупна. 2Гирами Чадур гъапӏнийи. Душван сабпи хулаъ акв апӏру алат ва Гьаммишанурин улихь дивру уьлер али устул дивнайи – му йишваз „Гирамишв“кӏуйи. 3Кьюбпи хал сабпибдихьан чарчнахьди гьадабтӏнайи ва душваз „Лап Гирамишв“кӏуйи. 4Душваъ, ицци ниар хъайи ччимар ургру гъабсиб гъизилин саб алат ва варишварихъанди гъизилихьди дабалгнайи Гирами Йикьрарнан сундух айи. Сундхиъ, манна ади, гъизилин гъаб, кюкю адабшвуз кьюкьяр гъапӏу Гьарундин маргъ ва Гирами Йикьрар кайи гъвандин шибар айи. 5Сундхин зиин гъаравларди дапӏнайи хлинццар кайидар алийи. Дурар адлувал улупурайидар ву. Дурарин хлинццар сундхин гъапагъ вуйибси „хил алдабгърушв“кӏурайишвʼин гьатӏарццнайи. Хъа сабан ухьу дидкан вари хъайи-хъайиси пидархьа.

6Гьамци ккабалгну дебкку вахтарихъанмина Аллагьдин гъуллугъчйир гагь-гагьнак гирами Чадрин сабпи хулаъ чпин гъуллугъ тамам апӏуз учӏври гъахьну. 7Хъа кьюбпи хулаъ заан гъуллугъчийизтӏан учӏвуз ихтияр адарди гъабхьну, думура йисан саб ражари, чан ва вари халкьдин терефнаан, чпин аьгъдрувализ дилигну деетру гунгьарихъанди вуйи ифира хьади. 8Гьамци вуйиган, Гирами Рюгьну сабан гьадму гирами Чадур имидикьан гагьди „Лап Гирамишвазди“учӏврушв ачмишди даруб улупура. 9Гьамдиъ а гьамусдин вахтназра кайи мисал: багъишарихьанна гъурбнарихьан Аллагьдиз икрам апӏурайирин намус-гъирʼят марцц апӏуз шлуб дар. 10Думу къайдйир ипӏрубдизна убхърубдиз ва жара жюрейин жикӏбан аьдатаризтӏан кайидар дар. Мурар, цӏийи къайда дебккайиз кьувватнаъ гъузнайи, зиълан апӏурайи аьдатартӏан дар.

ЦӀийи Йикьрариинди Аллагьдин гъуллугънаъ фици шулуш

11Гьаму ражари ухьуз айи ужувларин заан Гъуллугъчи, Месигь, инсанарин хилари дарапӏу, гьадмугандиз айибтӏан лап заан ва тамам вуйи Чадриан, яни гьаму дюнʼяйин дарубдиантина удучӏвну. 12Думу душваъ кьунаринна кӏарарин ифи хьади, учӏвнадар; Думу, адмийирин гунгьарилан хил алдабгъувал гъазанмиш дапӏну, „Лап Гирамишваъ“саб ражари ва гьаммишандиз Чан ифи хьади учӏвну. 13Эгер кьунаринна жердарин ифи кибчруган ва жигьил хюни дубгну, дидкан гъабхьи рюкъ кабхьруган, чиркинвалари кацӏнайидар гьацдар аьдатариинди марцц гъахьи гьисаб апӏуйиш, 14хъа Месигьдин Ифди фукьан ужуди марцц апӏур?! Гьаммишандин Рюгьнан кюмекниинди Дугъу Аллагьдиз Учв гьич саб тахсир ктру гъурбан вуди тувну. Ва Дугъан Ифди, ухьу чӏиви Аллагьдиз икрам апӏрудар хьузди, аьжалихъна гъахру ляхнарихьан ихь намус-гъирʼят марцц апӏуру!

15Ари гьаддиз Месигьдилантина ЦӀийи Йикьрар, дих дапӏнайидариз тувнайи гафниинди гьаммишандиз вуйи ирс рубкьбан бадали, гъийитӏну. Дурариз думу ирс, гьеле сабпи Йикьрар кьувватнаъ имидитӏан гъапӏу чпин гунгьарилантина рубкьру аьжалихъанди Исайи Учв аьжализ тувиган, гъурубкьуб ву.

16Эгер адмийи фукӏа дапӏнаш, васият гъапӏу адми гъакӏигантӏан думу васият чан кьувватнаъ абхъидар. 17Васият дапӏнайир чӏивиди имбукьан гагьди, дугъан васият кьувват хъайиб дар. Васият кьувватнаъ, васият гъапӏур гъакӏиган, убчӏвра. 18Гьаци сабпи Йикьрарра, ифи удудубзкьан гагьди, кьувватнаъ убчӏври гъабхьундар.

19Гьадмуган Мусайи халкьдиз Къанундиъ айи табшуругъарикан ктибтбалан кьяляхъ, штук кибикьнайи кӏараринна кьунарин ифи, элвен хьана иссоп гьарин кюл гъадабгъну, Къанундин китабдикна вари халкьдик кибчру. 20Ва кӏуру: „Гирами Йикьрар худнаъ ирчрайи му ифи, Аллагьди ичв улихь, учву гьамци апӏбан бадали, дебккрайи аьдат ву“. 21Дугъу гьацира гирами Чадрик ва душваъ айи Аллагьдин гъуллугъназ ишлетмиш апӏру вари алатарик ифи кибчнийи. 22Къанунди вари ифдихьди марцц апӏуб тӏалаб апӏура ва, ифи удудубзди, хил алдабгъуб айиб дар.

23Аьршаринубдиз ухшар ади дапӏнайи вари жилинуб гьамциб жюрейиинди марцц дапӏну ккундийи, хъа аьршаринуб гьамрартӏан лап ужубсиб гъурбнихьдитӏан марцц дапӏну хай шулдар. 24Гьаддиз Месигь, инсанарин хилариинди дапӏнайи ва гьякь гирами Чадрин сиринтӏан дару жилин Чадриъ учӏвнадар, ваъ, Думу, Аллагьдин улихь ухьхъанди гаф кӏури, гьадму аьршариъ учӏвна. 25Думу аьршариъ, гьар йисан гьяйванатарин ифи хьади „Лап Гирамишваъ“учӏврайи Аллагьдин заан гъуллугъчиси, гагь-гагьнак Учв гъурбан апӏуз кӏури, учӏвнадар. 26Гьамциб аьдатнахъди Месигьра гъушнийиш, Дугъаз дюнʼя арайиз гъабхихъанмина швнубсаб ражари аьзабарикк ккуркьуб алабхъидийи. Хъа Думу, Учв гъурбан дапӏну саб ражари ва гьаммишандиз гунгьихъди вуйиб ккудубкӏбан бадали, вахтарин аьхирихъна гьаммишандиз кӏури саб ражари гъафну. 27Фици гьарсар касдиз, саб ражари дукӏну, Суддин улихь дугъужвуб алабхъуруш, 28гьаци Месигьра, гизаф инсанарин гунгьарихъанди, саб ражари гъурбан гъахьну, ва Думу гьамус кьюбпи ражарира, сарун дюнʼяйин гунагь Чаина гъадабгъуз кӏури ваъ, хъа Чаз ккилигурайидар уьбхбан бадали гъиди.