‏

Му кагъаз Павелихьди Гирами Рюгьну Римдиъ дибикӏнайиб ву. Филимон Колосс шагьриъ Исайихъ хъугърударикан сар вуйи. Филимондин Онисим кӏуру сар лукӏ Рим шагьриз гьергну гъушнийи. Гьаму шагьриъ гъабхьи саб гьядисайи лукӏран вари уьмур дигиш гъапӏнийи: думу Павелихъди таниш гъахьнийи. Павеликан Онисимдиз учв уьрхру Исайин гьякьнаан гъеебхьнийи ва Дугъан терефкар гъахьнийи. Гьергну кӏури лап пис жаза гьадабтӏбазра дилигди, гьаму гьядисайиинди учв гьергну гъафи эйсийин хликкна кьяляхъ душну, ккунивалин думу гъавриъ ахъру. Павели Филимондиз, чан лукӏрахьна гъюдал йихь кӏури, тӏалаб апӏури, бикӏуру, фицики, Филимон чавси, думура Аллагьдихъ хъугърур гъахьнийи. Гьеле Павел лукӏʼвализ ачухъди къаршу удучӏвурадаршра, Гирами Рюгьну Онисимдинна Филимондин арайиъ цӏийи аьлакьйир ирчбакан бикӏура: «Мумкин ву, саб вахтназ думу увухъди дархьуб, хъасин гьаргандиз увухъди хьиди, амма лукӏси ваъ, хъа лукӏтӏан гизаф заина вуйи ккуни гъардашси, иллагьки, узуз ккуни. Думу увузра гьам инсанси, гьамсана Агъайилантина вуйи гъардашси багьа шулу!» (15, 16).

‏ Philemon

1Иса Месигьдихъ хъугъру кӏури дустагъ дапӏнайи Павелихьанна гъардаш Тимофейихьан – ухьухъди гъуллугънаъ айи, ккуни вуйи Филимондиз 2ва яв хулаъ уч шулайи вари хъугърудариз, ккуни чи Апфияйиз ва ухьухъди гъуллугънаъ айи Архипдиз.

3Ихь Адаш Аллагьдихьан ва Агъа Иса Месигьдихьан ужʼвал ва мясляаьт ибшричвуз.

Павели саб ляхин тӏалаб апӏура

4Йиз ккарагбариъ уву кӏваин апӏури, увхъан Аллагьдиз гьаммишан чухсагъул кӏураза, 5гьаз гъапиш, узуз Агъа Исайихьна ва вари гирами халкьдихьна вуйи яв хъугъуваликан ва масанваликан ебхьури шулзуз. 6Учухъди пай апӏурайи яв хъугъували, Месигьдихъди учуз айи вари ужубдин увура гъаври ахъбан бадали ккарагураза.

7Яв масанвали узу гизаф шад гъапӏну ва ккаарцну, гьаз гъапиш, уву, гъардаш, Аллагьдин халкьдин юкӏвар архаин гъапӏунва.

8Ва гьаддиз, узхьан, Месигьдин вакилихьан, увуз яв буржйир тамам апӏин кӏури, саб нач-гучӏ адарди пуз шулушра, 9узу увухьна, тӏалаб апӏури илтӏикӏуб хъана ужу ву кӏури, гьисаб апӏураза, фицики узуз уву масанди вузуз. Узу, Павели, Месигь Исайи гьаънайири ва Гьадгъулантина дустагъ дапӏнайири, 10узуз гьаму дустагъдиъ байси гъахьи йиз бай Онисимдихъан тӏалаб апӏуразавукан. 11Саб фила-вуш думу узуз гьич саб ляхнизра хай вуйир дайи, хъа гьамус думу гьам увузра, ва гьам узузра хайирлу кас ву. 12Думу узу увухьна кьяляхъ хътаураза, амма думу узкан ктабтӏу йиз пайси вузуз! 13Думу гьамушваъ, дустагъдиъ узу Ужувлан хабарнан кӏуллан итнайишваъ, яв ерина узуз кюмек апӏбан бадали, узухъди гъитуз ккундийзуз. 14Яв разивал дарди, дици апӏуз ккун гъабхьундарзуз. Гъит яв ужувлан ляхин яв хушниинди вуйиб ибшри, хъа гуж апӏбиинди ваъ. 15Мумкин ву, саб вахтназ думу увухъди дархьуб, хъасин гьаргандиз увухъди хьиди, 16амма лукӏси ваъ, хъа, лукӏтӏан гизаф заина вуйи ккуни гъардашси, иллагьки, узуз ккуни. Думу увузра гьам инсанси, гьамсана Агъайилантина вуйи гъардашси багьа шулу!

17Гьаддиз, ухьу саб ляхин апӏурайиган, увухьна гъафи узу кьабул апӏруси, думура кьабул апӏин. 18Хъа эгер, думу яв улихь тахсиркар вуш, ясана думу увуз фу-вуш буржлуди гъузнаш, думу бурж узук кайи гьисаб апӏин. 19Магьа узу увуз йиз хилариинди бикӏураза: «Узу, Павели, яв зарар ккебкуб кӏулʼин гъадабгъураза». Гьеле узу, уву узуз буржлу вуйибдикан гафкьан кӏурира адарза. Уву яв увʼинди йиз улихь буржлу вува! 20Ав, гъардаш, Агъа бадали гьамус узуз увканра хайир дубхьну ккундузуз. Месигьдиланмина уву йиз гъардаш вуйивализ дилигну, йиз юкӏв сикин апӏин.

21Уву узухъ хъпехъур кӏури, миж кади, увуз бикӏураза. Уву йиз тӏалаб узу ккун апӏурайибтӏан артухъра кади, тамам апӏруб аьгъязуз. 22Мидихъди сабси, узуз хялижвувазси, саб халра гьязур апӏуб ккун апӏураза. Ичв ккарагбарин кюмекниинди Аллагьди узу гьаму багарихьди учвухьна гьаърубдик умуд кайиз.

23Увуз саламар хътаура узухъди дустагъдиъ айи йиз юлдаш Эпафрасди, думура Месигь Исайин кӏуллантина дустагъдиъ айир ву. 24Гьацира саламар хътаура узухъди гъуллугънаъ айи Маркди, Аристархди, Демасди ва Лукайи. 25Агъа Иса Месигьдин ужʼвал гьарган ичв рюгьнахъди ибшри!