‏ Philippians 1

1Месигь Исайин гъуллугъчйир вуйи Павелихьанна Тимофейихьан – Филиппдиъ айи Месигь Исайихъди саб вуйи Аллагьдин хъугърудариз, гьадму хъугърударин аьхюдариз ва дурарин кюмекчйириз.

2Ужʼвал ва мясляаьт учвуз, ихь Адаш Аллагьдихьан ва Агъа Иса Месигьдихьан!

Павелин миннат

3Гьар ражари учву кӏваин апӏури, узу йиз Аллагьдиз баркаллагь кӏураза. 4Гьар ражари учвхъан ккарагруган, узу шадвалиинди ккарагури шулза, 5гьаз гъапиш учву Ужувлан хабар рабгъбаъ сифте йигъариланмина гьамусдизкьан иштирак шулачва. 6Учвуъ гьадму ужуб ляхин Ккебгъури Месигь Исайин Йигъазкьан гьадму ляхин гъабхиди ва гьадмуган ккудубкӏиди.

7Дугъридан, учвухьна вуйи йиз гьиссар ари гьацдар духьну ккунду! Узу дустагъдиъ айиганси, адруганра – узу Ужувлан хабар, дидʼин алжагърударихьан уьбхюрайиган ва думу дугъри вуйиб тасдикь апӏруган, узуси учвура гьадму ужувлан гъуллугънаъ гъахьунчва. 8Месигь Исайин Чан юкӏвси йиз юкӏв фициб убцру масанвалиинди учвухьна вуйиш, магьа Аллагь шагьид ву! 9Узу, ичв масанвал хъана артухъ аьхю хьпан бадали ва гьякь аьгъюваларина сагъу фагьумлували учву ацӏбан бадали, ккарагураза. 10Гьаддиз учвхьан учвуз ужубсиб гъядябгъюз хьибдичвухьан; учву Месигь хъадакну гъюру Йигъан марцциди ва саб тахсир ктарди гъуздичва; 11учвхьан Аллагьдин ад ва тяриф апӏуз шлуси, Иса Месигьдин кюмекниинди гьякьʼвалин бегьер хуз хьибдичвухьан.

Павели аьгь апӏурайи дарвалари Аллагьдин ляхнариз кюмек апӏура

12Учвуз аьгъяди ккундузуз, гъардшар: узухъди гъахьи гьядисйир Ужувлан хабар рабгъуз кюмек гъахьну. 13Римдин паччагьдин хулан гъулугънаъ айи эскраризра ва вари жарадаризра узу Месигьдин кӏуллан дустагъдиъ итнайиваликан аьгъя. 14Узу дустагъдиъ итну кӏури, Агъайихъди саб вуйи гизаф гъардшар, саб юкӏв айиганси, уч гъахьну ва хъана ачухъди ва гучӏ ктарди Аллагьдин гафнакан ктибтури гъахьну.

15Дюз гъапиш, дурарикан сакьюдари Месигьдикан хабар чпин арайиъ бахилвал, талит ади дебккра, хъа жарадари – ужудар ниятар ади. 16Му адмийири мици узу ккунивалиан апӏура, дурариз, узу, Ужувлан хабар уьбхюз кӏури, Аллагьди дерккнайиваликан аьгъя.

17Хъа гьацдарра аки, Месигьдикан хабар чпин хайирнахъди рабгърударра. Дицдари Хабар марцци кӏваан рабгъури шулдар, дурари дици, узу йитӏнайи зунжрар ижми ва гъагъи апӏуз ккунди айидариси апӏура. 18Фу пухьахъа? Дурари чӏуру вая марцци ният ади кӏурашра, Месигьдикан кӏура – гьаддиз узу гьацибдизра рази вуза.

Узу шадвали ацӏдиза, 19фицики ичв ккарагбарина, Иса Месигьдин Рюгьнан кюмекнуна ва гьамци хьпу узу азад апӏруб, аьгъязуз. 20Му йиз ижми умударихъдина ккилигурайиваларихъди сабси гъюра. Ва, гьаци вуйиган, узу нач шлуси апӏидарза, хъа мугагьназси гьамусра гьаци кӏубанди хьидиза, ва, узу чӏивиди гъузишра, гъачӏишра, йиз бедендиъ Месигь за дапӏну хьиди. 21Фицики йиз уьмур Месигь вуйиз, аьжал – узуз гъурубкьу мутму. 22Хъа эгер узу йиз бедендиинди яшамиш шули гъузиш, узу бегьерлуди лихувал хьибди. Гьаци вуйиган, узу узуз фу ктабгъурушра, аьгъдарзуз. 23Йиз ниятназ дилигди, гьадму кьюб рякъкан узу саб рякъ ктабгъну ккунду. Узуз, му дюнʼяйиан душну, Месигьдихъди шлу рякъ ктабгъуз ккундузуз, мици гъабхьнийиш, икибаштӏан, лап гизаф ужу вуйи. 24Хъа узу му дюнʼяйиин гъузиш, ичв хайирназ хьибди, гьаддиз, мунуб рякъ хъа гизаф ужуб ву. 25Му гьаци вуйиган, узу гьамушвʼин гъузруб аьгъязуз. Узу, учву хъугъувалиъ улихь гъягъюз ва ичв хъугъували хурайи шадвал артухъ хьуз, учвухъди гъуздиза. 26Узу хъана учвухьна гъафиган, узлантина Месигь Исайиинди хъа артухъ фурс апӏуз хьибдичвухьан.

27– 28Фицдар гьялариъ ахъишра, Месигьдин Ужувлан хабар ктибтуз лайикьлуди гъузай! Узу учвухьна гъафиган, рябкъруси, хъа гъюз дархьиш, узуз ебхьруси саб хилди, Ужувлан хабар бадали, жафа зигури ва гьич сарихьдира учвуз гучӏ ккапӏуз гъидритди яшамиш йихьай. Гьамциб ичв дирбашʼвал дурариз чпи тӏанкь шлувалин лишан хьибди, хъа учву дюрхну хьиди, мурар вари Аллагьдин ляхнар хьиди. 29Аллагьди учвуз Месигь бадали хъугъувал ва Месигь бадали аьзабар аьгь апӏуб тувна. 30Фицики узу, учвуз рябкъюри, ичв улихь гъубхубсиб дяви учвура гъабхурачва. Узу думу, учвуз аьгъюганси, гьамусра гъабхураза.