‏ Philippians 2

Сар-сарин гъайгъушнаъ йихьай

1Эгер учвуз Месигьдиъ ккарцувал аш, эгер Дугъан масанвал учвуз шадвал вуш, эгер ичв арайиъ Рюгьниинди гаф-чӏал аш, эгер ичв арайиъ рягьимлувал ва язухъ зигувал аш, 2йиз юкӏв гьубкӏну шад шлуси апӏинай: вари юкӏв хъипну, вари сабси ккун апӏинай, саб жанси саб рюгьнаъди йихьай ва сабсдар фагьмар-фикрар ишричвуъ. 3Жвуван заанвал, ясана тяриф бадали, фукӏара мапӏанай. Хъа жвувтӏан багахь хьайир заанди дисури апӏинай. 4Учвкан гьарсари неинки чан, хъа гьацира имбударин хайирнаканра фикир апӏри!

Мисал – Месигь

5Месигьди фици фикир апӏуйиш ва гьапӏри гъахьнийиш, учвура гьаци апӏури гъузай.

6Думу учв Аллагь вушра, Аллагьдихъди сабси, Аллагьдихъан хъичӏихну гъузундар. 7Хъа, Чаина лукӏвал гъадабгъну, Учв асккан гъахьну. Думу адмийириз ухшар айир гъахьну. Думу зиълан адмиси духьну, 8гьациб саягъниин разиди гъузну, тап чан аьжал хьайизкьан, думу, аьжалра фициб аьжал – чавра хачриин, мютӏюгъди гъузну имийи! 9Гьаци хьузди Аллагьди Думу варибдин зиина за гъапӏну ва ччвурра Дугъаз варидаринтӏан заан вуйиб тувну – 10Исайин ччвурнан улихь гьарсабди икрам апӏбан бадали завариин али, жилариин али ва жиларикк ккайи варибди, 11гьарсаб мелзну, Иса Месигь Адаш Аллагьдин адлувализ вуйи Агъа ву, кӏури, ччвур бисбан бадали.

Аллагьдиз учву фицдар духьну ккундуш, гьацдар йихьай

12Йиз ккунидар, узу учвухъди хъайиган, учву, фициб аьшкьниинди узуз мютӏюгъ духьну, лихуйиш, гьаци зурба аьшкь кади, гьюрмат ади ва гучӏʼвал хьади, узу учвухъди хътруганра, ичв уьрхювал тамамуб хьпан бадали, лихай. 13Фицики иллагьки Аллагьди, Чаз ккуниб апӏбан бадали, ичв тямягь арайиз хуру ва ляхнарихъ хъаъру. 14Мурмрарна гьюжатар дарапӏди, вари апӏинай. 15Ва гьадмуган учвук гьич саб тахсир хьибдар, марцциди гъуздичва; намусна гъирʼят дудубгнайи ва улдугнайи инсанарин арайиъ Аллагьдин марцци веледар хьидичва. Чиркиндарин арайиъ, йишвандин мучӏушнаъ акв туврайи хядарси, йихьай. 16Гьациб жюрейиинди уьмур хурайи Гаф гъайибхай! Месигьдин Йигъан узу йиз рякъ давди ккадапӏундайза ва давди жафйир гъизигундайза кӏури, учвʼинди фурс апӏидиза!

17Аллагь бадали апӏурайи ляхнариъ ичв хъугъувалин гъуллугънаъ хьпаъ йиз ифи удубзурушра, узу шад хьидиза, учвухъди сабси шадвал хъапӏдиза. 18Ари гьамциб жюрейиинди учвура шадвал хъапӏну ккунду, ва ичв шадвал узухъдира пай апӏуз шлуси гъузай!

Тимофейиканна Эпофрадитдикан хабрар

19Агъа Исайи, багарихьди Тимофей учвухьна гьауз шул, кӏури, умуд тувразуз, дугъу ичв ляхнар фици вуш, узуз аьгъю гъапӏган, йиз юкӏв архаин шул. 20Тимофейси, учвхъанди юкӏв убгру жара кас адарзуз. 21Вари имбудар чпин хайирнахъ хъа, Иса Месигь бадали вуйир гьич фужкӏара дар. 22Думу фукьан мюгькамур вуш, учвуз аьгъячвуз, думу узухъди, Ужувлан хабар бадали бай адашдихъди фици шулуш, гьаци шула. 23Узуз, йиз ляхин фицидарихъинди илтӏибкӏнуш, аьгъю гъабхьимитӏлан думу учвухьна гьауз миж кайиз. 24Агъайи, багарихьди узхьанра учвухьна гъюз шул, кӏури, умуд тувразуз.

25Узу гьацира, эгер ихь гъардаш Эпофрадитра учвухьна кьяляхъ гьаиш ужу шул, кӏури, гьисаб апӏураза. Думу, йиз гъайгъу зигбан бадали, учву узухьна гьау йиз гъуллугъчи ва узуси саб гъагънакк ккайи йиз юлдаш вуйиз. 26Дугъаз учву рякъюз гизаф ккунди а, думу йишвʼин сикинди ктисурадар, гьялак духьна, гьаз гъапиш, учв иццру гъахьну, кӏури, учвухьна хабар дубшна, кӏура. 27Думу гьаци хьузра гъабхьну ва даркӏиди саб нуфт ими. Аммаки Аллагьди дугъан язухъ гъизигну, неинки дугъан, хъа гьацира йизра язухъ гъизигну – Аллагьдиз йиз дерд артухъ апӏуз ккун гъабхьундар. 28Гьаци вуйиган, Эпофрадит хъа аьхю иштагьниинди учвухьна гьаъдиза. Думу учвухьна гъюб ичв аьхю шадвал хьибди, ва йиз дердра гьаму сабдиинди кам хьибди. 29Думу Агъайихъди вуйи ичв гъардашси аьхю шадвалиинди кьабул апӏинай ва гьацдар адмийириз чпи лайикь вуйибсиб гьюрматра апӏури йихьай. 30Фицики Месигьдин ляхнар бадали дугъан лик аьжалин даргниин алди гъабхьну, дугъу чан уьмур гьяйиф гьапӏундайи. Гьаци дугъу учвхьан узуз апӏуз дархьи кюмекар гъапӏунзуз.