Phili 3 | TabIBTNT | STEP | Ахирки, йиз гъардшар, учву Месигьдихъди хъайивалихъди учвуз шадвалар ккун апӏураза! Узу учвуз гьаммишан сабдикан бикӏурашра, эргри шулдарза. Миди учву гизаф бедбахтвалариккан уьрхиди.

‏ Philippians 3

Месигь варидартӏан заан ву

1 Ахирки, йиз гъардшар, учву Месигьдихъди хъайивалихъди учвуз шадвалар ккун апӏураза! Узу учвуз гьаммишан сабдикан бикӏурашра, эргри шулдарза. Миди учву гизаф бедбахтвалариккан уьрхиди.

2 Суннат апӏури, бедендиз зиян тувру намуссуз „хуйирихьан“ихтият йихьай! 3 Гьякь суннат дапӏнайидар, ухьу вухьа, гьаз гъапиш, ухьу Аллагьдин Рюгьну хъаъри, Дугъан гьякь гъуллугънаъ ахьа; Месигь Исайин уьмриинди ухьу заан, яни дамахлу вухьа ва му дюнʼяйинубдихъан хъичӏихнадархьа. 4 Узхьан му дюнʼяйинуб дибисну гъузузра шуйзухьан. Эгер, шли-вуш му дюнʼяйинубдиин гъубзру бин азуз, кӏури гъабшиш, дугъазтӏан узуз дициб бин хъа ижмиб азуз. 5 Йиз суннат бабкан духьну миржидпи йигъан гъапӏнийи. Узу Израилин халкьдин арайиан вуйи Вениаминдин тухмиан вуза. Узу жугьдар вуйи абйир-бабарикан духьнайи марцци жугьуд вуза. Эгер Къанундихъди фици вува, кӏури, гьерхруш, узу Къанун гьярф-гьярфди тамам апӏру фарисей вуза. 6 Йиз хъачӏаккувал Аллагьдихъ хъугърударихъ хъергуб вуйиз. Къанунди дюз кӏурайиб вари тамам апӏури гъахьунза, гьаддин гьякьнаан узук гьич саб тахсирра ктарзук.

7 Аммаки гьадмуган узу гъазанмиш дапӏнайи вари хъуркьувалар Месигь бадали гьамус узхьан гьадахьу мисал апӏураза. 8 Мидланра гъайри, йиз Агъа Месигь Иса аьгъю хьпан кьяляхъ вари имбуб гьич фукӏа дарубси гьисаб апӏураза. Думу бадали узу варибдихьан ярхла гъахьунза, гьаму дюнʼяйиъ айиб вари гатӏахьнайи чӏюрхяртӏан багьади дарзуз. Йиз мурад-метлеб, гьапӏнура, Месигь агуб ва 9 узу Гьадгъахъди хьуб вуйиз. Сарун узу, Къанунди улупнайиб тамам апӏидиза, кӏури, жвуван жафайиинди Аллагьдин улихь гьякь хьуз хьибдизухьан кӏури, гьаддихъ хъачӏарккну имдарза. Месигьдихъ хъугъигантӏан Аллагьдин улихь гьякь хьуз шлуб дар – узу гьаддихъ хъачӏарккназа. Гьациб хъугъвал туврайирра Аллагь ву. Узуз ккуниб сабтӏан дарзуз: 10 Иса Месигь аьгъю апӏуб, яни Думу чӏиви гъапӏу кьудрат аьгъю апӏуб. Узуз гьацира, Дугъан аьзабар пай апӏуз ккундузуз ва, Гьадму гъачӏибси дукӏну, 11 Гьадму чӏиви гъахьиганси, узура чӏиви хьидайкӏан, кӏури, миж кади гъузуз ккундузуз.

Улихь хьайи метлеб тамам апӏуз шерик йихьай

12 Узуз, узу гьадму метлебарихъна гъафунза, пуз, ккунди адарзуз. Аммаки Иса Месигьди узу, гьадму метлебнахъна гъюз кӏури, кадагънайир ву. 13 Гъардшар, йиз улихь гьамциб къайда дебккназа: сарун гъапӏу ляхнарикан фикир дарапӏуб ва узуз айи вари кьувватниинди апӏуз ккимбу ляхнарихъ хъюгъюб. 14 Гьаци апӏувалин метлебра узу пешкеш рубкьуз лайикь хьувал вуйиз. Думу пешкеш – Иса Месигьдиланмина Аллагьди аьршариз дих дапӏнайивал вуйиз.

15 Узуз учвкан фужар хъуркьнаш, гьаму узуси духьну ккундийзуз. Хъа эгер, саб фициб-вуш месэлайин гьякьнаан учву жараси фикир апӏураш, Аллагьди гьадмура ачухъ апӏидичвуз. 16 Фициб жюрейиинди вушра, гъачай, ухьу гьамусдиз хъуркьнайи хъуркьувалар, аьгъювалар гьисабназ гъадагъну, яшамиш шулахьа. 17 Гъардшар, жарадар гъярайиси, учвура йиз рякъди узухъди дуфну ккунду. Учу учвуз улупганси яшамиш шулайидариз фикир тувай. 18 Фицики, гизафдар, узу учвуз улихьна гъапиганси (гьамусра улариин нивгъар алди хъана кӏураза), Месигьдин хачран душмнарси яшамиш шула. 19 Дурарин аьхир аьжал хьибди, дурарин аллагь чпин фун ву; чпиз нач дубхьну ккунибдиинди дурари фурсар апӏури шулу. Дурари дюнʼяйин ляхнарикантӏан фикир апӏури шулдар. 20 Хъа ихь ватан аьршариъ а. Гьадму ихь Ватандиан гъиди ухьу Уьрхру ихь Агъа Иса Месигь. 21 Дугъу, ихь зяиф, аьжал хъайи жанар дигиш дапӏну, Чансиб нур тувру Бедендиз илтӏикӏиди. Дугъу ихь жанар вари дюнʼя Чаз мютӏюгъ апӏуз гъиту кьувватниинди илтӏикӏуз гъитди.