Rev 1 | TabIBTNT | STEP | Иса Месигьдин ачмиш апӏувал, Чан гъуллугъчйириз багарихьди хьуз ккайиб вари улупбан бадали, Дугъаз Аллагьди тувнайиб ву. Мидкан хабар дебккбан бадали, Чан гъуллугънаъ айи Югьандихьна Исайи малайик гьаънийи.

‏ Revelation of John 1

Фтикан ву гьаму китаб

1 Иса Месигьдин ачмиш апӏувал, Чан гъуллугъчйириз багарихьди хьуз ккайиб вари улупбан бадали, Дугъаз Аллагьди тувнайиб ву. Мидкан хабар дебккбан бадали, Чан гъуллугънаъ айи Югьандихьна Исайи малайик гьаънийи.

2 Югьанди чаз гъябкъюб вари: Аллагьдин Гаф ва Иса Месигьдин шагьидвал – тасдикь апӏура.

3 Хушбахтавар ву Аллагьди гьаънайи гьаму пайгъамбарвалин гафар урхурайир, дурарихъ хъпехъурайир ва мушваъ дибикӏнайиб тамам апӏрур. Гьаз гъапиш вахт хъубкьна.

Хъугънайидарин жямяаьтдихьна вуйи гафар

4 Асия вилаятдиъ айи хъугънайидарин ургуб жямяаьтдиз Югьанди кӏура: учвуз гьарган Айирихьан, Гъахьирихьан ва Гъюрурихьан, гьацира Дугъан тахтнахь хьайи ургур рюгьнахьан, 5 Иса Месигьдихьанра – гьякь Шагьид вуйирихьан, гъийихдарик сарпирди чӏиви Гъахьирихьан ва дюнʼяйин паччгьарин зиин агъавал Апӏурайирихьан ужʼвал ва мясляаьт ибшричвуз.

Ухьу Ккунириз, Чан ифдиинди ухьу ихь гунгьарихьан азад Гъапӏуриз, 6 саб паччагьлугъдиз уч гъапӏу ухькан Чан Адашдин – Аллагьдин гъуллугънаъ шлудар Ктауриз зат ккудудукӏру аьсрариз ад ва кьудрат ибшри. Амин!

7 Магьа гьамус Думу дифар хъади гъиди ва гьарсариз Думу рякъиди, гьеле Дугъан мурглин тӏуларигъянзина жида гъюбччвдаризра кмиди. Дугъан улихь дюнʼяйиин али вари миллетари суза зигиди. Ав, дугъриданра гьаци ву! Амин.

8 «Узу вуза, – кӏура Агъа Аллагьди, – Эвелра, Аьхирра гьарган Айирра, Гъахьирра, Гъюрурра ва вари хилиъ Дибиснайирра».

9 Узу, Югьан, ичв гъардаш, Месигь Исайиъди саб вуди, учвухъди Дугъан бедбахтвалар, паччагьлугъвал ва сабурлувал пай апӏурайир, Аллагьдин Гаф ва Иса Месигьдихъан шагьидвал бадали Патмос кӏуру островдиин гъахьунза.

10 Элгьет йигъан узуз, Рюгьнан гьюкмиъ ахънайириз, зурнайианси чӏигъ апӏури, йиз кьялхъян аьхю дих гъеебхьунзуз. 11 Диди гъапи: «Вари увуз рябкъюрайиб кагъзик бикӏ ва Эфесдиъ, Смирнайиъ, Пергамдиъ, Фиатирайиъ, Сардисдиъ, Филаделфияйиъ ва Лаодикияйиъ айи ургбиб жямяаьтариз хъадапӏ».

12 Узукди гьаму гафар апӏурайи дих шлинуб вуйкӏан, кӏури, кьяляхъ илдицуриз, гъизилин акв апӏру ургуб алат гъябкъюнзуз. 13 Гьадму акв апӏрударин арайиъ, ярхи палат алди, мухрилан гъизилин чӏул идибтӏнайи, Инсаниятдин Бализ ухшар айирсир кас гъяркъюнзуз. 14 Дугъан кӏул ва кушар лизи хьаси ва йифси вуйи. Дугъан улар убгурайи цӏаси вуйи, 15 хъа ликар пичраъ крабчӏури убгурайи рукьси вуйи, Дугъан дихра ягъли гъарзарилан урсрайи штарин гъугъси вуйи.

16 Дугъан арччул хилиъ ургуб хяд айи. Дугъан ушвниан, кьюбиб терефарихъанди мурзар али учӏру ханжал удубчӏвнайи. Дугъан маш яманди ичӏибгнайи ригъси айи.

17 Думу гъяркъиган, дукӏнайирси, Дугъан ликарикк дахъунза, хъа Дугъу, Чан арччул хил йиз гъюниин иливну, гъапи:

– Гучӏ мапӏан! Узу вуза Сарпирра, Ккудукӏрурра. 18 Яшамиш шулайир Узу вуза. Узу гъакӏнийза, хъа магьа Узу хъана аьсрариан-аьсрариз яшамиш шулаза. Узухь хьазухь аьжалин ва жегьеннемдин ачар. 19 Гьаци вуйиган, увуз гъябкъюб бикӏ: гьаму ражари шулайиб ва хъасин хьуз ккайиб. 20 Магьа, увуз Йиз арччул хилиъ гъяркъю ургуб хядран ва ургуб чирагъдин сир: ургуб хяд – мурар ургбиб жямяаьтарин малайикар ву, хъа ургуб чирагъ – мурар ургуб жямяаьт ву.