Rev 10 | TabIBTNT | STEP | Узуз дифариъди завариансина гъюрайи сарсана кьудратлу малайик гъяркъзуз. Дугъан кӏулʼин дерккучӏимир алийи, машну ригъдиси нур туврайи, хъа ликар цӏин бурузарстар вуйи.

‏ Revelation of John 10

Дибиржнайи китаб хьайи малайик

1 Узуз дифариъди завариансина гъюрайи сарсана кьудратлу малайик гъяркъзуз. Дугъан кӏулʼин дерккучӏимир алийи, машну ригъдиси нур туврайи, хъа ликар цӏин бурузарстар вуйи. 2 Дугъан хилиъ, саб кьадар ачмиш дапӏнайи кагъаз айи. Дугъу арччул лик гьюлериин диву, хъа гагул лик – жилариин, 3 ва зурба дихниинди, аслан арабхруганси, гьарай гъапӏу! Дугъу гьарай гъапӏиган, завар рахрустар, ургуб гъугъруми гафар апӏуз хъюгъю. 4 Ургбиб гъугърумари гафар гъапӏиган, узу бикӏуз гьязур гъахьиза. Аммаки узуз завариан гьамци кӏурайи дих гъеебхьзуз: «Ургбиб гъугърумари гъапиб жиниди уьбх. Думу гафар мидикӏан!»

5 Узуз гьюлʼинна жилиин дийигъну гъяркъю малайикди арччул хил завариз за гъапӏу, 6 ва аьсрариан аьсрариз гьарган яшамиш Шулайириинди, завар ва душваъ айиб, жилар ва душвʼин алиб арайиз Гъабхуриинди, сарун вахт имдар кӏури, ху гъапӏу!

7 Хъа гьадму йигъари, ургурпи малайикдин зурна гъарабхган, Аллагьдин сир, Дугъу Чан гъуллугънаъ гъаши пайгъамбрариз хабар дебккганси, вари тамам хьибди.

8 Узуз завариан гъеебхьу дихну, узухьинди илтӏикӏну гъапизуз: «Душну, гьюлʼинна жилиин дийигънайи малайикдихьан ачмиш дапӏнайи китаб бис».

9 Узу, багахь духьну, малайикдихьан гьадму китаб узухьна тувуб ккун гъапӏза. Хъа дугъу узуз гъапи: «Ма, му ипӏин, фуниъ кьутӏкьлишин абхъдияв, хъа ушв йиччвси меъли хьибдияв».

10 Узу думу китаб, малайикдин хилʼан дибисну, гъипӏза ва йиз ушвниъ, йиччв гъипӏганси, меълишин абхъу, хъа фуниъ – ктирсуз даршлу кьутӏкьлишин. 11 Хъа узуз гъапи: «Уву аьхючӏвеъ халкьарикан, миллетарикан, чӏаларикан, ва паччгьарикан пайгъамбарвалин гафар хъана пуз буржлу вува».